San Marcos 14 - Ti Biblia (1973)

Ti gimong dagiti saserdote.

¹ Idi dua nga aldaw sacbay ti pascua ken ti rambac ti awan levadurana a tinapay; dagiti panguloen dagiti papadi ken dagiti escriba sapsapulenda idi no casano ti panangtiliwda a nainsicapan kencuana ken isu papatayenda.

² Ta kinunada idi: Saan nga inton madama ti rambac, di la ket ta addanto riri ti umili.

Ti panangrabii ni Jesus idiay Betania.

³ Ket idi adda idiay Betania idiay balay ni Simon nga agcucutel, idi a simmango iti panganan, immay ti maysa a babai, nga addaan maysa a fraskita a napno iti banbanglo ti pulos nga azucena, a napateg unay ket binuungna di fraskita, ket imbuyatna iti olo ni Jesus.

⁴ Ngem adda dadduma a nagrurodda nga isisuda, ket cuncunada, Ania ti gapu a naaramid daytoy a panagdadael ti bangbanglo?

⁵ Ta daytoy a bangbanglo nabalin coma a nalaco iti nasuroc a tal-lo gasut a denario ket naited coma cadagiti napanglaw. Ket nagtanabutobda iti maibusor kencuana.

⁶ Ngem ni Jesus kinunana: Bayanyo: apayapay alimutengenyo? Naimbag nga aramid ti inaramidna caniac.

⁷ Ta agnanayon nga adda cadacayo dagiti napanglaw ket inton cayatyo, mabalinyo ti agaramid cadacuada ti naimbag; ngem siac, saan nga agnanayon nga addaac cadacayo.

⁸ Inaramidna ti nabalinanna: inyunana a sinapsapoan ti bagic a maisagana iti tanem.

⁹ Pudno cunac cadacayo nga uray sadino a pacaicascasabaanto ti evangelio iti isu-amin a lubong, idiay masaritanto met ti inaramid daytoy a babai tapno pacalaglagipan kencuana.

Ti pateg ti liput.

¹⁰ Ket ni Judas Iscariote, maysa cadagiti sangapulo ket dua, napan cadagiti panguloen dagiti papadi tapno isu maiyawatna cadacuada.

¹¹ Ket isuda, idi nangngegda, nagragsacda ket incarida nga iccan ti pirac. Ket sinapulna no casano ti nasayaat a panangyawatna ken Jesus cadacuada.

Ti camaudianan a pascua; ti nasantoan a panangrabii.

¹² Ket idi umuna nga aldaw ti awan levadurana a tinapay idi indatonda ti pascua, dagiti adalanna cunada kencuana: Adino ti cayatmo a papananmi a pangisaganaan a panganam ti pascua?

¹³ Ket isu ibaonna ti dua cadagiti adalanna, ket cunana cadacuada: incayo idiay ciudad ket masabatyonto ti maysa a tao a siaawit iti maysa a caramba ti danum: Surutenyo.

¹⁴ Ket uray sadino a sercannanto, cunayo iti apo ti balay: Ti Mannursuro cunana: Adino ti yan ti pacasangailiac a pangrambacan ti pascua agraman cadagiti adalac?

¹⁵ Ket isu ipakitananto cadacayo ti maysa a salas a dackel ken naarcosan; agsaganacay idiay iti maipaay cadatayo.

¹⁶ Ket napan dagiti adalan ket dimtengda iti ciudad, ket nasaracanda ti cas imbagana cadacuada; ket insaganada ti pascua.

¹⁷ Ket idi malemen, isu napan agraman cadagiti sangapulo ket dua.

¹⁸ Ket idi addada a sisasango, ken mangmangan, ni Jesus kinunana: Pudno cunac cadacayo a maysa cadacayo a makipangan caniac, liputannacto.

¹⁹ Isuda ngarud rinugianda ti nagliday, ken nagcuna kencuana a sinaggaysa: Siac aya?

²⁰ Ket kinunana cadacuada: Maysa cadagiti sangapulo ket dua: dayta makicamalucong caniac.

²¹ Ta ti Anac ti tao mapan a pudno cas adda a naisurat maipapan kencuana; ngem asi pay dayta tao a gapu kencuana maliputan ti Anac ti tao! Naimbag coma iti dayta a tao, no pulos a di nayanac coma.

²² Ket idi mangmanganda, ni Jesus nangala ti maysa a tinapay, ket idi nabendicionanna biningbingayna, ket intedna cadacuada, ket kinunana: Alaenyo; daytoy isu ti bagic.

²³ Ket nangala ti maysa a copa, ket idi nacapagyaman, intedna cadacuada; ket isuda amin imminumda kencuana.

