San Mateo 13 - Ti Biblia (1973)

Pangngarig ti agmulmula.

¹ Ket daydi nga aldaw, rimmuar ni Jesus iti balay, ket nagtugaw iti dinna ti baybay.

² Ket dagiti umariwecwec a tattao immayda nagaaribongbong kencuana gapuna a simrec iti barangay, ket nagtugaw; ket amin dagiti adu a tattao nagtacderda iti igid.

³ Ket kinasaona ida cadagiti adu a banbanag cadagiti pangngarig a cuncunana: Adtoy, ti agmulmula rimmuar nga agmula:

⁴ Ket idi a nagmula, dagiti dadduma a bukel nagdissoda iti dinna ti dalan; ket dagiti tumatayab immayda ket kinnanda.

⁵ Ket dagiti dadduma nagdissoda cadagiti cabatoan, nga awan ti adu a dagana; ket timmuboda a nadaras, ta awan ti nauneg a dagana;

⁶ Ngem idi nacatangcayagen ti init, nalaylayda; ket nagangoda, ta awan ti ramutda.

⁷ Ket dagiti dadduma nagdissoda cadagiti casisiitan ket dagidi sisiit dimmackelda ket lineppesda ida.

⁸ Ket dagiti dadduma nagdissoda iti nasayaat a daga, ket nangtedda ti bunga: dagiti dadduma, sangsangagasut, dagiti dadduma sagninem a pulo, ket dagiti dadduma saggatlo pulo.

⁹ Ti adda lapayagna a pagdengngeg, dumngeg coma.

¹⁰ Idi, dagiti adalan immayda ket kinunada kencuana: Apayapay casaom ida cadagiti pangngarig?

¹¹ Ket isu simmungbat, ket kinunana cadacuada: Ta cadacayo naited ti panangammo cadagiti palimed ti pagarian ti langit; ngem cadacuada saan a maited.

¹² Ta uray siasino nga addaan, maiccanto pay, ket addaanto ti nawadwad; ngem siasinoman nga awanan, uray ti adda kencuana, maiccatto pay.

¹³ Gapuna casaoc ida cadagiti pangngarig, ta kitkitaenda, dida makita, ket dengdenggenda, dida mangngeg ken dida maawatan.

¹⁴ Ket matungpal cadacuada, ti padto ni Isaias a cunana: Iti panagdengdengngeg mangngegyonto, ket dicayto maawatan; Ket iti panagkitkita makitayonto ket dicayto mailasin.

¹⁵ Ta ti puso daytoy nga umili nabibineg; Ket cadagiti pagdengngegda, napatuleng, Ket inkiremda dagiti matada: Di la ket ta macakitada cadagiti matada, Ken macangngeg cadagiti lapayagda, Ken macaawat cadagiti pusoda, Ken agbabawida Ket siac paimbagec ida.

¹⁶ Ngem nagasat dagiti matayo, ta macakitada; ken dagiti lapayagyo, ta macangngegda.

¹⁷ Ta pudno cunac cadacayo nga adu dagiti mammadto ken nalinteg a tinarigagayanda a kitaen dagiti makitayo, ket dida nakita ida; ken denggen dagiti mangngegyo ket idda nangngeg ida.

¹⁸ Denggenyo, ngarud, ti pangngarig ti agmulmula.

¹⁹ No uray siasino a macangngeg ti sao a maipapan iti pagarian ket dina maawatan, umay ti dakes, ket parutenna ti naimula iti pusona: daytoy ti naimula iti dinna ti dalan.

²⁰ Ket ti naimula cadagiti cabatoan, isu daytoy ti macangngeg ti sao, ket dagus nga awatenna a siraragsac;

²¹ Ngem saan a nacaramut ket di agbayag: ket no umay ti rigat wenno ti pannacaidadanes gapu iti sao, dagus a maitibcol.

