San Marcos 4 - Ti Biblia (1973)

Pangngarig ti agmulmula.

¹ Ket rinugianna manen ti nangisuro idi dinna ti baybay; ket dimteng kencuana ti umariwecwec a tattao, iti casta simrec iti maysa a barangay, ket nagtugaw kencuana iti baybay ket amin dagiti adu a tao addada idi daga iti igid ti baybay.

² Ket isursurona ida cadagiti adu a banag cadagiti pangngarig; ket cuncunana cadacuada iti panangisursurona:

³ Dumngegcayo: Adtoy, ti agmulmula rimmuar nga agmula.

⁴ Ket naaramid nga idi a nagmula, dadduma a bukel nagdissoda iti dinna ti dalan; ket immay dagiti tumatayab ket kinnanda.

⁵ Ket dadduma nagdissoda cadagiti cabatoan, nga awan ti adu a daga; ket timmuboda daras, ta awan ti daga a nauneg;

⁶ Ngem idi limgac ti init nalaylay; ket agsipud ta awan ti ramutda, nagangoda.

⁷ Ket dadduma nagdissoda iti cacalunayan ket dimmackel dagiti calunay ket saanda ida a pinalung-aw, ket saanda a nagbunga.

⁸ Ket dadduma nagdissoda iti daga a nasayaat, ket idi a rimmang-ay ken dimmackelda, nagbungada; ket nagbungada iti saggatlopulo, sagninem a pulo, ken sagsangagasut.

⁹ Ket kinunana: Ti adda pagdengngegna dumngeg coma.

¹⁰ Ket idi nga isisu, dagiti cacuyugna agraman dagiti sangapulo ket dua, nagintuudanda ti maipapan cadagidi pangngarig.

¹¹ Ket isu kinunana cadacuada: Maited cadacayo ti panangammo iti palimed ti pagarian ti Dios; ngem cadagiti taga ruar, amin maipalawag cadacuada cadagiti pangngarig.

¹² Iti casta: kitkitaenda, makitada, ket dida mailasin; ket no dengdenggenda, mangngegda ket dida maawatan; di la ket ta addanto aldaw a panagsublida ket dagiti basbasol mapacawan cadacuada.

¹³ Ket cunana cadacuada; Saanyo a maawatan daytoy a pangngarig? casano ngarud ti pannacaammoyonto cadagiti amin a sabsabali a pangngarig?

¹⁴ Ti managmulmula agmula ti sao.

¹⁵ Dagiti adda iti dinna ti dalan, isuda dagiti nacaimulaan ti sao; ket calpasan ti pannacangngegda, umay a dagus ni Satanas ket iccatenna ti sao a naimula cadacuada.

¹⁶ Ket casta met, dagiti naimula cadagiti cabatoan; isuda dagidiay a no mangngegdan ti sao, dagus nga awatenda a siraragsac;

¹⁷ Ngem awan ti ramutda cadacuada, ket saanda nga agbayag: ket iti casta no adda rigat wenno pannacaidadanes gapu iti sao, dagus a maitibcolda.

¹⁸ Ket dagidiay nai mula iti cacalunayan; nangngegdan dagiti ti sao;

¹⁹ Ngem dagiti agagawa itoy lubong, ken ti panangulbod dagiti kinabacnang ken dagiti tartarigagay nga aglablabes cadagiti sabsabali a banag, no sumrecda, lemmesenda ti sao, ket agbalin nga awan bungada.

²⁰ Ket dagidiay naimula iti daga a nasayaat, isuda dagiti dumngeg iti sao, ket awatenda; ket mangtedda ti bunga, a saggatlopulo, ken sagninem a pulo, ken sagsangagasut.

Pangngarig ti silaw.

²¹ Ket kinunana cadacuada: Maiyeg aya ti maysa a silaw tapno maicabil iti uneg ti salop, wenno iti siroc ti pagiddaan? saan aya a tapno maicabil iti pagsilawan?

²² Ta awan ti maabbongan no di ket tapno maipanayag, ket awan met ti aniaman a palimed; no di ket tapno umay iti naananay a pannacaipayayag.

²³ No ti siaasinoman a tao adda pagdengngegna dumngeg coma.

²⁴ Kinunana met cadacuada: Imdenganyo ti mangngegyo: ti rucod a pangrucodyo, isunto ti pacarucodanyo; ket maiccancayto iti adadda pay.

²⁵ Ta iti addaan, maiccanto pay; ngem iti awanan, uray ti adda kencuana, maiccatto pay.

Pangngarig dagiti bukel.

²⁶ Ket kinunana: Castoy ti pagarian ti Dios, cas iti maysa a tao a mangipurruac cadagiti bucbukel iti rabaw ti daga;

²⁷ Ket maturog ken bumangon iti rabii ken aldaw ket dagiti bukel tumuboda ken dumackelda a dina maawatan no casano.

²⁸ Ta ti daga pataudenna ti bunga nga isisu: umuna, bulong, sumaganad dawa, camaudiananna bukel a nadanunan idiay dawa.

²⁹ Ket no ti bunga naluumen, dagus nga iserrecna ti cumpay, ta ti panagapit dimtengen.

Pangngarig ti bukel ti mostaza.

³⁰ Kinunana met: Anianto ti pangyarigantayo iti pagarian ti Dios? wenno anianto ti pangyaspingantayo kencuana?

³¹ Isu cas la maysa a bukel ti mostaza, a no maimula iti daga, uray isu ti cababassitan cadagiti amin a bukel nga adda ditoy daga.

³² Nupay casta, no maimula, rumang-ay ket agbalin a dacdackel ngem cadagiti amin a natnateng ket agsanga cadagiti dadackel; iti casta dagiti tumatayab ti langit mabalinda ti umapon iti linungna.

³³ Ken cadagiti adu pay a cacasta a pangngarig impalawagna cadacuada ti sao, cas iti mabalinda a denggen.

³⁴ Ket saan nga agsao cadacuada no saan a pangngarig, ngem no is-isuda, ibucsilanna amin cadagiti adalanna.

Ni Jesus pagtalnaenana ti bagio.

³⁵ Ket daydi met la nga aldaw, idi malemen, cunana cadacuada: Intayo idiay sabali a bangir.

³⁶ Ket idi a napagawidnan dagidi adu a tao, impandan, ta sigud nga adda idiay barangay: ket nakipaglayagda met kencuana dagiti sabsabali a sasacayan.

³⁷ Ket dimmuco ti maysa a dackel a bagio, ket dagidi dal-luyon agdarisonda idi barangay, iti casta matintinepen.

³⁸ Ngem isu adda iti cutit ti barangay a naturog idi a sipupungan ket riniingda ket cunada kencuana: Mannursuro, Awan ti aniaman kenca no mapucawtayo?

³⁹ Ket idi a nacariing, tinubngarna ti angin ket kinunana iti baybay: Agulimecca, agtalnaca. Ket nagtalna ti angin, ket immay ti dackel a linac.

⁴⁰ Ket kinunana cadacuada: Apayapay a sibubutengcayo? Awan pay aya ti pammatiyo?

⁴¹ Ket isuda naaddaanda iti dackel a buteng; ket cuncunada iti maysa ken maysa: Asino ngarud daytoy nga uray ti angin ken ti baybay agtulnog da kencuana.