²⁴ Ket kinunana cadacuada: Daytoy isu ti darac iti Baro a Tulag isu a maibucbuc a maipaay cadagiti adu.

²⁵ Pudno cunac cadacayo, a diacto uminumen iti bunga ti uvas, agingga iti daydiay nga aldaw a pananginumco iti baro idiay pagarian ti Dios.

²⁶ Ket idi nacantada ti maysa nga himno, napanda idiay Bantay dagiti Olivo.

Ti panangilibac ni Pedro maipacaammo.

²⁷ Ket ni Jesus cunana cadacuada: Dacay amin maitibcolcayto; ta adda a naisurat: Sugatecto ti pastor, ket mawarawaranto dagiti carnero.

²⁸ Nupay casta inton malpasac nga agungar, innacto iti sangoananyo idiay Galilea.

²⁹ Cuna kencuana ni Pedro: Uray isuda amin maitibcoldanto; ngem siac saan.

³⁰ Ket cuna ni Jesus kencuana: Pudno cunac kenca, a sica, ita, iti daytoy a rabii, inton di pay agtaraoc ti cawitan iti mamindua, paglicudannacton iti mamitlo.

³¹ Ngem isu kinunana iti napigpigsa a panangipapati: Agpapan pay no masapul coma a maicanunongac kenca a matay, saancanto nga ilibac uray caanoman. Ket casta met ti kinunada amin.

Ni Jesus idiay Getsemani.

³² Ket napanda iti maysa a minuyungan a managan Getsemani; ket kinunana cadagiti adalanna: Agtugawcayo ditoy, iti bayat iti panagcararagco.

³³ Ket incuyogna kencuana da Pedro ken Santiago ken ni Juan, ket nangrugi a naglagaw ken nagdanag unay.

³⁴ Ket cunana cadacuada: Adda a naladingit unay ti cararuac agingga iti ipapatay; agbaticayo ditoy, ket agpuyatcayo.

³⁵ Ket idi a simmurong pay bassit, nagparintumeng iti daga, ket nagcararag, a no mabalin, lumbes coma kencuana daydi nga horas.

³⁶ Ket kinunana: Abba, Ama amin a banbanag mabalin kenca: ipanawmo cadi caniac daytoy a copa; nupay casta saan a ti cayatco, no di ta cayatmo.

³⁷ Ket immay, ket nasaracanna ida a matmaturog; ket cunana ken Pedro: Simon, maturogca? Dica nabalin ti agpuyat iti maymaysa nga horas?

³⁸ Agpuyatcayo, ket agcararagcayo, tapno dicay sumrec iti pannacasulisog; ti nakem pudno a sireregta, ngem ti lasag nacapuy.

³⁹ Ket napan manen, ket nagcararag, nga inulitna dagiti met la a sao.

⁴⁰ Ket nagsubli ket nasaracanna manen ida a matmaturog; ta dagiti matada nargaanda unay: ket dida ammo idi ti isungbatda kencuana.

⁴¹ Ket immay iti maicatlo, ket cunana cadacuada: Maturogcayon, ket aginanacayo, isunan; ti horas dimtengen: adtoy, ti Anac ti tao maiyawat cadagiti imima dagiti managbasol.

⁴² Bumangoncayo, intayon; adtoy, ti mangliput caniac, umasidegen.

Pannacatiliw ni Jesus.

⁴³ Ket idinto nga agsasao pay laeng simmangpet ni Judas, maysa cadagiti sangapulo ket dua, ket kimmuyog kencuana ti adu a tao a nagtagicampilan ken nagtagipang-or, a naggapuda cadagiti turayen dagiti papadi ken cadagiti escriba, ken cadagiti lallacay.

⁴⁴ Ket daydi mangliput kencuana, iniccanna ida ti maysa a pagilasinan, a cunana: No asino ti agepacto; isu dayta; isu tiliwenyo, ket ipanyo nga aywananyo a naimbag.

⁴⁵ Ket idi dimtengen, dagus nga immasideg kencuana, ket kinunana, Mannursuro: ket inagcanna.

⁴⁶ Ket isu iniggamanda ket tiniliwda.

⁴⁷ Ngem maysa a tao cadagiti naital-laong, inasutna ti campilanna, ket kinabilna daydi adipen ti cangatoan a padi ket piningasanna ti lapayagna.

⁴⁸ Ket nagsao ni Jesus, ket kinunana cadacuada: Immawaycayo aya a cas bumusor iti maysa a tulisan, a nagtagicampilan ken nagtagipangorcayo a mangtiliw caniac?

