San Mateo 12 - Ti Biblia (1973)

Ni Jesus Apo ti Sabado.

¹ Iti daydi a tiempo limmabas ni Jesus iti aldaw a panaginana cadagiti catrigoan, ket dagiti adalanna idi a nagbisinda, nangrugida a nagala ken nangan cadagiti dawa ti trigo.

² Ngem idi nakita daytoy dagiti Fariseo, kinunada kencuana: Kitaem, dagiti adalam aramidenda ti saan a maipalubos nga aramiden iti aldaw a panaginana.

³ Ngem isu kinunana cadacuada: Saanyo a nabasa aya ti inaramid ni David, idi nagbisin, isu ken dagiti naicuyog kencuana:

⁴ No casano ti iseserrecna iti balay ti Dios, ket kinnanna dagiti tinapay a sidadaya iti altar a saan a maipalubos kencuana a canen ket casta met cadagiti naicuyog kencuana, no di cadagiti sacerdote laeng?

⁵ Wenno, Dicay aya nabasa iti linteg, a cadagiti aldaw a panaginana, dagiti sacerdote iti Templo saanda a ngilinen ti aldaw a panaginana ket dida macabasol?

⁶ Ngem siac cunac cadacayo a ditoy adda maysa a dacdackel ngem iti Templo,

⁷ Ngem no maammoanyo coma no ania ti cayatna a saoen daytoy: “Asi ti calicagumac ket saan a daton,” saanyo coma a dusaen dagiti awan basolda.

⁸ Ta ti Anac ti tao isu ti Apo ti aldaw a panaginana,

Pannacaagas ti tao nga adda imana a nagango.

⁹ Ket pimmanaw sadiay ket simrec iti sinagogada;

¹⁰ Ket adtoy idi ti maysa a tao nga adda imana a nagango. Ket inintuudda kencuana, a cuncunada: Maipalubos ti mangagas iti aldaw a panaginana? Tapno adda pangipulonganda kencuana.

¹¹ Ngem isu kinunana cadacuada. Asino ngata ti tao nga adda cadacayo, nga adda maysa a carnerona, ket no daytoy matnag coma iti maysa nga abut iti aldaw a panaginana, saanna aya nga iggaman ken aonen?

¹² Ket, Saan aya a napatpateg ti maysa a tao ngem iti maysa a carnero? Gapuna, maipalubos cadagiti aldaw a panaginana ti panagaramid ti naimbag.

¹³ Idin kinunana idi tao: Unnatem ta iman. Ket isu inunnatna, ket nagbalin a nasalun-at a cas idi sabali nga imana.

¹⁴ Ngem rimmuar dagiti Fariseo ket ninumoda ti maibusor kencuana, no casano coma ti pannacabalinda a pamucaw kencuana.

¹⁵ Ngem idinto a nadlawan ni Jesus, immadayu sadiay; ket simmurotda kencuana dagiti adu a tattao, ket inagasanna ida amin.

¹⁶ Ket imbilinna cadacuada nga isu dida coma ipadlaw,

¹⁷ Tapno matungpal coma ti sinao ni mammadto nga Isaias, a cuncunana:

¹⁸ Adtoy ti adipec isu a pinilic, Ti dungdungngoec, a pacaayaywan unay toy cararuac, Icabilconto kencuana ti Espirituc, Ket cadagiti Gentil ipacaammonanto ti kinalinteg.

¹⁹ Saanto a makisusec ket dinto met agickis, Ket awanto met ti macangngeg ti timecna cadagiti plaza.

²⁰ Ti runo a naparpar dinanto tuccolen, Ket ti micha nga umas-asuc dinanto iddepen. Agingga ti mapagbal-ligina ti kinalinteg,

²¹ Ket iti naganna panginanamaanto dagiti Gentil.

Ti tabbaaw dagiti Fariseo.

²² Idin inyegda kencuana ti maysa a nagun-gan ti sairo a bulsec ken umel; ket isu pinaimbagna ket nagbanaganna a daydi umel nacapagsao ken nacakita.

²³ Ket isu-amin dagiti adu a tattao nagmalmalangada, ket kinunada: Mabalin ngata nga isu daytoy ti Anac ni David?

²⁴ Ngem dagiti Fariseo, idi mangngegda daytoy, kinunada: Daytoy saanna a paruaren dagiti sairo, no di gapu ken Beelzebub, a pangulo dagiti sairo.

²⁵ Ni Jesus idinto a naammoanna dagiti panunotda kinunana cadacuada: Amin a pagarian a mabingaybingay a maibusor met la kencuana, marbec; ket isu-amin nga ili wenno balay a malasinlasin iti maibusor met la kencuana, dinto mataginayon.

²⁶ Ket no ni Satanas, paruarenna ni Satanas, malasinlasin iti maibusor met la kencuana: Casano ngarud, ti pannacataginayonto ti pagariana?

²⁷ Ket no siac gapu ken Beelzebub paruarec dagiti sairo, asino ti akinpannacabalin ti panamaruar dagiti annacyo cadagiti sairo? Isuda ngarud ti mangocom cadacayo.

