San Marcos 8 - Ti Biblia (1973)

Maicadua nga yaadu dagiti tinapay.

¹ Cadagidi nga aldaw, idi adda manen umariwecwec a tattao, ket awan ti macanda, ni Jesus inayabanna dagidi adalanna, ket kinunana cadacuada.

² Maasianac cadagitoy adu unay a tattao, ta tallo nga aldawen nga addada caniac nga awan ti macanda.

³ Ket no pagawidec ida cadagiti balbalayda a dida pay mangan, agcapuydanto iti dalan, ta dagiti dadduma cadacuada naggapuda iti adayu,

⁴ Ket dagiti adalanna simmungbatda kencuana: Asino ti macabalin a mangbussog cadacuada iti tinapay ditoy maysa a let-ang?

⁵ Ket inintuudna cadacuada: Mano dagiti tinapay nga adda cadacayo? ket kinunada: Pito.

⁶ Idin imbilinna cadagiti adu a tatao nga agtugawda iti daga; ket innalana dagiti pito a tinapay, ket idi a nacapagyaman, pinispisina, ket intedna cadagiti adalanna, tapno isangoda cadacuada; ket incabilda ida iti sangoanan dagiti adu a tattao.

⁷ Adda met sumagmamano nga icanda a babassit; ket idi a binendicionanna ida, imbilinna nga icabilda met dagitoy iti sangoananda.

⁸ Nanganda ngarud, ket nabsogda; ket innalada dagiti pispisi a natda pito nga alat a napno.

⁹ Ket dagiti nangan aguppat a riboda; ket calpasanna pinagawidna ida.

¹⁰ Ket simrec dagus idi barangay agraman dagiti adalanna, ket napan cadagiti dagdaga ti Dalmanuta.

Ti levadora dagiti Fariseo.

¹¹ Ket rimmuar dagiti Fariseo ket rinugianda ti nakisusic kencuana a dawatenda iti biangna ti maysa a pagilasianan nga aggapu sadi langit; a pangsuutda.

¹² Ket isu nagasug a nasaem iti cararuana, ket cunana: Apayapay dumawat daytoy a caputotan ti maysa a pagilasinan? Pudno cunac cadacayo a dinto maiccan ti aniaman a pagilasinan daytoy a caputotan.

¹³ Ket pinanawanna ida ket idi a simrec manen idi barangay immalis iti sabali nga igid.

¹⁴ Ket nalipatanda ti nangala ti tinapay; ket awan cadacuada no di maymaysa a tinapay ti incuyogda idi barangay.

¹⁵ Ket ni Jesus imbilinna cadacuada a kinunana: Kitaenyo, agaluadcayo iti levadura dagiti Fariseo, ken iti levadura ni Herodes.

¹⁶ Ket pinanpanunot ti maysa ken maysa a cuncunada: Cunana daytoy ta awan ti tinapaytayo.

¹⁷ Ket idi madlawan ni Jesus, cunana cadacuada: Apayapay agpanpanunotcayo ti casta, gapu ta awan ti tinapayyo? Dicay ammo ken dicay maawat pay laeng? Adda pay laeng ti pusoyo a timmangken?

¹⁸ Idinto nga adda matayo, dicay macakita, ket idinto nga adda pagdengngegyo, dicay macangngeg? ket dicay malagip?

¹⁹ Idi pinispisic dagiti lima a tinapay cadagiti lima ribo, mano nga alat a napno dagiti pispisi nga inacupyo? Cunada kencuana: Sangapulo ket dua.

²⁰ Ken idi naiwaras dagiti pito cadagiti uppat a ribo, mano nga alat a napno dagiti pispisi nga inacupyo? Ket cunada kencuana: Pito.

²¹ Ket cunana cadacuada: Dicay maawatan pay laeng.

Pannacaagas ti maysa a bulsec idiay Betsaida.

²² Idi a dimtengda idiay Betsaida; iyegda kencuana ti maysa a bulsec a tao ket dawatenda kencuana nga isu sagidenna coma.

²³ Ket iniggamanna ti ima ti bulsec, ket innalana nga impan iti ruar di puroc; ket idi a tinupraanna dagiti matana ken impatayna dagiti imimana inintuudna kencuana: Macakitaca bassit?

²⁴ Ket isu intangadna dagiti matana, ket kinunana: Makitac dagiti tao, a casda la caycayo, a magmagna.

²⁵ Ket impatayna manen dagiti im-imana cadagiti matana ket inkitana manen ket naimbaganen ket makitanan idi a nalawag dagiti isu-amin.

²⁶ Ket ni Jesus pinagawidna iti balayna, a kinunana: Dica sumrec a pulos, idiay puroc, ket dica ibaga iti uray siasino.

Ti panangammo ni Pedro.

²⁷ Ket rimmuar ni Jesus agraman dagiti adalanna cadagiti purpuroc ti Cesarea ni Felipo. Ket iti dalan nagintuud cadagiti adalanna, a cuncunana cadacuada: Asinoac iti panagcuna dagiti tattao?

²⁸ Ket simmungbatda: ni Juan a Bautista; ket dagiti dadduma: Ni Elias; ket dagiti sabsabali: Maysa cadagiti mammadto.

²⁹ Ket cunana cadacuada: Ngem dacayo asinaoc iti panagcunayo? Ni Pedro, simmungbat, ket cunana kencuana: Sica ti Cristo.

³⁰ Ket imbilinna cadacuada iti nairut nga awan ti pangibaanda iti maipapan kencuana.

³¹ Ket rinugianna nga insursuro ida a masapul a ti Anac ti tao agsagaba cadagiti adu a banag, ket isu ipusay dagiti lallacay, ken dagiti turayen dagiti papadi, ken dagiti escriba, ket matay ken agungar inton malpas ti tal-lo nga aldaw.

³² Ket sinaona daytoy a dina inlimlimed. Ket ni Pedro, isu innalana ket rinugianna a binabalaw.

³³ Ngem isu, idi a simmango ket kinitana dagiti adalanna, inungtanna ni Pedro, a kinunana: Pumanawca ditoy sangoc, Satanas! ta dica agpanunot cadagiti banag a maipapan iti Dios, no di ket maipapan cadagiti tattao laeng.

Awiten ti cruz.

³⁴ Ket inayabanna dagiti adu a tao agraman dagidi adalanna, ket kinunana cadacuada: No sinoman a tao ti mayat a sumurot caniac paglicudanna coma ti bagina ket alaenna ti cruzna ket surutennac.

³⁵ Ta siasinoman nga agtarigagay coma a mangisalacanto iti biagna, mapucawnanto; ket siasinoman a macapucaw iti biagna gapu caniac ken iti evangelio, maisalacannanto.

³⁶ Ta ania ti malac-am ti tao iti pannacaalana iti amin a lubong, ket mapucawnamet ti biagna?

³⁷ Wenno, anianto ti ited ti maysa a tao a talali ti biagna?

³⁸ Ta siasinoman a mangibain caniac ken cadagiti saoc iti daytoy a caputotan a naabig ken managbasol, toy Anac ti tao ibainnanto met intono umay iti gloria ni Amana, agraman dagiti sasanto nga angelna.