San Marcos 12 - Ti Biblia (1973)

Pangngarig dagiti agtaltalon a nadaeal.

¹ Ket rinugianna a kinasao ida cadagiti pangngarig: Nagmula ti maysa a tao ti maysa a cauvasan ket linaolawna iti alad, ket kimmali ti pagaramidan ti arac ket nangbangon ti maysa a balay, ket impaupana cadagiti agtaltalon, ket napan iti sabali a daga.

² Ket idi tiempo a pannacaipaayna, nangibaon ti maysa nga adipenna cadagiti agtaltalon tapno awatenna coma cadacuada dagiti bunga ti cauvasan.

³ Ket isu innalada, ket minalmaloda ket pinagawidda nga imaima.

⁴ Ket nangibaon manen cadacuada ti sabali nga adipen, ket sinugatda ti olona ket pinagawidda a nagsasaoan.

⁵ Nangibaon ngarud ti sabali; ket daytoy pinatayda: ket nangibaon ti adu a sabsabali, ket sinugatda dagiti dadduma, ket pinatayda dagiti dadduma.

⁶ Idinto nga adda pay maymaysa nga anacna, a dungdungoenna; imbaonna daytoy cadacuada a naud-udi, a cunana: Padayawandanto ti annacco.

⁷ Ngem dagiti nga agtaltalon kinunada ti maysa ken maysa: Daytoy isu ti agtawid; umaycayo, papatayentayo ket cucuatayto ti tawidna.

⁸ Ket innalada, ket pinatayda, ket imbel-lengda iti ruar ti cauvasan.

⁹ Ania ngarud ti aramidento ti apo ti cauvasan? Umayto ket pucawennanto dagidiay agtaltalon ket itednanto ti cauvasan cadagiti sabsabali.

¹⁰ Saanyo pay a nabasa aya daytoy a surat: Ti bato nga imbel-leng dagiti agbangbangon ti balay, isu met laeng ti nagbalin nga olo ti nagsulianan:

¹¹ Daytoy naaramid gapu iti Apo, ket nacascasdaaw cadagiti matatayo?

¹² Ket isu agawaanda idi a tiliwen; ngem cabutengda dagiti adu a tao: ta naawatanda nga sinaona daydi a pangngarig a maibusor cadacuada; ket isu pinanawanda, ket nagawidda.

Ti susic a maipapan iti buwis.

¹³ Ket nangibaonda kencuana cadagiti dadduma cadagiti Fariseo ken cadagiti Herodiano, tapno matiliwda coma iti panagsaona.

¹⁴ Ket idi dimtengda, cunada kencuana: Mannursuro, ammomi a napudnoca, ket dica icancano iti uray siasino; casta met a dica bigbigen ti casasaad a naruar dagiti tao, ngem mangisuroca a sipupudno iti dalan ti Dios: Maipalubos ti panangted ti buis ken Cesar, wenno saan?

¹⁵ Mangtedcamto, wenno saan? Ngem isu, nailasinna ti panaginsisingpetda, ket kinunana cadacuada: Apayapay suutendac? ipakitaandac ti maysa a denario.

¹⁶ Ket idi inyeganda, cunana cadacuada: Siasino ti akinladawan itoy, ken ania ti naisurat? Ket kinunada kencuana: Ni Cesar.

¹⁷ Ket ni Jesus kinunana cadacuada: Itedyo ken Cesar ti cucua ni Cesar, ket iti Dios ti cucua ti Dios. Ket nasnasdaawda unay kencuana.

Dagiti Saduceo ken ti panagungar.

¹⁸ Idin immayda kencuana dagiti Saduceo, nga agcuncuna nga awan ti panagungar; ket inintuudda kencuana a cuncunada:

¹⁹ Mannursuro, ni Moises insuratna cadacami: No ti cabsat a lalaki ti maysa a lalaki matay, ket mabatina ti asawa, ngem awan ti anacna, alaen coma ni cabsatna di asawana, ket iputotanna ni cabsatna.

²⁰ Adda ngarud pito nga agcacabsat a lallaki: ket di inauna nangala ti asawa, ket idi natay, awan, nabatina a putot.

²¹ Ket daydi babai innala daydi maicadua, ket natay nga awan nabatina a putot a sunona; ket daydi maicatlo casta met.

²² Ken dagiti pito, ket awan nabatida a putot. Natay met daydi babai a naudi cadacuada amin.

²³ Inton panagungar, ngarud, asinonto cadacuada ti makin-asawa kencuana? ta dagidi pito nakiasawada amin kencuana.

