San Marcos 6 - Ti Biblia (1973)

Ni Jesus maumsi idiay Nazaret.

¹ Ket pimmanaw sadiay, ket napan iti dagana; ket dagiti adalanna simmurotda kencuana.

² Ket idi dimteng ti aldaw a panaginana, rinugianna ti nangisuro idiay sinagoga; ket dagiti adu nga agdengdengngeg kencuana natdada a nagsiddaaw, a cuncunada; Adino ti nangalaan daytoy a tao cadagitoy a banag? ket ania a kinasirib ti naited kencuana? ken dagiti agcacadackel a pannacabalin a maaramid gapu cadagiti imimana?

³ Saan aya nga daytoy ti al-lawagi, nga anac ni Maria, cabsat ni Santiago, ken ni Jose, ken ni Judas ken ni Simon? ket awan aya cadatay ditoy dagiti cacabsatna a babbai? Ket malucsawda idi kencuana.

⁴ Ngem ni Jesus kinunana cadacuada: Ti mammadto saan a maawanan ti dayaw, no di idiay dagana met laeng, ken cadagiti cacabagianna ken idiay balayna.

⁵ Ket saanna a nabalin ti nagaramid ti datdatlag iti uray ania idiay, malacsid idi nga impatayna dagiti imimana cadagiti sumagmamano a masacsakit ket inagasanna ida.

⁶ Ket nasnasdaaw idi iti curang ti pammatida. Ket napan cadagiti purpuroc ti caparanget, a mangisursuro.

Pannacaibaon dagidi sangapulo ket dua

⁷ Ket inayabanna dagiti sangapulo ket dua, ket rinugianna ida nga imbaon a sagdudua: ket iniccanna ida ti pannacabalin cadagiti espiritu a narugit,

⁸ Ket imbilinna cadacuada a dida mangicuyog ti uray ania a balon iti dalan no di laeng maysa a sarucod; awan ti uray ania a supot, uray tinapay, uray pirac iti barikesda;

⁹ No di laeng agpal-lucada; ket di da agpagananay iti dua a cagay.

¹⁰ Ket kinunana cadacuada: Uray sadino a balay a sercanyo, aggiancay idiay agingga iti ipanawyo idiay a disso.

¹¹ Ket uray ania a disso a didanto umawatan ken dumngegan cadacayo, inton rumuarcayo idiay, pampagenyo ti tapoc nga adda cadagiti sacsacayo a pamanecnec iti maibusor cadacuada.

¹² Ket rimmuarda, ket incascasabada ti panagbabawi.

¹³ Ket pinaruarda dagiti adu a sairo, ket sinapsapoanda iti lana dagiti adu a masacsakit, ket pinaimbagda ida.

Ipapatay ni Juan a Bautista.

¹⁴ Ket idinto a nangngegan ni ari Herodes, dagitoy a banag ta ti nagan ni Jesus nagdinamagen; kinunana: Ni Juan a Bautista a nagungar cadagiti natay, ket gapu itoy, adda pannacabalinna nga agaramid cadagiti datdatlag.

¹⁵ Ngem dagiti dadduma kinunada: isu ni Elias. Ket kinuna dagiti sabsabali: maysa a mammadto, wenno cas maysa cadagiti mammadto.

¹⁶ Ngem idi nangngeg ni Herodes, kinunana: Isu ni Juan a pinutulac; isu nagungar.

¹⁷ Ta ni met la Herodes ti nagbaon ken nangpatiliw ken Juan, ket kinawaranna idiay pagbaludan a gapu ken Herodias, asawa ni Filipo a cabsatna, isu nga inasawana.

¹⁸ Ta ni Juan kinunana idi ken Herodes: Saan a nalinteg a cupicupam ti asawa ni cabsatmo.

¹⁹ Gapu itoy ni Herodias cagurana ket cayatna idi nga papatayen; ngem dina nabalin;

²⁰ Ta ni Herodes cabutengna idi ni Juan, ta ammona nga isu tao a nalinteg ken santo, ket isakitna; ket no denggenna idi, adu a banbanag ti gapuananna ket pagayayatanna a denggen.

²¹ Ngem idi nga immay ti maysa nga aldaw a pannacaipaayna, idi aldaw a panagcasangay ni Herodes nangted ti maysa a daya cadagiti natan-oc a tattaona ken cadagiti tribuno ken cadagiti cangronaan a tattao ti Galilea.

²² Ket idi simrec ti anac a babai ni Herodias ket nagsala, pinaayatna ni Herodes ken dagiti nakisango kencuana iti panganan; ket ti ari kinunana iti balasang: Dawatem caniac dagup ti cayatmo, ket itdecto kenca.

²³ Ket sinapataanna kencuana a kinunana: Isu-amin a dawatemto caniac, itdecto kenca, uray pay ti guddua ti pagariac.

²⁴ Ket isu rimmuar, ket kinunana ken inana: Ania ti dawatecto? Ket kinunana: Ti ulo ni Juan a Bautista.

²⁵ Ket simrec a dagus, nagparang a sidadaras iti ari, ket dinawatna a kinuna: Cayatco nga ita met laeng itedmo caniac iti pinggan ti ulo ni Juan a Bautista.

²⁶ Ket ti ari nagliday unay; ngem gapu cadagiti sapatana ken cadagiti adda a sisasango iti panganan dina kinayat a di inanamungan.

