San Marcos 3 - Ti Biblia (1973)

Ti tao nga adda maysa nga imana a nagango.

¹ Ket simrec manen ni Jesus iti sinagoga: ket adda idiay idi ti maysa a tao nga ti maysa nga imana nagango.

² Ket isu sisiimenda, no paimbagenna iti aldaw a panaginana; tapno maipulongda.

³ Ket kinunana iti tao nga nagango ti maysa nga imana: Agtacderca iti tengnga.

⁴ Ket kinunana cadacuada; Maiparbeng, ti panagaramid iti naimbag, wenno ti panagaramid iti dakes cadagiti aldaw a panaginana? ti panangisalacan iti biag wenno ti panangpapatay? Ngem dida naguni.

⁵ Ket idi a minatmatanna ida a sirururod iti licmutna, ken napaladingit iti kinatangken dagiti puspusoda, cunana idi tao: Unnatem ta imam. Ket isu inunnatna; ket daydi ima naipulang a naananay.

⁶ Ket rimmuar dagiti Fariseo, ket nakinumoda a dagus cadagiti Herodianos iti maicaniwas kencuana, no casano ti pannacadadaelna.

⁷ Ni Jesus agraman cadagiti adalanna, pimmanaw a napan iti baybay ket sinmurot kencuana ti umariwecwec a tao a taga Galilea ken Judea,

⁸ Ket manipud idiay Jerusalem, ken idiay Idumea, ken iti labes ti Jordan, ken iti arubayan ti Tiro ken Sidon, maysa a dackel a caadu ti tao idi mangngegda dagiti agcacadackel a banag nga araramidenna, immayda kencuana.

⁹ Ket kinunana cadagiti adalanna a maysa a bilog maisagana coma kencuana, gapu iti caadu ti tao, tapno saan a mailetan:

¹⁰ Ta pinaimbagna dagiti adu, gapuna nagdadarisonda kencuana, tapno isu sagiden dagidi amin nga addaan sacsakit.

¹¹ Ket dagiti espiritu a narugit, no isu makitada, nagrucbabda iti sangoananna, ket nagickisda a cunada: Sica ti Anac ti Dios.

¹² Ket isu binilinna ida iti nairut a dida coma ipadlaw.

Pannacaawis dagiti sangapulo ket dua.

¹³ Ket immuli iti bantay, ket inayabanna dagiti kinayatna: ket immayda kencuana.

¹⁴ Ket pinilina dagiti sangapulo ket dua nga aggianda kencuana, ken tapno ibaonna ida a mangascasaba;

¹⁵ Ken tapno adda pannacabalinda a mamaruar cadagiti sairo:

¹⁶ Ni Simon a pinanagananna ti Pedro.

¹⁷ Ken ni Santiago nga anac ni Zebedeo, ken ni Juan a cabsat ni Santiago, a pinanagananna ida ti Boanerges, a cayuluganna: Annac ti dulloog.

¹⁸ Ken ni Andres, ken ni Felipe, ken ni Bartolome, ken ni Mateo, ken ni Tomas ken ni Santiago, anac ni Alfeo, ken ni Tadeo, ken ni Simon taga Cana,

¹⁹ Ken ni Judas Iscariote, daydi nangliput kencuana.

Ti tabbaaw dagiti escriba.

²⁰ Ket nagsublida iti balay. Ket naguurnong manen dagiti adu unay a tao, iti casta uray mangan la coma ti tinapay, saanda a mabalin.

²¹ Ket iti nangngeg dagiti gagayyemna, rimmuarda tapno guyudenda ta cuncunada: Napucawna ti nakemna.

²² Ngem dagidi escriba a simmalog nanipud Jerusalem, cuncunada; Adda kencuana ni Beelzebub; ket gapu iti principe dagiti sairo, mamaruar cadagiti sairo.

²³ Ket isu inayabanna ida; ket nagsao cadacuada cadagiti pangngarig: Casano ti pannacabalin ni Satanas a mamaruar ken Satanas?

²⁴ Ket no ti maysa a pagarian mabingaybingay a maibusor met la kencuana, dina mabalin ti mataginayon dayta a pagarian.

²⁵ Ket no ti maysa a balay aglalasin a maibusor met la kencuana, dinanto mabalin ti mataginayon dayta a balay.

²⁶ Ket no ni Satanas timmacder a maibusor met la kencuana dina mabalin ti mataginayon, no di ket adda gibusna.

²⁷ Uray siasino dina mabalin ti sumrec iti balay ti maingel ken mangikisap cadagiti gamengna, no dina umuna a reppeten ti maingel; ket sananto ikisap ti balayna.

²⁸ Pudno cunac cadacayo nga amin dagiti basbasol mapacawandanto cadagiti annac dagiti tao, ken dagiti tabbaaw, uray anianto nga itabbaawda;

²⁹ Ngem ti siasinoman nga agtabbaaw iti Espiritu Santo, awan ti pacawanna, uray no caano man, no di ket isu macabasol iti agnanayon a basol.

³⁰ Gapu ta kinuncunada: Adda espirituna a narugit.

Dagiti cacabsat ken ina ni Jesus.

³¹ Immay ngarud dagiti cacabsatna ken ni inana, ket idi addada iti ruar nangibaonda ti mangayab kencuana.

³² Ket dagiti adu a tao a situtugaw iti sibayna, kinunada kencuana: Adtoy, ni inam ken dagiti cacabsatmo idiay ruar sapsapulendaca.

³³ Ngem kinunana cadacuada: Siasino ti inac ken dagiti cacabsatco?

³⁴ Ket idi a kinitana iti sibayna dagiti adda nga agtutugaw iti dinnana, kinunana: Adtoy, ni inac ken dagiti cacabsatco!

³⁵ Ta siasinoman a mangaramid ti pagayatan ti Dios, dayta met laeng ti cabsatco a lalaki ken babai, ken inac.