San Mateo 15 - Ti Biblia (1973)

Ti cadaoyan dagiti lallacay.

¹ Idin immayda ken Jesus dagiti escribas ken Fariseos a naggapu iti Jerusalem, a cuncunada:

² Apayapay dagiti adalam salungasingenda ti cadawyan dagiti panglacayen? ta dida buggoan dagiti imada no manganda ti tinapay.

³ Ket isu simmungbat, ket kinunana cadacuada: Dacayo. Apayapay salungasingenyo met ti bilin ti Dios a gapu cadagiti cadawyanyo?

⁴ Ta ti Dios imbilinna a cunana: Dayawem ni amam ken ni inam: ket ti agsao ti dakes; iti ama ken ina mapatayan coma iti patay.

⁵ Ngem dacayo cunayo: Uray siasino nga agcunanto iti amana wenno inana: amin daydiay a nabalinco coma a pagservi kenca, naidatonda iti Dios.

⁶ Daytoy saananto a padayawan ni amana. Iti casta pinucawyo ti capapaayan ti bilin ti Dios gapu iti cadawyanyo.

⁷ Dacayo managinsisingpet, naimbag ti panangipadto ni Isaias, iti maipapan cadacayo a cuncunana:

⁸ Daytoy nga umili dayawennac cadagiti bibigda; Ngem ti pusoda adda iti adayu caniac.

⁹ Ngem barengbareng ti panagdayawda caniac. Nga isursuroda dagiti sursuro a bilbilin dagiti tao.

¹⁰ Ket inayabanna kencuana ti umili, ket kinunana cadacuada: Dumngeg ken awatenyo:

¹¹ Saan a dayta sumrec iti ngiwat, ti mangtulaw iti tao; no di ket dayta rummuar iti ngiwat, isu ti mangtulaw iti tao.

¹² Idin immasideg dagiti adalanna ket kinunada kencuana: Ammom a dagiti Fariseo, itay nangngegda daytoy a sao naglucsawda?

¹³ Ngem isu simmungbat, ket kinunana: Isu-amin a mula a saan nga immula ni Amac a nailangitan, maparutto.

¹⁴ Bay-anyo ida ta bulsecda a mangidalan cadagiti bulsec; ket no bulsec idalanna ti bulsec, agpadpadadanto a matnag iti abut.

¹⁵ Ket ni Pedro simmungbat, ket kinunana kencuana: Ipalawagmo cadacami daytoy a pangngarig.

¹⁶ Ket ni Jesus kinunana: Uray dacayo met awan pay isipyo?

¹⁷ Dicay maawatan nga uray ania a sumrec iti ngiwat, mapan iti tian, ket maibel-leng iti disso a nalemmeng?

¹⁸ Ngem dagiti banag a rummuar iti ngiwat, agtaudda iti puso; ket isuda ti mangtulaw iti tao.

¹⁹ Ta iti puso rummuar dagiti dakes a panunot, pammapatay, pannakicamalala, ab-abig, tactacaw, naulbod a manangsacsi, tabtabaaw iti Dios;

²⁰ Dagitoy isuda dagiti banbanag a mangtulaw iti tao; ngem ti pannangan a di buggoan dagiti ima, saanna a matulawan ti tao.

Ti babai a taga Canaan.

²¹ Ket pimmanaw ni Jesus sadiay, ket napan cadagiti disso ti Tiro ken ti Sidon.

²² Ket adtoy ti maysa a babai a taga Canaan, rimmuar cadagidiay a beddeng, ket nagickis a cuncunana: Apo, Anac ni David, caasiannac; ti anacco a babai maparigat la unay iti maysa a sairo.

²³ Ngem isu saan a simmungbat kencuana ti uray maysa a sao. Ket immasideg dagidi addalanna ket dinawatda kencuana a cuncunada: pagawiddem, ta isu agic-ickis iti licudantayo.

²⁴ Ket isu simmungbat, ket kinunana: Saanac a naibaon no di cadagiti carnero a napucaw iti balay ti Israel.

²⁵ Ngem di babai immay ket nagdaydayaw kencuana a cuncunana: Apo, badangannac.

²⁶ Ket isu simmungbat, ket kinunana: Saan a maiparbeng nga alaen ti tinapay dagiti annac, ket ibacal cadagiti uken.

²⁷ Ket di babai kinunana: Wen Apo: ngem dagiti uken manganda met cadagiti murcat a maregreg iti panganan dagiti appoda.

²⁸ Iti casta simmungbat ni Jesus ket kinunana kencuana: O babai, dackel ti pammatim; maaramid coma kenca a cas tarigagayam: Ket immimbag di anacna nanipud idi nga horas.

Maicadua nga yaadu ti tinapay.

²⁹ Ket pimmanaw ni Jesus sadiay, ket immay iti dinna ti baybay ti Galilea: ket immuli iti bantay, ket nagtugaw sadiay.

³⁰ Ket dimteng kencuana dagiti umariwecwec a tattao a nangicuyogda cadagiti pilpilay, bulbulsec, umumel, singsingcol ken adu pay a sabali a masakit; ket incabilda ida iti sacaanan ni Jesus, ket isu pinaimbagna ida.

³¹ Iti casta dagiti adu a tao, nasnasdaawda idi nakitada nga dagidi umel agsasaodan, dagidi singcol naagasanda, dagidi pilay magmagnadan, ket dagidi bulsec macakitadan, ket isuda amin dinaydayawda ti Dios ti Israel.

³² Ket ni Jesus inayabanna dagiti adalanna, ket kinunana: Cacaasiac dagitoy adu a tao, ta tal-lo nga aldawen nga addada caniac ket awan ti macanda: ket diac cayat a pagawiden ida a dida mangan, di la ket ta agcapuyda iti dalan.

³³ Ket dagidi adalanna cunada kencuana: Casano ti pannacaadda ti adu a tinapay cadacam ditoy let-ang a pamussog iti nagadu unay a tao?

³⁴ Ket ni Jesus cunana cadacuada: Mano dagiti tinapay nga adda cadacayo? Ket kinunada: Pito ken sumagmamano nga ic-ican a babassit.

³⁵ Ket imbilinna cadagiti adu a tao nga agtugawda iti daga.

³⁶ Ket innalana dagidi pito a tinapay ken ic-ican; ket nagyaman, ket pinispisana, ket intedna cadagidi adalanna; ket dagidi adalan intedda cadagidi adu a tao.

³⁷ Ket nanganda amin ket nabsogda; ket immacupda pay cadagiti pispisi a natda, ti pito nga alat a napno.

³⁸ Ket dagiti nangan uppat a riboda a tao, malacsid dagiti babbai ken ububbing.

³⁹ Ket idi a napagawidnan dagidi tattao, simrec iti barangay: ket immay cadagiti beddeng ti Magdala.