San Marcos 15 - Ti Biblia (1973)

Ni Jesus iti sangoanan ni Pilato.

¹ Ket dagus nga iti bigat, nagnunumo dagiti panguloen dagiti papadi agraman dagiti panglacayen ken dagiti escriba ken ti amin a gimong, ket rineppetda ni Jesus ket impanda ket inyawatda ken Pilato.

² Ket inintuud ni Pilato kencuana: Sica ti ari dagiti Judio? Ket isu idi a simmungbat, kinunana kencuana; Naisaomon.

³ Ket dagiti panguloen dagiti papadi isu indarumda cadagiti adu a banag.

⁴ Ni Pilato inintuudna manen kencuanan, a kinuna: Awan ti isungbatmo? Kitaem no mano a banag ti pangipulonganda kenca.

⁵ Ngem ni Jesus awan ti insungbatnan iti casta nasnasdaaw ni Pilato.

⁶ Ngem iti fiesta cadaoyanna idi a luc-atan ti maysa a balud, daydiay dawatenda kencuana.

⁷ Ket adda idi ti maysa a managan ti Barrabas a sibabalud agraman cadagiti cacaduana nga immalsa isuda a nacapapatay iti panangriribucda.

⁸ Ket immasideg dagidi adu a tao, ket rinugianda a dinawat ti cas iti cadaoyanna nga araramiden cadacuada.

⁹ Ket ni Pilato simmungbat cadacuada, a cuncunana: Cayatyo a lucatac cadacayo ti Ari dagiti Judio?

¹⁰ Ta ammona idi a gapu iti apal dagiti panguloen dagiti papadi isu inyawatda.

¹¹ Ngem dagiti panguloen dagiti papadi sinulbogda dagiti umili a nasaysayaat coma a luc-atanna cadacuada ni Barrabas.

¹² Ket simmungbat ni Pilato, ket kinunana cadacuada manen: Ania ti aramidecto ngarud iti daytoy naganenyo ti Ari dagiti Judio?

¹³ Ket nagickisda manen: Isu ilansam iti cruz.

¹⁴ Ni Pilato kinunana cadacuada: Ta ania aya ti dakes nga inaramidna? Ngem isuda nagickisda ketdi ti nalal-lalo. Isu ilansam iti cruz.

¹⁵ Ket ni Pilato, agsipud ta cayatna a pagustoan ti umili, linuc-atanna cadacuada ni Barrabas, ket inyawatna ni Jesus, idi nalpasna a binaot, tapno isu mailansa iti cruz.

¹⁶ Dagiti soldado idi nga isu impanda idi uneg ti patio, ti pangocoman, inayabanda ti amin a cabonggoyda.

¹⁷ Ket isu kinawesanda ti purpura; ket naglagda cadagiti sisiit nga imbalangatda kencuana;

¹⁸ Ket rinugianda a kinablaawan; Viva, Ari dagiti Judio!

¹⁹ Ket pinang-orda ti olona iti maysa a cawayan, ken isu tinupraanda, ket idi nagparintumengda nagdaydayawda kencuana.

²⁰ Ket idi nalpasda a nagang-angawan, inucsubda daydi purpura, ket incauwesda met laeng kencuana dagiti pagananayna, ket inruarda tapno ilansada iti cruz.

Ti pannacailansana.

²¹ Ket lumabas idi, ni Simon a taga Cirene, a naggapu iti away, ama ni Alejandro ken ni Rufo, ket impaawitda kencuana ti Cruz ni Jesus.

²² Ket isu ipanda idiay disso a Golgota, a no maipatarus: Disso ti Bangabanga.

²³ Ket ingay-atanda ti arac a nalaocan ti mirra; ngem isu saanna nga ininum daydi.

²⁴ Ket isu inlansada, ket biningbingayda dagiti pagananayna, a naggiginnasatanda no ania ti mabaginto ti tunggal maysa.

²⁵ Ket maicatlo ti horas idi isu inlansada iti cruz.

