San Mateo 16 - Ti Biblia (1973)

Ti levadura dagiti Fariseo.

¹ Ket dagiti Fariseo ken dagiti Saduseo, immayda susuuten ket dinawatda kencuana nga ipakitaanna coma ida ti maysa a pagilasinan iti langit.

² Ngem isu simmungbat, ket kinunana cadacuada: No mumalem cunayo: Nasayaatto, ti tiempo, ta ti langit nalabaga.

³ Ket iti bigat: Dakes ita ti tiempo, ta ti langit nalabaga ket naulep. Ammoyo ngarud nga ilasinen ti langa ti langit, ngem dicay mabalinan nga ammoen dagiti pagilasinan dagiti tiempo.

⁴ Ti maysa a caputotan a dakes ken nacamalala agdawat iti maysa a pagilasinan; ngem awanto ti maited kencuana nga aniaman a pagilasinan, no saan a ti pagilasinan ni Jonas a mammadto. Ket binaybay-anna ida, ket pimmanaw.

⁵ Ket idi dagiti adalanna nacagtengda iti sabali a bangir ti baybay nalipatanda ti nangicuyog ti tinapay.

⁶ Ket ni Jesus kinunana cadacuada: Kitaenyo ket agaluadcayo iti levadura dagiti Fariseo ken dagiti Saduceo.

⁷ Ngem panpanunuten ti maysa ken maysa cadacuada a cuncunada: Datayo ditay nangicuyog ti tinapay.

⁸ Ket idi madlawan ni Jesus, kinunana cadacuada: O dacayo a bassitan pammati. Apayapay panunutenyo iti unegyo met laeng gapu ta awan ti tinapayyo?

⁹ Dicay pay la maammoan ken dicay malagip dagidi lima a tinapay a naiwaras cadagiti lima ribo, ken no mano nga alat ti inacupyo?

¹⁰ Uray dagiti pito a tinapay a naibunong cadagiti uppat a ribo, ken no mano nga alat ti inacupyo?

¹¹ Apayapay ngarud a dicay maawatan a sann a gapu iti tinapay ti kinunac cadacayo? Ngem agaluadcayo iti levadura dagiti Fariseo ken dagiti Saduceo.

¹² Idin naawatanda a saan a nagsao cadacuada nga agaluadda iti levadura ti tinapay, no diket iti sursuro dagiti Fariseo ken Saduceo.

Ti panangammo ni Pedro.

¹³ Ket idi ni Jesus immay cadagiti disso ti Cesarea ni Filipo, inintuudna cadagiti adalanna, a kinunana Siasino ti Anac ti tao iti panagcuna dagiti tao?

¹⁴ Ket kinunada: Dagiti dadduma cunada, ni Juan a Bautista; dagiti dadduma, ni Elias; ket dagiti dadduma, ni Jeremias, wenno maysa cadagiti mammadto.

¹⁵ Ni Jesus cunana cadacuada: Ngem dacayo siasinoac ti panagcunayo?

¹⁶ Ket simmungbat ni Simon Pedro, ket kinunana: Sica ti Cristo, ti Anac ti Dios a sabibiag.

¹⁷ Ket simmungbat ni Jesus, ket kinunana kencuana: Nagasatca, Simon, anac ni Jonas; ta saan nga ti lasag wenno dara, ti nangipaltiing kenca no di ket ni Amac nga adda sadi langit.

¹⁸ Ket siac cunac met kenca, a sica Pedroca; ket iti daytoy a bato bangonecto ti Iglesiac; ket dagiti ruangan ti Hades saandanto nga agballigi kencuana.

¹⁹ Itdecto kenca dagiti tulbec ti pagarian ti langit; ket ti aniaman a galutamto ditoy daga, magalutanto idiay langit; ket ti aniaman a warwaramto ditoy daga mawarwaranto idiay langit.

²⁰ Idin imbilinna cadagiti adalanna nga awan ti pangibagaanda nga isu ti Cristo.

²¹ Nanipud idi nga aldaw rinugian ni Jesus nga imbaga cadagiti adalanna a masapul kencuana ti mapan idiay Jerusalem, ken aglac-am cadagiti adu a banag cadagiti lallacay ken cadagiti panguloen cadagiti sacerdote ken escriba; ken matay ken agungar iti maicatlo nga aldaw.

²² Ket ni Pedro, innalana iti napacni ket rinugianna nga dil-lawen a cunana kencuana: Apo, caasiam ta bagim; uray caanoman saan coma a maaramid kenca daytoy.

²³ Ngem isu simmango ket kinunana ken Pedro: Pumanawca iti sangoanac, Satanas; sica ti pacaitibcolac; ta dica panpanunuten dagiti maipapan iti Dios, no di ket dagiti maipapan cadagiti tao.

Yaawit ti cruz.

²⁴ Idin kinuna ni Jesus cadagidi adalanna; no sinoman a tao ti mayat nga umay sumurot caniac paglicudanna ti bagina ket alaenna ti cruzna, ket surutennac.

²⁵ Ta uray siasino a mayat coma a mangisalacan iti biagna, isu ti mapucawnanto; ket uray siasino a macapucaw iti biagna gapu caniac isu ti masaracannanto.

²⁶ Ta, Ania ti magun-guna ti tao, no maalananto ti amin a lubong ket mapucawnanto ti cararuana? wenno ania ti itedto ti tao a sucat ti cararuana?

²⁷ Ta ti Anac ti tao umayto agraman iti dayag ni Amana ken dagiti angelna: ket iti dayta gungunaannanto ti tunggal maysa cas cadagiti aramidna.

²⁸ Pudno cunac cadacayo: adda dadduma cadagiti agtatacder ditoy a didanto maramanan ti patay, agingga iti makitada ti Anac ti tao nga umumay iti pagarianna.