San Marcos 16 - Ti Biblia (1973)

Ti panagungar.

¹ Ket idi nalabes ti aldaw a panaginana, ni Maria Magdalena, ken ni Maria nga ina ni Santiago, ken ni Salome gimmatangda cadagiti bangbanglo, tapno macapanda mangsapsapo kencuana.

² Ket idi a napanda iti nasapaunay iti umuna nga aldaw ti lawas, dimtengda iti tanem idi rimmuaren ti init.

³ Ket cuncuna ti maysa ken maysa cadacuada: Asino ti mangipaay cadatayo ti pannacaligsay iti daytay bato iti ruangan ti tanem?

⁴ Ket idi intangadda dagiti matada, nakitada a naligsayen daydi dackel unay a bato.

⁵ Ket idi simrecda idi uneg di tanem, nakitada ti maysa a baro nga agtutugaw iti sikigan a macanawan, a nagcawes ti maysa a pagananay nga atiddug a puraw; ket nagkigtotda.

⁶ Ngem isu cunana cadacuada: Saancay nga agkigtot! sapulenyo ni Jesus Nazareno, daydi nailansa iti cruz: nagungaren; awan ditoy; kitaenyo ti disso a nangicabilanda kencuana!

⁷ Ngem incayo, ibagayo cadagiti adalanna, ken ni Pedro: Isu mapan iti masangoananyo idiay Galilea; isu makitayonto idiay, cas imbagana cadacayo.

⁸ Ket rimmuarda iti tanem ket napanda a sitataray a napnoda ti buteng ken pigerger; ket awan a pulos ti nangisaoanda, ta napabutengda unay.

Dagiti panagparang ni Jesus a nagungar.

⁹ Ket idi nagungar ni Jesus, iti agsapa unay, iti umuna nga aldaw ti lawas, nagparang nga immuna ken ni Maria Magdalena, isu a namaruaranna cadagiti pito a sairo.

¹⁰ Isu napan ket impacaammona cadagiti nakicadcaddua kencuana, nga addada idi nga agun-unnoy ken agsangsangit.

¹¹ Ket isuda, idi nangngegda kencuana a sibibiag ken nakitana, isu dida pinati.

¹² Calpasan daytoy, nagparang iti sabali a langa cadagiti dua cadacuada a magmagnada, a mapan iti away.

¹³ Ket napanda ket impacaammoda cadagiti sabsabali; ngem uray dagitoy saanda ida a pinati.

¹⁴ Calpasan dagitoy nagparang cadagiti sangapulo ket maysa met laeng, idi addada a mangmangan ket binabalawna ida gapu iti awan a pammatida ken tangken ti pusoda, gapu iti dida pinati dagiti nacakita kencuana a nagungaren.

¹⁵ Ket kinunana cadacuada: incay iti isu-amin a lubong, ket icasabayo ti evangelio iti isu-amin a parsua.

¹⁶ Ket ti mamati ken ti mabautizaran, maisalacanto; ket ti saan a mamati, madusaanto.

¹⁷ Ket dagitoy a pagilasinan cuyugendanto dagiti mammati: Iti naganco paruarendanto dagiti sairo; agsaodanto cadagiti babbaro a pagsasao:

¹⁸ Agpidutdanto ti ululeg; ket no uminumdanto ti macagamut, saandanto a maanano; ipataydanto dagiti imimada cadagiti masacsakit, ket umimbagdanto.

¹⁹ Casta ngarud, idi nalpas ni Apo Jesus ti nakisao cadacuada, naawat idiay ngato sadi langit ket nagtugaw iti macanawan ti Dios,

²⁰ Ket rimmuarda ket nangascasabada cadagiti isu-amin a disso, a ti Apo timmultulong cadacuada, ket pinanecnecanna ti sao cadagiti datdatlag a naipacuyog. Amen.