San Marcos 11 - Ti Biblia (1973)

Iseserrec a sibabal-ligi ni Jesus idiay Jerusalem.

¹ Ket idi immasidegda idiay Jerusalem ken idiay Betfage ken Betania, iti Bantay dagiti Olivo, ni Jesus imbaonna ti dua cadagiti adalanna,

² Ket cunana cadacuada: Incayo iti puroc nga adda iti masangoananyo, ket apaman a macasreccayo kencuana, masaracanyonto ti maysa nga urbon nga asno a naigalut, isu a dipay sinacayan ti uray asino a tao: warwaranyo ket iyegyo.

³ Ket no adda agcuna cadacayo: Apayapay aramidenyo daytoy? cunayo: Ti Apo adda pacasapulanna kencuana; ket dagus nga ibaonnanto ditoy.

⁴ Ket napanda, ket nasaracanda daydi urbon a naigalut iti dinna ti ruangan iti ruar ti dalan; ket warwaranda.

⁵ Ket dagiti dadduma cadagiti adda idiay, kinunada cadacuada: Ania ti aramidenyo a warwaranyo ti urbon nga asno?

⁶ Ket imbagada cadacuada cas ti imbilin ni Jesus; ket binaybayanda ida a nangala.

⁷ Inyegda ngarud ti urbon ken Jesus, ket imparabawda kencuana dagiti pagananayda, ket ni Jesus nagsacay kencuana.

⁸ Ket adu dagiti nangyaplag cadagiti pagananayda iti dalan: ket dagiti dadduma timmoccolda cadagiti sangsanga dagiti caycayo, ket inyaplagda ida iti dalan.

⁹ Ket dagiti magmagna iti sangoanan ken dagiti sumursurot ipucpuccawda: Hosanna! Bendito ti umay iti nagan ti Apo!

¹⁰ Bendito coma ti pagarian ni amatayo a David nga umayto! Hosanna idiay cangatoan!

¹¹ Ket simrec ni Jesus idiay Jerusalem, ken idiay Templo: ket idi nakitana dagiti amin a banag iti arubayan, ken gapu ta malemen, pimmanaw a napan idiay Betania agraman dagiti sangapulo ket dua.

Ti cayo ti higos a nagango: ti pannacagugor ti Templo.

¹² Ket iti sumuno nga aldaw, idi a pimmanawda idiay Betania isu nagbisin.

¹³ Ket idi nakitana iti adayu ti maysa a cayo nga higos a nabulong, napan, bareng no adda aniaman a masaracanna kencuana: Ket idi dimteng, awan ti nasaracanna no di bulbulong; ta saan a tiempo ti higos idi.

¹⁴ Ket idi nagsao kinunana kencuana: Uray caanoman, awan ti mangan ti bungam! Ket dagiti adalanna nangngegda daytoy.

¹⁵ Dimtengda ngarud idiay Jerusalem: ket idi simrec ni Jesus iti Templo rinugianna a pinaruar dagiti agtagtagilaco ken aggatgatang idiay; ket tinuangna dagiti lamlamisaan dagiti managsucat ti pirac, ken dagiti tugaw dagiti aglaclaco cadagiti calapati;

¹⁶ Ket saanna nga impalubos nga adda mangipan ti aniaman a tagtagilaco idiay Templo.

¹⁷ Ket insurona ida, a cuncunana: Saan aya a naisurat: Ti balayco managananto Balay ti cararag a maipaay cadagiti amin a nacion? ngem dacayo inaramidyo a rukib dagiti mannanacaw.

¹⁸ Ket idi nangngeg dagiti turayen dagiti papadi ken escriba, sinapsapulda no casano ti panangpucawda kencuana: ta agbutengda idi kencuana, agsipud ta amin nga umili masmasdaawda iti pannursurona.

¹⁹ Ket no mumalemen mapan iti ruar ti ciudad.

²⁰ Ket iti bigat, idi lumabasda nakitada daydi cayo ti higos a nagango nanipud cadagiti ramut.

²¹ Ket nalagip ni Pedro, ket kinunana kencuana: Kitaem, Manursuro: daydi cayo ti higos nga inlunodmo, nagango.

²² Ket simmungbat ni Jesus, ket kinunana cadacuada: Mamaticayo iti Dios.

²³ Pudno cunac cadacayo: Nga siasinoman nga agcuna coma iti daytoy a bantay: Pumanawca ket agtappuacca iti baybay; ket dinto agduadua iti pusona, no di ket mamati a maaramidto ti cunana, maaramidto kencuana.

²⁴ Gapuna cunac cadacayo: Uray aniaman a dawatenyo no agcararagcayo patienyo nga awatenyon ket maaramidto.

²⁵ Ket intono addacayo nga agcararag ket addaancayo iti aniaman a maicaniwas iti asinoman, pacawanenyo: tapno ni Amayo nga adda sadi langit pacawanennanto met dagiti salungasingyo.

²⁶ Ngem no dicay mamacawan, ni Amayo nga adda sadi langit dinanto met pacawanen dagiti basbasolyo.

Ti pammautizar ni Juan.

²⁷ Ket simmublida manen idiay Jerusalem: ket idi magmagna idiay Templo, immayda kencuana dagiti panguloen dagiti papadi, ken dagiti escriba ken dagiti lallacay,

²⁸ Ket kinunada kencuana: Ania a kinaturay ti pangaramidmo cadagitoy a banag? wenno siasino ti nangted kenca iti daytoy a kinaturay tapno aramidem dagitoy a banag?

²⁹ Ket ni Jesus kinunana cadacuada: Intuudecto cadacayo ti maysa a banag ket sungbatandac; sa ibagacto cadacayo no ania a kinaturay ti pangaramidco cadagitoy a banag.

³⁰ Ti pammautizar ni Juan naggapu iti langit wenno cadagiti tao? Sungbatandac.

³¹ Ket pinanpanunutda a cuncuna; No cunaentayto: Iti langit; cunaennanto, Apayapay ngarud nga dicay pinati?

³² Ngem no cunaentayto: Cadagiti tao,—nagbutengda cadagiti umili; ta isuda amin imbilangda a ni Juan pudno a mammadto.

³³ Ket simmungbatda ken Jesus, a cunada: Dicam ammo. Kinuna ngarud ni Jesus cadacuada: Uray siac diac met ibaga cadacayo no ania a kinaturay ti pangaramidco cadagitoy a banag.