²² Ket ti naimula iti casisiitan, isu daytoy ti dumngeg iti sao; ngem ti agawa itoy a lubong, ken ti panangal-lilaw dagiti kinabacnang leppesenda ti sao, ket saan a macapagbunga.

²³ Ngem ti naimula iti nasayaat a daga, isu daytoy ti dumngeg iti sao, ket maawatanna isu a mangted ti bunga, ket agbunga dagiti dadduma sagsangagasut, ket dagiti dadduma sagninem a pulo, ket dagiti dadduma saggatlo pulo.

Pangngarig dagiti zizana.

²⁴ Sabali a pangngarig ti impalawagna cadacuada, a cunana; Ti pagarian ti langit umasping iti maysa a tao a nagmula ti nasayaat a bukel iti talonna;

²⁵ Ngem idi matmaturog dagiti tao, immay ti cabusorna, ket nagmula met cadagiti zizana iti nagbabaetan dagiti trigo, sa pimmanaw.

²⁶ Ngem idi timmubo ti mula ken nagbunga, nagparang metten dagiti zizana.

²⁷ Ket immay dagiti adipen di ama ti sangcabalayan, ket kinunada kencuana: Apo Dica, aya nagmula ti nasayaat a bukel idiay talonmo? Adino ngarud ti naggapuan dagiti zizana?

²⁸ Ket kinunana cadacuada: Maysa a cabusor ti nangaramid iti daytoy. Ket dagiti adipen cunada kencuana: Cayatmo, ngarud, nga incami ket urnongenmi ida?

²⁹ Ngem, cunana: Saan; di la ket ta inton urnongenyo dagiti zizana, maparutyo met a maicuyog cadacuada dagiti trigo.

³⁰ Bay-anyo a dumackelda amin agingga iti panagani; ket intono tiempo ti panagani, ibagacto cadagiti agani: urnongenyo nga umuna dagiti zizana, ket reppetenyo ida a mapungpungo ta puuranyo ida; ngem idulinyo dagiti trigo iti camaligco.

Pangpangngarig ti bukel ti mostaza ken ti levadura.

³¹ Sabali a pangngarig ti imparangna cadacuada, a cuncunana: Ti pagarian ti langit maipadis iti bukel ti mostaza, nga innala ti maysa a tao ket immulana iti bangcagna:

³² Isu a pudno ti cababassitan cadagiti amin a bukel; ngem no dimmackelen, isu ti cadadackelan cadagiti natnateng, ket agbalin a cayo, nga dagiti tumatayab iti tangatang umayda ket umaponda cadagiti sangsangana.

³³ Sabali a pangngarig ti insaona cadacuada: Ti pagarian ti langit maipadis iti levadura nga innala ti maysa a babai, ket inlaocna iti tal-lo a salop nga harina, agingga iti isu-amin immalsa.

³⁴ Amin dagitoy insao ni Jesus cadagiti pangngarig cadagiti adu a tattao, ket saanna a casao ida idi no di biig a pangngarig:

³⁵ Tapno matungpal idi iti sinao ti mammadto a cuncunana: Luctacto ti ngiwatco cadagiti pangngarig; Ipalawagconto dagiti banag a nailemmeng nanipud idi pannacabangon ti lubong.

Pannacaipalawag di pangngarig dagiti zizana.

³⁶ Idin ni Jesus pinanawanna dagiti adu a tattao, ket simrec iti balay; ket immasideg kencuana dagidi adalanna, a cuncunada kencuana: Ipalawagmo cadacami ti pangngarig dagiti zizana ti talon.

³⁷ Ket isu simmungbat, ket kinunana cadacuada: Ti agmula cadagiti nasayaat a bukel, isu ti Anac ti tao;

³⁸ Ket ti talon isu ti lubong; ket dagiti nasayaat a bukel isuda dagiti annac ti pagarian, dagiti zizana isuda dagiti ti annac ti dakes;

³⁹ Ket ti cabusor a nangimula cadagitoy, isu ti diablo: ket ti panagani isu ti panungpalan ti lubong; ket dagiti agani isuda dagiti angel.