²⁴ Ni Jesus kinunana cadacuada: Saan aya a gapu itoy ket maallilawcayo, ta dicay ammo dagiti Sursurat, ken ti pannacabalin ti Dios?

²⁵ Ta inton agungarda iti tengnga dagiti natay, saanda a mangasawa wenno makiasawa; no di ket isuda ti cacas la cadagiti angel nga adda idiay langit.

²⁶ Ngem no ti maipapan cadagiti natay, nga agungardanto, uray caano dicay aya nabasa idiay Libro ni Moises no casano ti panakisao ti Dios kencuana iti bassit a cayo a sumsumged a kinunana: Siac ti Dios ni Abraham, ken ti Dios ni Isaac, ken ti Dios ni Jacob?

²⁷ Saan nga isu ti Dios dagiti natay, no di ket dagiti nabiag: maallilawcayo iti nacaro.

Ti dackel a bilin.

²⁸ Ket dimteng ti maysa cadagiti escriba, ket nangngegna ida nga agsususic ket gapu ta ammona a sinungbatanna ida a naimbag, inintuudna kencuana: Ania ti cangronaan cadagiti bilbilin?

²⁹ Ni Jesus simmungbat: Ti umuna isu daytoy: Denggem, O Israel: Ti Apo a Diostayo isu ti maymaysa nga Apo:

³⁰ Ket ayatem ti Apo a Diosmo iti amin a pusom, ken iti amin a cararuam, ken iti amin a panunotmo ken cadagiti isu-amin a pigsam.

³¹ Ti maicadua isu daytoy: Ayatem ti caarrobam a cas iti bagim. Awan ti sabali a bilin a dacdackel ngem dagitoy.

³² Ket kinunana di escriba kencuana: Agpayso, Mannursuro, naimbag ti pinagcunam a maymaysa laeng ti Dios; ket awan ti sabali no saan nga isu:

³³ Ket ti panagayat kencuana iti amin a puso, ken iti amin a cararua ken iti amin nga isip ken cadagiti amin a pigsa, ken ti panagayat iti caarroba a cas iti bagi met laeng, isu napatpateg ngem dagiti amin a daton ken sagut.

³⁴ Ket ni Jesus idi nakitana a simmungbat a sisisirib, kinunana kencuana: Saanca nga adayu iti pagarian ti Dios. Ket awanen idiay ti nacaitured a nagimtuud kencuana.

Ni Cristo, anac ni David.

³⁵ Ket idi a mangisursuro ni Jesus idiay Templo nagsao ket kinunana: Apayapay cuna dagiti escriba a ni Cristo isu ti anac ni David?

³⁶ Idinto a ni met laeng David gapu iti Espiritu Santo kinunana: kinuna ti Apo iti Apoc; agtugawca iti macanawanco, agingga iti maicabilco dagiti cabusormo iti baba dagiti sacsacam.

³⁷ No ni David met laeng awaganna nga Apo: casano ngarud, nga isu ti anacna? Ket dagiti caaduan a tao dimngegda a siayat kencuana.

Pannacababalaw dagiti escriba.

³⁸ Ket iti panangisursurona kinunana: Agannadcayo cadagiti escriba, nga maayayatanda ti magna a sipapagananay ti nagayad ken ayatenda ti macablaawan cadagiti plaza.

³⁹ Ken dagiti cangatoan a tugaw cadagiti sinagoga, ken dagiti nagundawayan a saad cadagiti ramrambac:

⁴⁰ Isuda a mangalun-un cadagiti balbalay dagiti balo a babai, babaen ti pangal-lilaw dagiti atitiddag a lualo. Dagitoy awatendanto ti nainginget a pannacaocom.

Ti daton ti napanglaw a babai a balo.

⁴¹ Ket idi adda ni Jesus nga agtutugaw iti sangoanan ti pagidulinan cadagiti daton, kinitana no casano ti panangipisoc dagiti umili ti pirac idi pagidulinan: ket adu dagiti nabacnang a nangipisoc ti nawadwad.

⁴² Immay met ti maysa a balo a babai a napanglaw, ket nangipisoc ti dua a blancas a maysa a maravilis ti pategda.

⁴³ Ket inayabanna dagiti adalanna, ket kinunana cadacuada: Pudno cunac cadacayo a daytoy balo a babai a napanglaw, adadda ti impisocna ngem iti impisoc dagiti amin a sabsabali;

⁴⁴ Ta isuda amin nangipisocda cadagiti tiddada; ngem daytoy babai iti kinapanglawna incabilna ti amin nga adda kencuana ken amin a pagtaraonna.