San Mateo 14 - Ti Biblia (1973)

Ipapatay ni Juan a Bautista.

¹ Idi a tiempo ni Herodes a gobernador nangngegna ti damag a maipapan ken Jesus,

² Ket kinunana cadagiti catulonganna: Daytoy isu ni Juan a Bautista; a nagungar cadagiti natay, ket gapu iti casta dagitoy a pannacabalin agararamidda kencuana.

³ Ta ni Herodes tiniliwna idi ni Juan, ket kinawaranna ken impisocna iti pagbaludan gapu ken Herodias, asawa ni Felipe a cabsatna.

⁴ Ta ni Juan kinunana idi kencuana: Saan a maipalubos kenca nga isu ti cupicupam.

⁵ Ket idi isu ti papatayenna coma, nagbuteng cadagiti umili ta imbilangda a cas maysa a mammadto.

⁶ Ngem idi a marambacan ti aldaw ti pannacayanac ni Herodes, ti anac a babai ni Herodias nagsala iti tengnga ket pinaayatna ni Herodes.

⁷ Gapuna incarina nga insapata nga itednanto kencuana ti amin a dawatenna.

⁸ Ket isu, gapu ta immuna nga insuro ni inana, cunana: Itdem caniac ditoy iti maysa a pinggan, ti ulo ni Juan a Bautista.

⁹ Ket nagladingit di ari; ngem gapu iti sapatana ken gapu cadagiti adda a nakisango idi panganan, imbilinna nga maited kencuana;

¹⁰ Ket nangibaon, ket pinaputulanna ni Juan iti pagbaludan.

¹¹ Ket naiyeg di ulona iti maysa a pinggan ken naited idi balasang; ket inyegna daydi ken inana.

¹² Idin dimteng dagiti adalan ni Juan, ket innalada di bangcay, ket imponponda; ket napanda, impadamag ken Jesus.

Umuna nga yaadu dagiti tinapay.

¹³ Ket idi nangngegan ni Jesus, pimmanaw sadiay, a nagbarangay, a napan iti maysa a disso nga awan matagtagitao ken putputong; ket idi maammoan dagiti adu a tattao simmurotda kencuana a nagnagna nanipud cadagiti ciudad.

¹⁴ Ket idi rummuar ni Jesus, nakitana ti umariwecwec a tao, ket simnec ti asina cadacuada, ket pinaimbagna dagiti masakitda.

¹⁵ Ket idi immay ti malem, immasideg kencuana dagiti adalanna, a cuncunada: Ti disso awan ti matagtagitaona, ket mumalemen; pagawidem dagiti tao, tapno mapanda cadagiti purpuroc, ket gumatangda ti canenda.

¹⁶ Ngem ni Jesus kinunana cadacuada: Awan ti pacasapulanda nga agawid; pacanenyo ida.

¹⁷ Ket kinunada: Adda cadacam ditoy limlima laeng a tinapay ken dua nga ican.

¹⁸ Ket kinunana cadacuada: yegyo ida caniac ditoy.

¹⁹ Ket imbilinna cadagiti adu a tao nga agtugawda iti carootan, ket innalana dagiti lima a tinapay ken dagiti dua nga ican ket intangadna dagiti matana iti langit, binendicionanna; ket pinispisina, ket intedna dagiti tinapay cadagiti adalan, ket dagiti adalan intedda cadagiti adu a tao.

²⁰ Ket nanganda amin, ket nabsogda, ket inacupda dagiti pispisi a natda, sangapulo ket dua nga alat a napno.

²¹ Ket dagidi nangan aglimariboda a tattao, malacsid dagiti babai ken ubbing.

Ni Jesus magna iti rabaw ti baybay.

²² Ket dagus a ni Jesus pinilitna a sumrec dagiti adalanna iti barangay ket mapanda nga umun-una iti sabali a bangir di baybay bayat ti panamagawidna cadagiti adu a tao.

²³ Ket idi napagawidnan dagiti tattao immuli iti bantay a nagcarcararag a nagwaywayas: ket idi rumabii, adda idiay a maymaysa.

²⁴ Ngem daydi barangay idi addan iti tengnga ti baybay, sinabuasabuagan dagiti dal-luyon; ta ti angin sungat idi.

²⁵ Ket iti maicapat a panagbantay iti rabii, ni Jesus napan cadacuada a nagnagna iti rabaw ti baybay.

²⁶ Ket dagiti adalan, idi isu nakitada a magmagna iti rabaw ti baybay, naglagawda a cunada: Alalia daytoy; ket gapu iti buteng nagickisda.

²⁷ Ngem ni Jesus dagus a kinasaona ida a cuncunana: Agtalgedcayo; siac; dicay agbuteng.

²⁸ Ket ni Pedro simmungbat kencuana, ket kinunana: Apo, no sica ngarud, ibilinmo nga umayac kenca a magna iti rabaw dagiti danum.

²⁹ Ket kinunana: Umayca. Ket dimsaag ni Pedro idi barangay, ket nagna iti rabaw dagiti danum a mapan ken Jesus.

³⁰ Ngem idi nakitana ti angin, nagbuteng; ket idi mangrugi a lumned, nagickis a cunana: Apo, isalacannac.

³¹ Ket dagus a ni Jesus, inunnatna ti imana, ken iniggananna ket kinunana kencuana: O sica a bassit ti pammatina. Apayapay nagduaduaca?

³² Ket idi simrecda idi barangay, nagtalna ti angin.

³³ Ket dagidi adda idi barangay, nagdaydayawda Kencuana a cuncunada: Kinapudnona a sica ti Anac ti Dios.

³⁴ Ket idi nacabal-lasiwda iti sabali a bangir, immayda iti daga a Genezaret.

³⁵ Ket idi isu naammoan dagiti tao iti daydi a disso, nagbaonda cadagiti amin a beddeng iti aglawlaw, ket inyegda kencuana dagiti amin a masacsakit;

³⁶ Ket dinawatda kencuana a masaggidda coma laeng ti uray pingir di cagayna; ket isu-amin dagidi nangsagid, napaimbagda.