²⁸ Ngem no gapu iti Espiritu ti Dios paruarec dagiti sairo, pudno a dimtengen cadacayo ti pagarian ti Dios.

²⁹ Wenno. Casano ti pannacabalin ti maysa a sumrec iti balay ti maingel, ken mangrabsut cadagiti gargaretna no dina umuna a reppeten ti maingel ket calpasanna ikisapnanto ti balayna?

³⁰ Ti saan a makicaddua caniac, isu ti bumusor caniac; ket ti saan a makipagornong caniac agiwara.

³¹ Gapuna, cunac cadacayo: Amin a kita ti basol ken tabbaaw, mapacawanto cadagiti tao; ngem ti tabbaaw a maibusor iti Espiritu, saanto a mapacawan.

³² Ket uray siasino nga agsao iti maibusor iti Anac ti tao, mapacawanto kencuana; ngem uray siasino nga agsaonto ti maibusor iti Espiritu Santo, saan a mapacawanto kencuana, uray itoy a biag, uray iti biag a mapasungad.

Caycayo ken bungbunga.

³³ Uray aramidenyo ti cayo a nasayaat, ket ti bungana nasayaat; wenno aramidenyo iti cayo a dakes, ket ti bungana dakes; ta gapu iti bungana mailasin ti cayo.

³⁴ Dacayo caputotan dagiti carasaen. Casano ti pannacabalinyo nga agsao cadagiti banag a naimbag, idinto a dakescayo? Ta ti naruay iti puso isu ti saoen ti ngiwat.

³⁵ Ti tao a naimbag, iti nasayaat a gupitna iruarna dagiti naimbag a banag; ket ti tao a dakes, iti dakes a gupitna iruarna dagiti dakes a banag.

³⁶ Ket cunac cadacayo, nga amin a sao nga awan capapaayanna a saoento dagiti tao, isu ti sungbatandanto iti aldaw ti pannacaocom.

³⁷ Ta gapu cadagiti saom maibilangcanto a nalinteg ket gapu cadagiti saom maibilangcanto a dakes.

Ti pagilasinan ni Jesus.

³⁸ Idin dadduma cadagiti escriba ken Fariseo, simmungbatda kencuana a cuncunada: Mannursuro, cayatmi a makita ti maysa a pagilasinan nga aggapu kenca.

³⁹ Ngem isu simmungbat, ket kinunana cadacuada: Ti maysa a caputotan a dakes ken mannakiabig dumawat ti maysa a pagilasinan; ngem awanto ti pagilasinan a maited kencuana, no di ti pagilasinan ni Jonas a mammadto.

⁴⁰ Ta no casano ti panaggian ni Jonas iti tian ti ballena iti tal-lo nga aldaw ken tal-lo a rabii, casta ti panaggianto ti Anac ti tao iti puso ti daga iti tal-lo nga aldaw ken tal-lo a rabii.

⁴¹ Dagiti tattao sadi Ninive tumacderdanto iti panangocom a maigiddan iti daytoy a caputotan, ket isu pabasolendanto; ta isuda nagbabawida iti panangascasaba ni Jonas; ket adda ditoy ti maysa a nangnangrona ngem ni Jonas.

⁴² Ti Reina iti Abagatan tumacderto iti panangocom itoy a caputotan, ket isu pabasolennanto; ta isu immay nanipud cadagiti ungto ti daga tapno agdengngeg iti kinasirib ni Salomon: ket adda ditoy ti maysa a nangnangrona ngem ni Salomon,

⁴³ Ngem ti espiritu a narugit no rimmuaren iti tao, magna cadagiti disso a namaga, nga agsapsapul ti inana, ket dina masaracan.

⁴⁴ Iti casta cunana: Agsubliacto iti balayco a rinuarac; ket intono umay, masaracanna nga awan naggian, nasagadan ken natarimaan.

⁴⁵ Iti casta mapan ket mangala ti icuyugna a sabali a pito nga espiritu a dacdakes ngem isu, ket sumbrecda ken agbalayda sadiay; ket rumsua a dacdakes ti camaudianan a casasaad daydiay a tao ngem iti immuna: casta met ti maaramidto itoy dakes a caputotan.

Dagiti cacabsat ken ina ni Jesus.

⁴⁶ Ket isu idi madama pay laeng nga agsasao cadagiti adu a tao, adtoy, ni inana ken dagiti cacabsatna addada a sitatacder iti ruar, a tarigagayanda ti pannakisao kencuana.

⁴⁷ Ket ti maysa kinunana kencuana: Adtoy, na inam ken dagiti cacabsatmo addada idiay ruar, a tarigagayanda ti pannakisao kenca.

⁴⁸ Ngem isu simmungbat idi nagsao kencuana, ket kinunana: Asino ti inac ken siasinoda dagiti cacabsatco?

⁴⁹ Ket intudona dagiti adalanna, ket kinunana: Adtoy ni inac ken dagiti cacabsatco!

⁵⁰ Ta siasinoman a mangaramidto iti pagayatan ni Amac, nga adda sadi langit, isu dayta ti cabsatco a lalaki ken babai, ken inac.