²⁷ Ket nangibaon a dagus ti maysa cadagiti guardiana ket pinaiyegna ti ulo ni Juan. Ket daytoy napan ket isu pinutulanna idiay pagbaludan;

²⁸ Ket inyegna daydi ulona iti maysa a pinggan, ket intedna idi balasang; ket daydi balasang intedna ken inana.

²⁹ Ket idi naammoan dagiti adalan ni Juan, napanda ket binagcatda ti bangcayna, ket incabilda iti maysa a tanem.

Umuna nga yaadu dagiti tinapay.

³⁰ Ket dagiti apostol nakiurnongda ken Jesus, ket nangtedda ti damag kencuana; iti dagup ti isu-amin nga inaramidda, ken ti insursuroda.

³¹ Ket kinunana cadacuada: Umaycayo a pumacni iti maysa a disso a let-ang ket aginanacay bassit. Ta adu dagiti umay ken agawid idi; ket awan a pulos ti tiempoda uray mangan laeng.

³² Napanda ngarud, a nagbarangay iti maysa a disso a let-ang ken naipalpalasin.

³³ Ngem nakitada ida a mapmapan, ket adu dagiti nacailasin cadacuada: ket nanipud cadagiti amin nga ilili timmabunoda idiay a nagnagnada ket dimtengda nga immun-una ngem isuda.

³⁴ Ket idi dimsaag ni Jesus, nakitana ti umariwecwec a tattao ket kinaasianna ida, ta casda la carnero nga awan pastorda: ket rinugianna a sinursuroan ida cadagiti adu a banag.

³⁵ Ngem idi malemen immasidegda kencuana dagiti adalanna, ket kinunada: Let-ang daytoy a disso ket malem unayen:

³⁶ Pagawidem ida ta mapanda cadagiti awaway ken purpuroc iti caparanget tapno gumatangda ti canenda.

³⁷ Ngem isu simmungbat, ket kinunana cadacuada: Iccanyo ida ti canen. Ket kinunada kencuana: Incamto aya gumatang ti tinapay a pateg ti dua gasut a denario ket itedmi nga ipacan cadacuada?

³⁸ Cunana cadacuada: Mano ti tinapay nga adda cadacayo? Incay kitaen. Ket idi maamoanda, kinunada: Lima, ken dua nga ican.

³⁹ Ket imbilinna cadacuada a pagtugawenda ida amin a sagtunggal bunggoy iti root a nalangto.

⁴⁰ Ket nagtugawda a naglalasin iti tunggal sagsangagasut, ken saglilima a pulo.

⁴¹ Ket innalana dagiti lima a tinapay ken dagiti dua nga ican, ket idi a timmangad iti langit binendicionanna; ket pinispisina dagiti tinapay, ket intedna cadagiti adalan tapno isangoda cadacuada: ket imbunongna dagiti dua nga ican cadacuada amin.

⁴² Ket nanganda amin, ket nabsogda.

⁴³ Ket innalada dagiti pispisi ti tinapay ken ican a tiddada, sangapulo ket dua nga alat a napno.

⁴⁴ Ket dagidi nangan cadagiti tinapay aglimariboda a lallaki.

Ni Jesus magna iti rabaw ti baybay.

⁴⁵ Ket dagus a pinastrecna dagiti adalanna iti barangay, ket bumallasiwda nga umun-una iti sabali a bangir idiay Betsaida, bayat a palpalubosanna dagiti tao.

⁴⁶ Ket idi napalubusanna ida, napan iti bantay tapno agcararag.

⁴⁷ Ket idi rabiin, daydi barangay addan iti tengnga ti baybay, ket isu maymaysa iti daga.

⁴⁸ Ket nakitana ida nga aggagaud a sibabannog, ta ti angin sumungat idi cadacuada. Ket idi asideg ti maicapat a panagbantay ti rabii, napan cadacuada, a nagnagna iti rabaw ti baybay; ket kinayatna idi a labasan ida;

⁴⁹ Ngem idi makitada a magmagna iti rabaw ti baybay, impagarupda nga isu maysa nga alalia; ket nagickisda;

⁵⁰ Ta isu nakitada amin idi ket naglagawda. Ngem ni Jesus dagus a nakisao, ket kinunana cadacuada: Agtaleccayo: siac met laeng; dicay agbuteng,

⁵¹ Ket immuli cadacuada iti barangay; ket nagtalna daydi angin, ket dimmegdeg ti siddaawda.

⁵² Ta dida pinanunot ti maipapan cadagiti tinapay; ta ti pusoda nasipnget.

⁵³ Ket idi a nacabal-lasiwda dimtengda idiay daga ti Genezaret, ket simmangladda.

⁵⁴ Ket idi dimsaagda iti barangay, dagus nga isu nailasin dagiti umili,

⁵⁵ Ket idi nga napagpagnada iti amin daydiay a daga rinugianda nga innala a silalangcapi dagiti masacsakit ket ipanda ida iti amin a disso, a pacangngeganda a yanna.

⁵⁶ Ket uray sadino a sercanna, cadagiti purpuroc wenno cadagiti ilili wenno cadagiti awaway icabilda idi dagiti masacsakit cadagiti calcalsada, ket carcararaganda tapno ipalubosna cadacuada a sagiden uray laeng ti pingir ti pagananayna: ket dagup dagiti simmagid kencuana, naagasanda.