San Mateo 11 - Ti Biblia (1973)

Dagiti imbaon ni Juan a Bautista.

¹ Ket napasamac nga idi nalpas ni Jesus ti nagbilbilin cadagiti sangapulo ket dua nga adalanna, pimmanaw sadiay tapno mangisursuro ken mangascasaba cadagiti il-ilida.

² Ket idi mangngeg ni Juan idiay pagbaludan dagiti aramid ni Cristo, nangibaon kencuana cadagiti adalanna,

³ A kinunana kencuana: Sica daydi umay wenno urayenmi ti sabali?

⁴ Ket simmungbat ni Jesus, ket kinunana cadacuada: Incayo ket saritaenyo ken Juan dagiti banbanag a mangngeg ken makitayo:

⁵ Dagiti bulsec macakitada ket dagiti pilay magnada: dagiti agcucutel madalusanda, ket dagiti tuleng macangngegda; dagiti natay mapagungarda, ket dagiti napanglaw macascasabaanda iti naimbag a damag.

⁶ Ket nagasat ti siasinoman a dinto macasarac caniac ti pacaitibcolan.

⁷ Ket idi pumampanaw dagitoy, nangrugi, ni Jesus a nagsao cadagiti adu a tattao ti maipapan ken Juan: Ania ti rinuarenyo idi a kitaen idiay let-ang? Maysa a cawayan a ginargaraw ti angin?

⁸ Ngem ania ti rinuaranyo a kinita? Maysa a tao a nacawesan ti nalibnos a pagan-anay? Adtoy, dagiti agcawcawes cadagiti nalibnos a pagan-anay addada cadagiti balbalay dagiti ar-ari.

⁹ Ngem. Ania ti rinuaranyo? Cumita iti maysa a mammadto? Wen, cunac cadacayo, ket nangnangrona pay ngem mammadto.

¹⁰ Daytoy isu ti nacaisuratan daydi: Adtoy, siac ibaonco ti babaonec iti sangoanam Isu a mangisagananto ti dalanmo iti sacbaymo.

¹¹ Pudno cunac cadacayo, awan ti timmacder cadagiti nayanac cadagiti babbai, ti sabali a dacdackel ngem ni Juan a Bautista; ngem ti cababassitan unay iti pagarian ti langit, dacdackel ngem isu.

¹² Nanipud cadagiti aldaw ni Juan a Bautista agingga ita, ti pagarian ti langit magunodan babaen iti nainget a pigsa, ket dagiti napinget ti macagunod kencuana.

¹³ Ta amin dagiti mammadto ken ti linteg nagipadtoda nga agpatingga ken Juan.

¹⁴ Ket no cayatyo nga awaten, daytoy isu daydi Elias nga umayto.

¹⁵ Ti adda lapayagna a pagdengngeg, dumngeg coma.

¹⁶ Ngem. Siasino ti pangipadisac iti daytoy a caputotan? Isu maipadis cadagiti ubbing nga agtugtugaw cadagiti plaza, ket ic-ickisanda dagiti cacaduada,

¹⁷ Ken cunada: Tinocarandacayo ti flauta ket dicayo nagsala; indungawandacayo ket dicay nagladingit.

¹⁸ Ta immay ni Juan, a di mangan ken di met uminum idi, ket cunada: Adda sairona.

¹⁹ Immay toy Anac ti tao, a mangan ken uminum, ket cunada: Adtoy ti maysa a tao a mannangan ken managinum ti arac, pagayam dagiti agsingsingir ti buis ken dagiti managbasol. Ngem ti kinasirib mapanecnecan gapu cadagiti gapuananna.

Dagiti tal-lo a ciudad a saan a nagbabawi.

²⁰ Idin rinugianna nga binabalaw dagiti ciudad a nacaaramidan dagiti adu unay cadagiti datdatlagna, agsipud ta dida nagbabawi, a cunana:

²¹ Asica pay, Corazin! Asica pay, Betsaida! ta no idiay Tiro ken Sidon naaramidda coma dagiti datdatlag a naaramid cadacayo nagbabawida coma a nabayagen iti cilicio ken dapo.

²² Ngem cunac cadacayo, a nalaglag-anto ti dusa ti Tiro ken Sidon iti aldaw ti pannacaocom, ngem cadacayo.

²³ Ket sica, Capernaum maitantanoccanto aya agingga sadi langit? Maipababacanto agingga iti Hades; ta no cadagiti taga Sodoma naaramid coma dagiti datdatlag a naaramid kenca, nataginayon coma agingga ita nga aldaw.

²⁴ Nupay casta cunac cadacayo, nalaglag-anto pay laeng ti dusa iti daga ti Sodoma, ngem iti maipaay kenca iti aldaw ti pannacaocom.

Ti awit ti Cristo.

²⁵ Iti daydi a tiempo ni Jesus immawag ket kinunana: Daydayawenca O Ama, Apo ti langit ken daga ta inlemmengmo dagitoy a banag cadagiti mamasirib ken mannacaawat, ket impaltiingmo ida cadagiti ububbing:

²⁶ Wen, Ama, ta casta ti nacaayayo cadagiti matam.

²⁷ Amin dagiti banag inyawat caniac ni Amac; ket awan ti macaamammo iti Anac no saan a ti Ama; ket awan met ti macaamammo iti Ama, no saan a ti Anac, ken daydiay cayat a pangipaltiinganto ti Anac.

²⁸ Umaycayo caniac dacayo amin nga agrigrigat ken madagdagsenan, ta paginanaencayto.

²⁹ Alaenyo ti sangolco cadacayo, ket agsursurocayo caniac, ta siac naemmaac ken napacumbabaac iti panagpuspusoc; ket macasaraccayto ti inana a maipaay cadagiti cararuayo.

³⁰ Ta ti sangolco nalaca ken nalag-an ti awitco.