San Marcos 9 - Ti Biblia (1973)

¹ Ket kinunana met cadacuada; Pudno cunac cadacayo; nga adda dadduma cadagiti adda ditoy a didanto matay, agingga iti makitada ti pagarian ti Dios nga umay agraman pannacabalinna.

Ti panagbalbaliwna.

² Ket idi nalabes ti innem nga aldaw, ni Jesus incuyogna ni Pedro ken ni Santiago ken ni Juan ket impanna ida iti maysa a bantay a natayag, iti maysa a disso nga adayu; ket nagbalbaliw ti langana iti sangoananda;

³ Dagiti met pagananayna nagbalinda a naraniag, napudawda unay a cas iti nieve; nga awan ti uray siasino a managlava ditoy daga a macabalin a mamapudaw iti casdi.

⁴ Ket nagparang cadacuada ni Elias agraman ken Moises, nga addada a makisasao ken Jesus.

⁵ Ket idi bimmaet ni Pedro, cunana ken Jesus: Mannursuro, nasayaat nga agiantay ditoy ket agaramidcami ti tal-lo nga abong: maysa ti maipaay kenca, maysa ken Moises, ket maysa ken Elias.

⁶ Ta dina ammo idi ti rebbengna a saoen; ta addada a sibubuteng unay.

⁷ Ket immay ti maysa nga ulep a nangabongot cadacuada, ket naggapu iti ulep ti maysa a timec, a kinunana: Daytoy ti dungdungoec nga Anac: denggenyo.

⁸ Ket iti apagdaricmat, idi kimmitada iti lawlawda awan ti nakitadan no di ni Jesus a maymaysa a naicuyog cadacuada.

⁹ Ket idi madamada a bumaba idi bantay, imbilinna cadacuada a dida ibaga coma iti uray siasino ti nakitada, na di inton ti Anac ti tao nagungaren iti tengnga dagiti natay.

¹⁰ Ket tinandaananda daytoy a sao, a nagiintuud ti maysa ken maysa no ania ngata ti cayulugan daydi panagungar iti tengnga dagiti natay.

¹¹ Ket inintuudda kencuana a kinuna; Apayapay cuna dagiti escriba a ni Elias rebbengna ti umay nga umun-una?

¹² Ket kinunana cadacuada: Pudno a ni Elias umay nga umuna, ket isublina amin: ket casano ti pannacaisurat ti maipapan itoy Anac ti tao nga agsagaba coma cadagiti adu a banag, ket mauyuyawto?

¹³ Ngem cunac cadacayo a ni Elias immayen, ket inaramidda kencuana ti amin a kinaycayatda, cas adda a naisurat maipapan kencuana.

Ti baro a bulanbulanen.

¹⁴ Ket idi dimtengda iti yan dagiti adalan, nakitada ti umariwecwec a tattao iti lawlawda, ken dagiti escriba a makisussusic cadacuada.

¹⁵ Ket amin dagiti adu unay a tattao, idi isu makitada, dagus a nagsiddaawda, ket timmarayda kencuana, ket kinablaawanda.

¹⁶ Ket inintuudna cadagiti escriba: Ania ti pakisusicanyo cadacuada?

¹⁷ Ket maysa cadagiti adu a tao, simmungbat kencuana: Mannursuro, inyegco kenca ti annacco nga adda espirituna nga umel:

¹⁸ Isu nga uray sadino a pangalaanna kencuana, itublacna; ket aglabutab ti ngiwatna ket agngaretnget dagiti ngipenna, ket maganggango: ket kinasaoc dagiti adalam tapno isu paruarenda coma; ket dida nabalin.

¹⁹ Ket isu sinungbatanna ida, a cunana: O caputotan a di mammati, agingga iti caano a makipagianac cadacayo? agingga iti caano nga iturturedcayto? iyegyo caniac.

²⁰ Ket inyegda kencuana: ket idi makitana, dagus a daydi sairo isu intublacna a nagcuyegyeg; ket naipasag iti daga, ket aggulgulagul, a mangiruar cadagiti labutab.

²¹ Ket inintuud ni Jesus idi amana: Casano ti cabayagen nga adda daytoy a maararamid kencuana? Ket kinunana kencuana: Nanipud idi kinaubingna.

²² Ket maminadu nga iduronna iti apuy ken cadagiti danum, tapno pucawenna; ngem no adda bassit pannacabalinmo: caasiannacami ket tulungannacami.

²³ Ni Jesus kinunana kencuana: No adda bassit pannacabalinmo! amin a banag mabalin cadagiti mammati.

²⁴ Dagus a daydi ama di bumaro nagickis ket kinunana a sisasangit: Mamatiac, tulungam ti curang ti pammatic.

