San Marcos 5 - Ti Biblia (1973)

Ti taga Gergesa a nagun-gan ti sairo.

¹ Ket dimtengda iti sabali nga igid ti baybay, idiay daga dagiti taga Gergesa.

² Ket idi a dimsaag iti barangay, dagus nga immay simmabet kencuana nanipud cadagiti tanem ti maysa a tao nga addaan espiritu a narugit,

³ Isu nga agbalay cadagiti tanem, ket awan ti macabalin kencuana a mangibaod, uray pay cadagiti cawar;

⁴ Ta iti naminadu a panangibabaudda kencuana cadagiti grillos ken cawcawar; ket kinettana dagiti cawar, ket pineccana dagidi grillos: ket awan ti nacabael a mangpaamo kencuana.

⁵ Ket cancanayon, aldaw ken rabii, magmagna nga agic-ickis cadagiti banbantay ken cadagiti tantanem, ket dunorenna ti bagina cadagiti bato,

⁶ Ket idi nakitana ni Jesus iti adayu, timmaray ket nagdayaw kencuana;

⁷ Ket idi a nagickis iti dackel a timec, cunana: Ania ti pacaibiangac kenca, Jesus, Anac ti Dios a Cangatoan unay? Dawatec kenca gapu iti Dios a dinac parigaten.

⁸ Ta kinunana kencuana: Pumanawca itoy a tao, espiritu a narugit.

⁹ Ket inintuudna kencuana: Ania ti naganmo? Ket kinunana kencuana: Sangarbaanan ti naganco; ta aducami.

¹⁰ Ket nagdawdawat unay kencuana a dina coma ida ibaon iti ruar daydiay a daga.

¹¹ Ket adda idiay iti arisadsad daydi bantay ti maysa a dackel nga arban ti babuy nga agararab.

¹² Ket dagidi sairo nagdawatda kencuana a kinunada: Ibaonnacami cadagiti babuy tapno sumreccam cadacuada.

¹³ Ket impalubosna cadacuada. Ket idi rimmuar dagiti espiritu a narugit, simrecda cadagiti babuy; ket daydi arban timmappuacda a sidadarasudos iti maysa a teppang iti baybay; agduariboda idi ket nalmesda iti baybay.

¹⁴ Ket dagiti agtartaraken cadacuada, nagtarayda ket sinaritada iti ili ken cadagiti awaway, Ket rimmuar dagiti tao tapno kitaenda no ania daydi a naaramid.

¹⁵ Ket idi dimtengda ken Jesus nakitada daydi nagun-gan dagiti sairo a situtugawen, sipapagananay ken simamanakem, wen daydi adda sangarbaananna idi, ket nagbutengda.

¹⁶ Ket dagiti nacakita sinaritada cadacuada no ania ti napasamac idi nagun-gan dagiti sairo ken cadagidi babuy.

¹⁷ Ket rinugianda ti nagdawdawat kencuana a pumanaw coma cadagiti beddengda.

¹⁸ Ket idi sumrec idi barangay daydi nagun-gan dagiti sairo idi, nagdawat a makipagian cama kencuana.

¹⁹ Ngem ni Jesus dina inanamungan, no di ket kinunana kencuana: Inca idiay balaymo, cadagiti cacabagiam, ket ibagam cadacuada a nagdadackel a banag ti inaramid ti Apo ken ti pinangngaasina kenca.

²⁰ Ket isu napan ket rinugianna, nga inwarragawag idiay Decapolis dagiti dacdackel a banag nga inaramid ni Jesus kencuana: ket amin dagiti tao nasnasdaawda.

Ti babai nga anac ni Jairo; ti babai nga agbulbulos ti darana.

²¹ Ket idi bimmal-lasiw manen ni Jesus a nagbarangay iti sabali a bangir, naguurnong iti sibayna ti umariwecwec a tao; ket isu adda iti igid ti baybay.