⁴⁰ No casano ti pannacaala dagiti zizana ken ti pannacaipuurda iti apuy, castanto intono panungpalan ti lubong.

⁴¹ Ti Annac ti tao ibaonnanto dagiti angelna, ket cayascasendanto iti pagarianna, dagiti amin a pacaitibcolan ken dagiti agaramid ti kinadakes.

⁴² Ket isungroddanto ida ti horno ti apuy: idiay addanto dagiti sangsangit ken ngarngaretnget dagiti ngipen.

⁴³ Ket maigiddato a dagiti nalinteg agraniagdanton a cas la ti init iti pagarian ni Amada: ti addaan laplapayagna a pagdengngeg, dumngeg coma.

Pangpangngarig ti kinabacnang a naicali; ti perlas ken iket.

⁴⁴ Ti pagarian ti langit maipadis iti maysa a gameng a nailemmeng iti talon; isu a nasaracan ti maysa a tao, ket inlimedna, ket iti ragsacna gapu iti daytoy, mapan ket ilacona ti amin nga adda kencuana ket gatangenna daydiay a talon.

⁴⁵ Casta met, ti pagarian ti langit maipadis iti maysa a tao nga agtagtagilaco nga agsapsapul cadagiti nasayaat a perlas;

⁴⁶ Isu, nga idi nacasarac ti maysa a napateg unay a perlas, napan ket inlacona ti amin nga adda kencuana, ket isu ti ginatangna.

⁴⁷ Casta met, ti pagarian ti langit maipadis iti maysa nga iket, a naiwayat iti baybay, nagala cadagiti amin a kita:

⁴⁸ Nga idi a napnon impaigiddan; ket nagtugawda, ket inurnongda dagiti nasayaat cadagiti cayiabang, ket dagiti dakes imbel-lengda iti ruar.

⁴⁹ Castanto intono panungpalan ti lubong: rummuarto dagiti angel, ket ilasindanto dagiti dakes cadagiti nalinteg.

⁵⁰ Ket ipuruacdanto ida iti horno ti apuy: idiay addanto dagiti sangsangit ken ngarngaretnget dagiti ngipen.

⁵¹ Naawatanyo amin dagitoy a banag? simmungbatda kencuana: Wen Apo.

⁵² Ket kinunana cadacuada: Gapuna amin nga escriba a napagbalin nga adalan iti pagarian ti langit maipadis iti maysa nga ama ti sangcacabbalayan nga agala iti paggamenganna cadagiti banag a babbaro ken cadagiti banag a daan.

Ni Jesus maumsi idiay Nazaret.

⁵³ Ket naaramid nga idi ni Jesus nalpasna dagitoy a pangngarig, pimmanaw sadiay.

⁵⁴ Ket immay iti ilina, nanursuro cadacuada iti sinagogada, iti casta nasnasdaawda unay ket kinunada: Adino ti nangalaan daytoy a tao itoy a kinasirib ken cadagitoy a pannacabalin a datdatlag?

⁵⁵ Saan nga isu daytoy ti anac daydi al-lawagi? Saan a managan ni inana ti Maria ket dagiti cacabsatna Santiago, ken Jose, ken Simon, ken Judas?

⁵⁶ Ket saan nga addada amin cadatayo dagiti cacabsatna a babai? Adino ngarud ti nangalaan daytoy a tao cadagitoy amin a banbanag?

⁵⁷ Ket nacalucsawda kencuana: Ngem ni Jesus kinunana cadacuada: Awan ti mammadto nga awanan dayawna no di laeng idiay ilina ken idiay balayna.

⁵⁸ Ket saan a nagaramid sadiay cadagiti adu a datdatlag a maipoon iti kinaawan pammatida.