San Marcos 10 - Ti Biblia (1973)

Ti panagsina dagiti agasawa.

¹ Ket idi pimmanaw sadiay, napan cadagiti beddeng ti Judea, iti labes ti Jordan; ket dagiti adu a tao nagsublida a naguurnong iti sibayna; ket cas cadawyanna, isursurona ida manen.

² Ket dimteng dagiti dadduma a Fariseo, ket inintuudda kencuana, a susuuten: Maipalubos iti lalaki nga isinana ti asawana?

³ Ngem isu simmungbat, ket kinunana cadacuada: Ania ti imbilin cadacayo ni Moises?

⁴ Ket kinunada: Ni Moises impalubosna ti mangisurat ti pacapanecnecan ti pannakisina, sa pagtalawen.

⁵ Ket ni Jesus kinunana cadacuada: Gapu iti tangken ti pusoyo insuratna cadacayo daytoy a bilin.

⁶ Ngem nanipud idi damo ti pannacaparsua, ti Dios inaramidna ida a lalaki ken babai.

⁷ Gapu itoy panawanto ti lalaki ni amana ken ni inana, ket makitipon ken asawana;

⁸ Ket isuda a dua maymaysadanto a lasag. Gapuna a saandanto a duan, no di la maymaysa a lasag.

⁹ Ti pinagtipon ti Dios, ngarud, saan coma a pagsinaen ti tao.

¹⁰ Ket idiay balay, dagiti adalan sinublianda nga inintuud kencuana ti maipapan itoy a banag.

¹¹ Ket kinunana cadacuada: Siasinoman a lalaki a mangisinanto iti asawana ket mangasawa iti sabali, macabasol iti pannakiabig iti dina asawa a maicaniwas kencuana.

¹² Ket no ti babai isinananto ti asawana; ket makiasawanto iti sabali, makiabig iti dina asawa.

Ni Jesus bendicionanna dagiti ubbing.

¹³ Ket inyegda kencuana dagiti ubbing a babassit tapno sagidenna ida; ket dagidi adalan inungtanda dagiti nangyeg.

¹⁴ Ket idi makita daytoy ni Jesus, nangricna unay, ket kinunana cadacuada: Bayanyo dagiti ububbing a babassit nga umayda caniac, ket dicay pawilan ida ta dagitoy isuda, dagiti agtagicua ti pagarian ti Dios.

¹⁵ Pudno cunac cadacayo, a ti saan nga umawatto iti pagarian, ti Dios a cas la maysa nga ubing, dinto sumrec kencuana.

¹⁶ Ket inaracupna ida, impatayna cadacuada dagiti imimana, ket binendicionanna ida.

Ti bacnang a baro.

¹⁷ Ket idi rimmuar a mapan iti dalan, timmaray a mapan kencuana ti maysa a tao ket nagparintumeng iti sangoananna, ket inintuudna kencuana: Mannursuro a naimbag, ania ti aramidec tapno matawidco ti biag nga agnanayon?

¹⁸ Ket ni Jesus kinunana kencuana: Apayapay cunam a naimbagac? Awan ti naimbag no di maymaysa, nga isu ti Dios.

¹⁹ Ammon dagiti bilbilin: Dica mamapatay; Dica makiabig iti dica asawa; Dica agtacaw; Dica agsao ti natiri a pangpanecnec; Dica agulbod; Dayawem ni amam ken ni inam.

²⁰ Ket isu kinunana kencuana: Mannursuro, amin dagitoy tinungpalco nanipud idi kinaubingco.

²¹ Ket ni Jesus, idi nga minatmatanna, inayatna; ket kinunana kencuana: Maysa a banag ti agcurang kenca: inca, ilacom dagup ti adda kenca, ket itedmo cadagiti napanglaw; ket addanto kinabacnangmo idiay langit; ket umayca, surutennac.

²² Ngem nagliday ti rupana iti daytoy a sao, ket pimmanaw a silaladingit; ta addaan ti adu a sanicua.

²³ Ket ni Jesus kimmita iti aglicmut ket kinunana cadagiti adalanna: Ania ket a nagrigaten a sumrecda iti pagarian ti Dios dagiti aduan sanicua!

²⁴ Ket dagiti adalan nagsiddaawda cadagiti saona. Ngem ni Jesus simmungbat manen, ket cunana cadacuada: Annac, ayaunayen ti rigatda a sumrec iti pagarian ti Dios dagiti agtalged cadagiti kinabacnang!

²⁵ Nalaclaca a lumsot ti maysa a camello iti abut ti maysa a dagum, ngem ti iseserrec ti maysa a bacnang idiay pagarian ti Dios.

²⁶ Ket nagsiddaawda a limmanlan a kinuncunada: Asino ngarud ti macabalinto a maisalacan!

²⁷ Ket ni Jesus idi a tinaliawna ida, cunana: Cadagiti tao saan a mabalin daytoy, ngem saan a casta iti Dios; ta amin dagiti banag, isuda mabalin iti Dios.

²⁸ Ni Pedro rinugianna a kinuna kencuana: Adtoy pinanawanmi amin, ket simmurotcami kenca.