²² Ket immay ti maysa cadagiti panguloen ti sinagoga, a managan Jairo; ket idi isu makitana, nagrucbab cadagiti sacsacana,

²³ Ket nagpacpacaasi unay, kencuana a cuncunada; Ti anacco a balasang nganngani matay; umayca cadi ket ipataymo kencuana dagiti imam, tapno umimbag ket agbiag coma.

²⁴ Ket ni Jesus nakicuyog kencuana; ket simmurotda kencuana dagiti umariwecwec a tao ket iletanda.

²⁵ Ket maysa a babai nga sangapulo ket dua a tawenen nga agsagsagaba ti panapagbulos ti dara.

²⁶ Ket nagiturtured unay iti biang dagiti adu a mangngagas ket inibusna amin dagiti cucuana, ket awan ti naglainganna, no di get lumalo,

²⁷ Idi nangngegna dagiti banag a sasaoenda maipapan ken Jesus, immay a nakicuyog cadagiti adu a tao iti licud ket sinagidna daydi pagananayna.

²⁸ Ta pinacpakinakemna: No coman mabalinco a sagiden uray ti pagananayna laeng, maagasanacto.

²⁹ Ket naigiddato a naabbatan kencuana daydi ubbog ti darana, ket naricnana iti bagina nga adda nga immimbagen idi a didigra.

³⁰ Ket dagus a ni Jesus, idi nadlawna ti gundaway a nagsayasay kencuana, sinangona dagiti adu a tattao ket kinunana: Siasino ti nangsagid cadagiti pagananayco?

³¹ Ket dagiti adalanna kinunada kencuana: Makitam a dagiti adu a tao iletandaca, ket cunam: Siasino ti nangsagid caniac?

³² Ngem tinuloyna ti kimmita iti sibayna, tapno makitana daydi nangaramid kencuana iti daytoy.

³³ Daydi babai ngarud, sibubuteng ken agpigpigerger a siaammo iti naaramid kencuana, immay, ket nagparintumeng iti sangoananna, ket impudnona kencuana ti amin a naaramid.

³⁴ Ngem kinunana: Anac, ti pammatim inagasannaca: inca a sitatalna ket maagasanca iti saplitmo.

³⁵ Idi agsasao pay laeng, immayda dagiti tattao ti panguloen ti sinagoga, a kinunada: Tay anacmo a babai natayen: apayapay alimutengem pay laeng ti Mannursuro?

³⁶ Ngem ni Jesus, idi a naal-lingagna daydi sasaoenda, kinunana idi panguloen ti sinagoga: Dica agbuteng; mamatica laeng.

³⁷ Ket dina impalubos iti uray siasino a sumurot kencuana, no di laeng ni Pedro, ken ni Santiago, ken ni Juan, cabsat ni Santiago.

³⁸ Ket dumtengda iti balay ti panguloen ti sinagoga: ket naimatangan ni Jesus ti ariwawa, ken dagiti agsangsangit ken agdungdung-aw ti napigsa.

³⁹ Ket idi a simrec iti uneg, cunana cadacuada: Apayapay agdungdung-aw ken agsangitcayo? ti ubing saan a natay, no di ket matmaturog.

⁴⁰ Ket kinatawaanda nga uyungan. Ngem idi naparuarna ida amin innalana daydi ama ken ina daydi ubing ken dagidi naicuyog kencuana, ket napan iti ayan di ubing.

⁴¹ Ket idi nga inigganana iti ima ti ubing kinunana: Talitha cumi; a no mayulog, cayatna a saoen; Balasang, tumacderca.

⁴² Ket dagus a ti balasang timmacder, ket nagna; ta agtawen iti sangapulo ket dua. Ket napagtalnada a dagus iti dackel a siddaaw.

⁴³ Ngem isu imbilinna unay cadacuada nga awan coma ti macaammo: ket imbagana nga iccanda ti canenna.