San Mateo 17 - Ti Biblia (1973)

Ti panagbaliw ti langana.

¹ Ket idi nalabes ti innem nga aldaw, ni Jesus incuyogna da Pedro ken Santiago ken Juan a cabsatna, ket simmangatda iti maysa a bantay a natayag ken putputong;

² Ket nagbaliw iti sangoananda; ket naglawag ti rupana a cas la ti init, ket dagiti pagananayna nagbalinda a napudaw cas iti lawag.

³ Ket adtoy, nagparangda cadacuada da Moises ken Elias a makisasao kencuana.

⁴ Ket idi a nagsao ni Pedro, kinunana ken Jesus: Apo nasayaat nga agiantayo ditoy: no cayatmo, agaramidcami ditoy ti tal-lo nga ababong: maysa ti maipaay kenca, ket maysa ken Moises, ket maysa ken Elias.

⁵ Idi agsasao pay laeng, adtoy, ti maysa nga ulep a naraniag a lininunganna ida; ket adtoy ti maysa a timec iti ulep a kinunana: Daytoy isu ti Anacco a dungdungoec, isu a pacaayaywac: isu ti denggenyo.

⁶ Ket idi dagiti adalan, nangngegda daytoy nagpaclebda ket nagbutengda ti napalalo.

⁷ Ket ni Jesus immasideg, ket tinignayna ida ket kinunana: Bumangoncayo ket dicay agbuteng.

⁸ Ket idi intangadda dagiti matada, awan ti nakitada, no di laeng ni Jesus.

⁹ Ket idi sumalogda idi bantay, ni Jesus imbilinna cadacuada, a cuncunana: Dicay ibaga iti uray siasino ti nakitayo agingga iti Anac ti tao agungar cadagiti natay.

¹⁰ Ket dagiti adalanna inintuudda kencuana, a cuncunada: Apayapay ngarud a dagiti escriba saoenda a masapul a ni Elias umay nga umuna?

¹¹ Ket simmungbat ni Jesus, ket kinunana cadacuada: Pudno, ni Elias umay nga umuna, ket tarimaanennanto dagiti amin a banag.

¹² Ngem cunac cadacayo, nga immayen ni Elias, ket isu dida nailasin; no di ket inaramidda kencuana ti amin a kinayatda: casta met ti Anac ti tao agsagabanto cadacuada.

¹³ Idin dagiti adalan naawatanda a ni Juan a Bautista ti kinunana cadacuada.

Pannacaagas ti adda bulanbulanenna.

¹⁴ Ket idi dimtengda cadagiti adu a tao, immay kencuana ti maysa a tao a nagparintumeng, ket cunana:

¹⁵ Apo caasiam tay anacco a lalaki, ta bulanbulanen ket agsagaba unay; ta masansan a matnag iti apuy ken iti danum.

¹⁶ Ket inyegco cadagiti adalam, ngem dida nabalin nga inagasan.

¹⁷ Ket simmungbat ni Jesus, ket kinunana: O caputotan nga awanan pammati ken managdacdakes! Agingga ti caano nga addaac a maicuyog cadacayo? Agingga ti caano nga iturturedcayto Isu iyegyo caniac ditoy.

¹⁸ Ket ni Jesus inungtanna ti sairo ket rimmuar kencuana: ket ti baro naagasan nanipud idi nga horas.

¹⁹ Idin, dagiti adalan immasidegda ken Jesus iti nalimed ket kinunada: Apayapay isu dicam nabalinan a pinaruar?

²⁰ Ket ni Jesus cunana cadacuada: Gapu iti bassit a pammatiyo: ta pudno conac cadacayo, a no adda coma pammatiyo a cas iti bukel ti mostaza, cunaenyonto itoy bantay: Umalisca manipud ditoy agingga idiay a disso; ket umalisto; ket awanto ti di mabalin cadacayo.

²¹ (Ngem daytoy a kita saan a rummuar no di gapu iti panagcararag ken panagayunar.)

²² Ket idi addada idiay Galilea, ni Jesus kinunana cadacuada: Ti Anac ti tao mayawatto cadagiti imima dagiti tattao.

²³ Ket isu papatayendanto; ngem ti maicatlo nga aldaw agungarto. Ket nagladingitda la unay.

Ni Jesus agbayad ti buis.

²⁴ Ket idi dimteng idiay Capernaum, immayda ken Pedro dagiti agsingsingir ti guddua ti siclo ket kinunada; Ti mannursuroyo saanna aya a bayadan ti guddua ti siclo?

²⁵ Cunana: Wen. Ket idi isu simrec iti balay, ni Jesus nakisao kencuana nga immuna a cuncunana: Ania ti pagarupem, Simon? Dagiti arari ditoy daga, Asino ti pagsingiranda ti impuesto wenno buis? cadagiti annacda wenno cadagiti gangannet?

²⁶ Ni Pedro cunana kencuana: Cadagiti ganganaet. Ni Jesus kinunana kencuana: No casta dagiti annac dida agbayad.

²⁷ Ngem tapno ditay agbalin a pacaitibcolanda, inca agbanniit idiay baybay ket ti umuna nga ican nga maalam intono maluctam ti ngiwatna, macasaracaanto ti maysa a siclo: alaem ket itedmo cadacuada gapu caniac ken gapu kenca.