²⁶ Ket ti kita ti nacaidarumana, naisurat iti ngatona: TI ARI DAGITI JUDIO.

²⁷ Ket inlansada nga ingiddan kencuana dagiti dua a tulisan, daydi maysa iti macanawanna, ket daydi sabali iti macatigidna.

²⁸ Ket natungpal ti Surat a cunana: Ket naibilang cadagiti managdacdakes.

²⁹ Ket dagiti aglabas, isu nagsasaoanda nga ingilngilangilda dagiti oloda, ket cuncunada: Ania! sica a rebbaem ti Templo ket ti tal-lo nga aldaw bangonem met laeng.

³⁰ Isalacanmo ta bagim ket umulogca dita cruz.

³¹ Casta met dagiti panguloen dagiti papadi isu inangangawda, a cuncunada ti maysa ken maysa agraman dagiti escriba: Insalacanna dagiti sabsabali, ket saanna a mabalin nga isalacan ti bagina.

³² Ni Cristo, ti Ari ti Israel, umulog coma ita iti cruz, tapno makitami ket mamaticami. Casta met dagiti adda a nailansa a naigiddan nakipaglalaisda met kencuana.

³³ Ket idi horas a maicanemen, nagsipnget iti rabaw ti amin a daga, agingga iti horas a maicasiam.

³⁴ Ket idi horas a maicasiam nagpuccaw ni Jesus iti dackel a timec: ELOI, ELOI, LAMA SABACTANI? a no maipatarus: Diosco, Diosco, apayapay binaybayannac?

³⁵ Ket dagiti dadduma cadagiti adda idiay idi mangngegda, kinunada: Kitaenyo, ni Elias ti ayabanna.

³⁶ Ket timmaray ti maysa cadacuada, ket nangipasagepsep ti maysa nga esponja iti suca, ket incabilna iti maysa a sucdal ket impasepsepna kencuana, a cuncunana: Bay-anyo, kitaenyo, no umayto ni Elias a mangyulog kencuana:

³⁷ Ngem ni Jesus, pimmuccaw iti napigsa, ket inyawatna ti cararuana.

³⁸ Ket daydi abbong di Templo napigis a nagcadua, nanipud ngato agingga iti baba.

³⁹ Ket idi ti centurion, nga adda iti sangoananna, nakitana nga inyawatna ti cararuana iti castoy, kinunana: Pudno daytoy a tao, isu Anac ti Dios.

⁴⁰ Ket addada met idi dagiti sumagmamano a babbai nga agbuybuya iti adayu ket adda cadacuada ni Maria Magdalena, ken ni Maria nga ina ni Santiago a basbassit ken ni Jose, ken ni Salome;

⁴¹ Isuda nga, idi adda idiay Galilea, simmursurotda ken nagserservida kencuana: ken dagiti adu a sabsabali a babbai a simmang-at a kimmuyog kencuana idiay Jerusalem.

Ti tanem.

⁴² Ket idi nga mumalemen, agsipud ta isu ti Panagsagana, cayatna a saoen sacbay ti aldaw a panaginana,

⁴³ Immay ni Jose a taga Arimatea, panguloen a natan-oc, isu nga agur-uray met idi iti pagarian ti Dios ket simrec a situtured idi yan ni Pilato, ket dinawatna ti bagi ni Jesus.

⁴⁴ Ngem ni Pilato nasdaaw idi naammoanna a natayen; ket inayabanna daydi centurion, ket inintuudna kencuana no natayen.

⁴⁵ Ket idi isu naammoanna idi centurion, intedna daydi bangcay ken Jose.

⁴⁶ Ket gimmatang ti maysa nga ules, ket idi isu imbabana binungonna idi ules ket incabilna iti maysa a tanem a naaramid iti bato; ket sa nangitulid ti maysa a bato iti ruangan ti tanem.

⁴⁷ Ket ni Maria Magdalena, ken ni Maria nga ina ni Jose kinitkitada ti nangitanemanda kencuana.