²⁹ Ni Jesus simmungbat, ket kinunana: Pudno cunac cadacayo, nga awan ti tao a nangpanaw ti balay wenno cacabsat a lallaki wenno babbai, wenno ama, wenno ina, wenno asawa, wenno annac, wenno dagdaga, gapu caniac ken gapu iti evangelio.

³⁰ A dinto umawat ita itoy nga aldaw ti maminsangagasut a balbalay ken cacabsat a lallaki ken babbai, ken inna, ken annac; ken dagdaga, agraman cadagiti pannacaidadanes, ket iti tiempo nga umay, biag nga agnanayon.

³¹ Ngem adu dagiti umuna a maud-udidanto; ken dagiti maudi, nga umun-unadanto.

Ti dawat dagiti annac ni Zebedeo.

³² Ket idi addada iti dalan a sumangsang-at idiay Jerusalem, ni Jesus napan iti sangoananda: ket masmasdaawda ken sumursurotda a sibubuteng. Ket pinaasidegna manen kencuana dagiti sangapulo ket dua, ket rinugianna a sinarita cadacuada dagiti banag a maaramidto kencuana.

³³ Adtoy, sumang-attayo idiay Jerusalem, ket toy Anac ti tao maiyawatto cadagiti turayen dagiti papadi ken cadagiti escriba ket; isu dusaandanto iti ipapatay, ket iyawatdanto cadagiti Gentil;

³⁴ Ket rabrabngisendanto ket tupraandanto, ket saplitendanto, ket papatayendanto; ngem iti maicatlo nga aldaw, agungarto met laeng.

³⁵ Ket immasidegda kencuana da Santiago ken Juan, annac ni Zebedeo, a kinunada kencuana: Mannursuro, tarigagayanmi nga aramiden coma cadacami ti dawatenminto kenca.

³⁶ Ket kinunana cadacuada: Ania ti cayatyo nga aramidec coma cadacayo?

³⁷ Kinunada kencuana: Ipaaymo cadi nga agsaadcami coma iti dayagmo, ti maysa iti macanawanmo, ket ti sabali iti macatigidmo.

³⁸ Ngem ni Jesus kinunana cadacuada: Dicay ammo ti dawatenyo. Mabalinyo aya ti uminum iti copa nga inumac, wenno mabautizaran iti pammautizar a pacabautizarac?

³⁹ Kinunada kencuana: Mabalinmi, Ni Jesus kinunana cadacuada: Iti copa nga inumac, uminumcayto, ket iti pammautizar a pacabautizarac mabautizarancayto;

⁴⁰ Ngem ti panagtugawyo iti macanawanco wenno iti macatigid, awan iti pannacabalinco ti panangited iti dayta; no di cadagiti nacaisaganaanna.

⁴¹ Ket idi nangngeg dagiti sangapulo daytoy, rinugianda ti gimmura cada Santiago ken Juan.

⁴² Ket ni Jesus inayabanna ida ket cunana cadacuada: Ammoyo a dagiti maibilang a turayen dagiti Gentil agbalinda nga ap-apoda; ket dagiti natan-ocda agbilinda a situturay cadacuada.

⁴³ Ngem saan a casta cadacayo; no di ket ti siasinoman nga agtarigagay nga agbalin coma a dackel cadacayo, isunto ti adipenyo;

⁴⁴ Ket siasinoman nga agtarigagay nga isu coma ti umun-una cadacayo, isunto ti adipen dagiti isu-amin.

⁴⁵ Ta uray pay toy Anac ti tao saan nga immay tapno pegservian, no di ket tapno agservi ken tapno itedna ti biagna a subbot dagiti adu.

Ti bulsec a taga Jerico.

⁴⁶ Idin dimtengda idiay Jerico: ket idi rimmuarda nanipud Jerico agraman dagiti adalanna ken ti umariwecwec a tattao, ti anac ni Timeo, ni Bartimeo, maysa nga agpalpalama a bulsec adda nga agtutugaw iti dinna ti dalan.

⁴⁷ Ket idi nangngegna a daydi lumabas isu ni Jesus a Nazareno, rinugianna ti nagpuccaw ken nagcuna: Jesus, nga Anac ni David, caasiannac cadi.

⁴⁸ Ket adu dagiti nangtubngar kencuana tapno agulimec; ngem isu nagickis iti adadda pay: O Anac ni David, caasiannac cadi.

⁴⁹ Ket nagsardeng ni Jesus, ket kinunana: Ayabanyo. Ket inayabanda daydi bulsec a cunada kencuana: Manginanamaca; tumacderca, ta ayabannaca.

⁵⁰ Ket isu, idi nga inwacsina daydi cagayna, timmacder, ket napan ken Jesus.

⁵¹ Ket idi nagsao ni Jesus, kinunana kencuana: Ania ti cayatmo nga aramidec coma kenca? Daydi bulsec kinunana kencuana: Mannursuro, macakitaac coma.

⁵² Ket ni Jesus kinunana kencuana: Incan; ti pammatim inagasannaca. Ket dagus a nacakita, ket simmursurot kencuana iti dalan.