San Mateo 10 - Ti Biblia (1973)

Dagiti sangapulo ket dua ken ti nacaibaonanda.

¹ Ket idi nga inayabanna dagiti sangapulo ket dua nga adalanna, iniccanna ida ti pannacabalin cadagiti espiritu a narugit, tapno pagtalawenda ida, ket paimbagenda ti amin a kita ti sakit ken amin a kita ti anannayen.

² Ket dagiti nagan dagiti sangapulo ket dua nga apostol isu dagitoy: ti umuna, Simon, isu a managan Pedro, ken ni Andres a cabsatna; ni Santiago, anac ni Zebedeo, ken ni Juan a cabsatna;

³ Ni Felipe, ken ni Bartolome; ni Tomas ken ni Mateo nga agsingsingir ti buis; ni Santiago, nga anac ni Alfeo, ken ni Tadeo;

⁴ Ni Simon a naregta, ken ni Judas Iscariote isu met a nangyawat kencuana.

⁵ Dagitoy sangapulo ket dua imbaon ni Jesus idi nalpasna a binilbilin ida a cuncunana: Dicay mapan iti dalan dagiti Gentil ket dicay sumrec iti ili dagiti taga Samaria;

⁶ No di ket mapancayo nga umuna cadagiti carnero a napucaw iti balay ti Israel.

⁷ Ket no mapancayo, mangascasabacayo a cuncunayo: Ti pagarian ti langit dimtengen.

⁸ Paimbagenyo dagiti masacsakit, pagungarenyo dagiti natay dalusanyo dagiti agcucutel, paruarenyo dagiti sairo: ti inawatyo nga awan bayadna itedtyo nga awan bayadna.

⁹ Dicay agbalon ti balitoc, uray pirac, uray cobre cadagiti barikesyo;

¹⁰ Uray supot a maisagana iti dalan, uray dua a pagan-anay, uray zapatos, uray sarucod; ta ti mangmangged maicari iti taraonna.

¹¹ Ket uray sadino nga ili ken puroc a sercanyonto, birukenyo a nalaing idiay no asino ti maicari, ket agdaguscayo idiay agingga ti pumanawcayo.

¹² Ket no sumreccayo iti balay, agcablaawcayo.

¹³ Ket no ti balay maicari, ipaayyo coma kencuana ti talnayo; ngem no saan a maicari, ti talnayo yawidyo.

¹⁴ Ket waray siasino a saan nga umawatto cadacayo ken saan a dumngeg cadagiti saoyo, no pumampanawcayon iti daydiay a balay wenno ili pampagenyo ti tapoc dagiti sacsacayo.

¹⁵ Pudno cunac cadacayo, nalaglaganto ti daga ti Sodoma ken Gomorra iti aldaw ti pannacaocom, ngem iti daydiay nga ili.

¹⁶ Adtoy, siac ibaoncayo a cas la carnero iti tengnga dagiti lobo: naannadcayo ngarud a cas la cadagiti uleg ken nasingpetcayo a cas la cadagiti calapati.

¹⁷ Ket agaluadcayo cadagiti tattao, ta iyawatdacayto cadagiti pangocoman, ket cadagiti sinagogada saplitendacayto;

¹⁸ Ket maisaclangcayto pay cadagiti agturay ken ar-ari a maipoon caniac, ket agbalinto a pangpanecnec cadacuada ken cadagiti Gentil.

¹⁹ Ngem intono iyawatdacayo dicay agdanag no casano ti panagsaoyo wenno ania ti saoenyonto; ta iti dayta met la nga horas maitedto cadacayo no ania ti saoenyonto.

²⁰ Ta saan a dacayo dagiti agsao no saan ket a ti Espiritu ni Amayo ti agsao a mangaramat cadacayo.

²¹ Ket ti cabsat a lalaki iyawatnanto ni cabsatna a lalaki ken patay, ket ti ama, iti anacna; ket dagiti annac tumacderdanto a bumusor cadagiti dackelda, ket papapataydanto ida.

²² Ket caguradacayto dagiti amin a tao gapu iti naganco: ngem ti macaitured agingga iti panungpalan, isu ti maisalacanto.

²³ Ngem intono idadanesdacayo iti maysa nga ili pumanawcayo a mapan iti sabali: ta pudno cunac cadacayo a dicayto pay la napagna dagiti ciudad ti Israel, dimtengton ti Anac ti tao.

²⁴ Ti adalan saan a natantan-oc ngem iti manursuro kencuana, ken saan met a natantan-oc ti tagabu ngem ni apona.

²⁵ Naimbagen coma iti adalan no maipatas iti manursuro kencuana ket iti tagabu cas ken apona: no ti pangulo ti sangcabalayan ninaganda ti Satanas, Anianto ketdin cadagiti cabbalayna?

²⁶ Gapuna dicayo cabuteng ida ta awan ti naabbungan, a di maipanayagto ken nailemmeng, a di maammoanto.

²⁷ Ti ibagac cadacayo iti nalimed saoenyo iti nalatac ket ti mangngegyo iti arasaas, iwarragawagyo manipud cadagiti toctoc dagiti balay.

²⁸ Ket saanyo a pagbutngan dagiti mamapatay iti bagi, ngem ti cararua dida mabalin a papatayen; ngem pagbutnganyo ketdi daydiay macabalin a mangpukaw iti carurua ken iti bagi idiay infierno.

²⁹ Saan a malaco aya ti dua a billit tuleng iti maysa a centavo? Ket uray maysa cadacuada saan a matnag iti daga no saan nga ipalubos ni Amayo.

³⁰ Ket uray dagiti boocyo nabilangda amin.

³¹ Gapuna dicay agbuteng: ta napatpategcayo ngem cadagiti adu a billit tuleng.

³² Tunggal maysa ngarud, a mangipaduyacyac caniac iti sangoanan dagiti tao, isu ipaduyacyacconto met iti sangoanan ni Amac nga adda sadi langit.

³³ Ngem uray siasino nga aglicudto caniac iti sangoanan dagiti tao, isu paglicudacto met iti sangoanan ni Amac nga adda sadi langit.

³⁴ Dicayo pagarupen nga immayac a mangiwara ti talma iti rabaw ti daga: saanac nga immay mangiwara ti talna, no di ket campilan.

³⁵ Ta immayac a mamagsupadi ti anac a lalaki iti amana, ken ti anac a babai iti inana, ken ti manugang a babai iti catuganganna a babai;

³⁶ Ket dagiti cabusor ti tao isudanto dagiti cabbalayna met laeng.

³⁷ Ti agayat iti ama wenno ina a nangnangrona ngem siac saan a maicari caniac; ket ti agayat iti anac a lalaki wenno babai a nangnangrona ngem siac saan a maicari caniac.

³⁸ Ket ti di mangibaclay ti cruzna ken sumurot caniac, saan a maicari caniac.

³⁹ Ti mangipangpangrona iti biagna, mapucawnanto; ket ti macapucaw iti biagna gapu caniac, masaracannanto.

⁴⁰ Ti umawat cadacayo, siac ti awatenna; ket ti umawat caniac awatenna ti nangibaon caniac.

⁴¹ Ti umawat ti maysa a mammadto iti nagan ti mamadto, umawatto ti gungunaen ti mammadto: ket ti umawat iti maysa a nalinteg iti nagan ti nalinteg, umawatto ti gungunaen ti nalinteg.

⁴² Ket uray siasino a mangpainumto iti maysa cadagitoy babassit nga ububbing iti sangavaso laeng a danum a nalamiis, iti nagan ti maysa nga adalan, pudno cunac cadacayo a dinanto mapucaw ti gungunana.