⁴⁹ Amin nga aldaw addaac idi cadacayo a nangisursuro idiay Templo ket saandac a tiniliw. Ngem maaramid daytoy tapno matungpal dagiti Sursurat.

⁵⁰ Ket isu binaybayanda, ket nagtalawda amin.

⁵¹ Ket adda maysa a baro a simmurot kencuana, nga sicacagay iti maysa nga ules a naibalcut iti bagina a lamolamo: ket tiliwenda coma.

⁵² Ngem isu, inibbatanna daydi ulesna ket timmaray a lamolamo.

Ni Jesus idiay sangoanan ti Senedrin wenno cangatoan a panngocoman dagiti Judio.

⁵³ Ket impanda ni Jesus iti cangatoan a papadi: ket nakigimong kencuana dagiti amin a panguloen dagiti papadi ken dagiti lallacay, ken dagiti escriba.

⁵⁴ Ket ni Pedro simmurot kencuana iti adayu, agingga iti uneg ti paraangan ti cangatoan a padi; ket nakicatugaw cadagiti adipen, nga agin-inudoda iti apuy.

⁵⁵ Ket dagiti panguloen dagiti papadi ken ti amin a gimong nagsapulda ti pangsacsi a maibusor ken Jesus, tapno papapatayda; ngem awan nasaracanda.

⁵⁶ Ta adu dagiti mangted idi ti saan a pudno a pangsacsi a bumusor kencuana; ngem dagiti pangsacsida saanda a mainugot.

⁵⁷ Ket timmacder dagiti dadduma, ket nangtedda ti natiri a pangsacsi a bumusor kencuana, a cuncunada:

⁵⁸ Isu nangngegmi a cunana: Siac rebbaecto daytoy Templo, nga inaramid ti ima, ket iti tal-lo nga aldaw mangbangonacto ti sabali a saan nga aramid ti ima.

⁵⁹ Ngem uray pay casta, saan a mainugot dagiti pangsacsida.

⁶⁰ Ket timmacder daydi cangatoan a padi iti nagtengngaanda, ket inintuudna ken Jesus, a kinuna: Awan ti aniaman nga isungbatmo? Ania ti panecnecanda dagitoy a maibusor kenca?

⁶¹ Ngem isu saan a naguni ket awan ti insungbatna. Daydi cangatoan a padi nagintuudanna manen: ket kinunana kencuana: Sica ni Cristo, ti Anac ti Bendito?

⁶² Ni Jesus kinunana kencuana: Siac; ket makitayonto ti Anac ti tao nga agtutugaw iti macanawan ti mannacabalin, ken umay agraman dagiti ulep ti langit.

⁶³ Ket daydi cangatoan a padi pinigisna dagiti pagananayna, ket kinunana: Ania pay ti pacasapulantayo cadagiti sacsi?

⁶⁴ Nangngegyo ti tabbaaw: ania ti cunayo? Ket isuda amin impatoda a maicari iti pannacapapatay.

⁶⁵ Ket rinugian dagiti dadduma a tinupraan, ken inabbungutan ti rupana ket isu tinungtungpada, ken cunada kencuana: Padtoam. Ket dagiti alguacil isu inawatda cadagiti tungtungpa.

Ni Pedro ilibacna ni Jesus.

⁶⁶ Ket idi adda ni Pedro iti baba idiay paraangan, immay ti maysa cadagiti babbai nga adipen ti cangatoan a padi;

⁶⁷ Ket idi makitana ni Pedro nga agin-inudo, minatmatanna, ket kinunana: Ket sica met makicuycuyogca idi ken Jesus Nazareno.

⁶⁸ Ngem isu naglibac a cuncunana: Diac ammo ket diac maawatan dayta cunam. Ket rimmuar iti ruangan; ket nagtaraoc ti maysa a cawitan.

⁶⁹ Ket idi makita manen ti adipen a babai, rinugianna nga imbagana cadagiti adda sadiay a naital-laong: Daytoy ti caduada.

⁷⁰ Ngem isu naglibac manen. Ket idi nalabes bassit, dagiti adda sadiay kinunada manen ken ni Pedro: Pudno; ta taga Galileaca.

⁷¹ Ngem isu rinugianna ti naglunod ken nagsapata, a cunana; Saanco nga amammo daytoy tao a sasaoenyo.

⁷² Ket dagus a ti cawitan nagtaraoc iti maicadua a daras. Ket nalagip ni Pedro daydi sao nga imbaga ni Jesus kencuana: Inton dipay agtaraoc ti cawitan iti mamindua, ilibacnacton a mamitlo. Ket idi pinanunutna daytoy, nagsangit.