²⁵ Idi ngarud makita ni Jesus nga adu a tao ti agdadarison, tinubngarna daydi espiritu a narugit a cuncunana kencuana: Sica espiritu nga umel ken tuleng, ibilinco kenca a rumuarca ket dica sumublin kencuana.

²⁶ Idin daydi espiritu nagickis, ket agcuycuyegyeg iti napalalo ket rimmuar: ket isu natda a cas la natay; iti casta a dagiti adadu kinunada: Natayen.

²⁷ Ngem ni Jesus iniggamanna iti imana, ket binangonna; ket isu timmacder.

²⁸ Ket idi simrec iti balay, dagiti adalanna inintuudda kencuana idi isisu; Apayapay saanmi a nabalinan a pinaruar?

²⁹ Ket kinunana cadacuada: Daytoy a kita saan a maparuar gapu iti aniaman, no di gapu iti panagcararag.

Ti cadackelan iti pagarian ti langit.

³⁰ Ket pimmanawda idiay, ket limmabasda idiay Galilea; ket dina kinayat a maammoan ti siasinoman.

³¹ Ket insursurona dagiti adalanna, a cuncunana cadacuada: Toy anac, ti tao mayawat cadagiti imima dagiti tao, ket papatayendanto; ket inton mapapatayen, iti maicatlo nga aldaw agungarto met laeng.

³² Ngem dida naawatan daytoy a sao; ket mabutengda a mangintuud kencuana.

³³ Ket dimtengda idiay Capernaum; ket idi adda iti balay, inintuudna cadacuada: Ania ti pagsususicanyo idiay dalan?

³⁴ Ngem dida naguni; ta iti dalan nagsususic ti maysa ken maysa no asino ti cadackelan.

³⁵ Ket nagtugaw, ket inayabanna dagiti sangapulo ket dua, ket kinunana cadacuada: No siasinoman ti agtarigagay nga isu ti umun-una, isunto ti maud-udi ken agserservi cadagiti isu-amin.

³⁶ Ket nangala ti maysa nga ubing, ket incabilna iti nagtengngaanda; ket idi nga inubbana cadagiti tactackiagna, kinunana cadacuada:

³⁷ Siasinoman nga umawatto a gapu iti naganco iti maysa cadagiti cacastoy nga ubbing, siac ti awatenna; ket ti umawat caniac, saan a siac ti awatenna, no di daydiay nangibaon caniac.

Ti saan a bumusor cadatayo, sumurot cadatayo. Dagiti pacasulisugan.

³⁸ Ket ni Juan kinuna na kencuana: Mannursuro, nacakitacami ti maysa a tao nga iti naganmo paruarenna dagiti sairo; ket imparitmi kencuana, ta dinatay suruten,

³⁹ Ngem ni Jesus kinunana: Dicay ipawil kencuana dayta; ta awan ti tao a macaaramid iti maysa a datdatlag gapu iti naganco, ket sa isaganadna ti agsao ti dakes caniac.

⁴⁰ Ta ti saan a bumusor cadatayo, umanamung cadatayo.

⁴¹ Ta siasinoman a mangtedto cadacayo ti inumen a sangavaso a danum agsipud ta taonacayo ni Cristo, pudno cunac cadacayo a dinanto mapucaw ti gonggonana.

⁴² Ket siasinoman a mangitibcolto iti maysa cadagitoy babassit nga ubbing a mamati caniac, nasaysayaat coma kencuana no maibattoon iti tengngeda ti maysa a dackel a bato a gilingan ken maitappuac coma iti baybay.

⁴³ No ti imam ti macaited kenca ti pacaitibcolam, putdem; ta nasaysayaat kenca ti sumrec a pawad iti biag, ngem iti adda dua nga imam ket mapanca idiay infierno, idiay apuy a di maiddep.

⁴⁴ Idiay a ti iggesna saan a matay, ket ti apuy saan a maiddep.

⁴⁵ Ket no ti sacam ti macaited kenca ti pacaitibcolam, putdem: ta nasaysayaat a sumrecca a pilay iti biag, ngem iti adda dua a sacam, ket maitappuacca idiay infierno:

⁴⁶ Idiay a ti iggesna saan a matay, ket ti apuy saan a maiddep.

⁴⁷ Ket no ti matam ti macaited kenca ti pacaitibcolam, suatem; ta nasaysayaat kenca ti sumrec idiay pagarian ti Dios a maymaysa ti matam ngem iti addaanca ti dua a mata, ket maitappuacca idiay infierno:

⁴⁸ Idiay a ti iggesna saan a matay, ket ti apuy saan a maiddep.

⁴⁹ Ta amin maasinanto iti apuy.

⁵⁰ Nasayaat ti asin; ngem no ti asin mapucawna ti apgadna anianto ti pangtemplayo kencuana? addaancayo coma ti asin, ken talna ti maysa ken maysa cadacayo.