San Marcos 13 - Ti Biblia (1973)

Ti cascasaba a padto: Ti pangrugian dagiti ladingit.

¹ Ket idi rimmuar idi Templo, kinuna kencuana ti maysa cadagiti adalanna: Mannursuro, kitaem: Nacascasdaaw a batbato ket anian a patacder!

² Ket ni Jesus kinunana kencuana: Makitam dagitoy dadackel a patpatacder? Awan ti bato a matdanto iti rabaw ti bato a dinto marba.

³ Ket idi adda nga agtutugaw idiay Bantay dagiti Olivo, iti maiparreng ti Templo, inintuudda kencuana iti nalimed da Pedro ken ni Santiago ken ni Juan ken ni Andres:

⁴ Ibagam coma cadacami, caanonto ti pannacaaramid dagitoy a banag? ket anianto ti pagilasinan inton amin dagitoy a banag mangrugidan a matungpal?

⁵ Ket ni Jesus rinugianna a kinuna cadacuada: Kitaenyo nga awan coma ti mangal-lilaw cadacayo.

⁶ Adu dagiti umayto iti naganco a cuncunada: Siac ni Cristo; ket adu dagiti ulbudendanto.

⁷ Ngem inton mangngegyo ti maipapan cadagiti gubat ken damag ti gubat, dicay aglagaw: masapul a mapasamac; ngem saan pay nga isu ti panungpalan.

⁸ Ta ti maysa a nacion tumacderto a bumusor iti sabali a nacion ken pagarian a bumusor iti sabali a pagarian; addanto gingined iti nadumaduma a disso; ket addanto bisbisin: dagitoy a banag isudanto ti pangrugian dagiti ladingit.

⁹ Ngem aluadanyo ti bagiyo met laeng; ta iyawatdacayo cadagiti pangocoman, ken cadagiti sinagoga masaplitcayto; ket maisaclangcayto iti sangoanan dagiti agtuturay ken arari, gapu caniac, tapno pangpanecnec cadacuada.

¹⁰ Ket masapul a ti evangelio maicascasaba nga umuna cadagiti amin a nacion.

¹¹ Inton ipandacayo ngarud iti pangocoman, ken iyawatdacayo, dicay pacaringgoran nga umuna no ania ti saoenyonto; ngem ti aniaman a maitedto cadacayo, iti dayta nga horas, dayta ti isaoyo; ta saan a dacayo dagiti agsao, no di ket ti Espiritu Santo.

¹² Ket ti cabsat a lalaki iyawatnanto ti cabsatna a lalaki iti ipapatay, ket ti ama ti anacna, ket dagiti annac tumacderdanto a bumusor cadagiti dadackelda ket papatayendanto ida.

¹³ Ket caguradacayto dagiti amin a tao gapu iti naganco; ngem ti agtalinaed nga agingga iti panungpalan, maisalacanto.

Ti cascasaba a padto: (canayon): Ti dackel a rigat.

¹⁴ Inton makitayo ngarud ti kinarimon ti pannacadadael nga agsaad iti dina rebbeng ti agbasa, awatenna coma iti dayta dagiti adda idiay Judea, pumanawda coma a mapan cadagiti banbantay;

¹⁵ Ket ti adda iti tuctoc ti balay saan coma a bumaba ket di met sumrec iti uneg, a mangala ti uray ania idiay balayna;

¹⁶ Ket ti adda iti talon, saan coma nga agsubli a mangipan ti pagan-anayna.

¹⁷ Ngem, asi pay dagiti adda a masicog ken dagiti agtagibi cadagita nga aldaw!

¹⁸ Agdawdawatcayo ngarud, ta saan coma a maaramid iti calam-ecna.

¹⁹ Ta cadagiti nga aldaw addanto rigat, nga dipay napasamac nanipud idi damo ti pannacaparsua nga inaramid ti Dios, agingga ita, ket ni caanoman awanton.

²⁰ Ket no ti Apo, dina coma pinaababa dagita nga aldaw, awan coma ti lasag a maisalacan; ngem gapu cadagiti napili, a pinilina, pinaababana dagita nga aldaw.

²¹ Ket iti casta, no ti siasinoman a tao agsaonto cadacayo: Adtoy ni Cristo, wenno, Adda idiay, dicay patien;

²² Ta tumacderdanto dagiti sinan Cristo, ken sinan mammadto, ket mangipakitadanto cadagiti pagilasinan ken datdatlag, tapno macapasurotda no mabalin coma, uray pay cadagiti napili.

²³ Ngem agannadcayo coma; adtoy, imbagacon amin nga impacpacauna cadacayo.

Ti cascasaba a padto (canayon): Ti panagsubli ti Anac ti tao.

²⁴ Ngem cadagidiay nga aldaw, inton calpasan daydiay a rigat, ti init aglulemto ket ti bulan saannanto nga ited ti lawagna.

²⁵ Ket dagiti bituen agtinnagdanto manipud langit; ket dagiti pannacabalin nga addada cadagiti langlangit, agkintayegdanto.

²⁶ Ket iti casta makitadanto toy Anac ti tao cadagiti ul-ulep nga umay agraman iti dakel a pannacabalin ken dayag.

²⁷ Ket iti casta ibaonnanto dagiti angel, ket urnongennanto dagiti pinilina manipud cadagiti uppat a turong manipud iti ungto ti daga agingga iti ungto ti langit.

²⁸ Ita adalenyo ti pangngarig nga agtaud iti cayo ti higos: intono aguggot ti sanganna ken patubbuenna dagiti bulbulongna, ammoyo a ti ticag asidegen;

²⁹ Castacayo met inton makitayo a maaramid dagitoy a banag, ammoenyo nga isu asidegen cadagiti ruangan.

³⁰ Pudno cunac cadacayo, a dinto lumbes daytoy a caputotan aginga iti maaramid amin dagitoy a banag.

³¹ Ti langit ken ti daga lumbesdanto, ngem dagiti saoc didanto lumbes.

³² Ngem ti maipapan iti dayta nga aldaw wenno dayta nga horas, awan ti macaammo uray pay dagiti angel sadi langit, uray pay toy Anac, no di laeng ni Ama.

Ti cascasaba a padto (panungpalan): Ti panagsalucag.

³³ Kitaenyo agsalucag ken agcararagcayo, ta dicay ammo ti aldaw no caanonto.

³⁴ Cas iti maysa a tao nga agtataeng iti sabali a daga isu a pinanawanna ti balayna, ket iniccanna dagiti adipenna ti turay ti tunggal maysa iti annongna, imbilinna met iti managaywan ti ruangan nga agsalucag.

³⁵ Agsalucagcay ngarud, ta dicay ammo no caano ti iyaay ti apo ti balay, no iti malem wenno iti tengnga ti rabii, wenno inton panagtaraoc ti cawitan, wenno iti bigat:

³⁶ Di la ket ta inton umay a kellaat, masaracannacayo a matmaturog.

³⁷ Ket ti cunac cadacayo, cunac cadagiti isu-amin: Agsalucagcayo.