San Marcos 1 - Ti Biblia (1973)

Ni Juan a Bautista.

¹ Pangrugian ti evangelio ni Jesu-Cristo, Anac ti Dios.

² Cas iti naisurat ken Isaias a mammadto: Adtoy, ibaonco ti babaonec iti sangoanan ti rupam, A mangisagananto iti dalanmo:

³ Timec ti maysa nga agao-awag iti let-ang: Isaganayo ti dalan ti Apo, Palintegenyo dagiti danana.

⁴ Immay ni Juan a nangbabautizar iti let-ang ken nangicasaba iti pannacabautizar ti panagbabawi, a maipaay iti pannacaiccat dagiti basbasol.

⁵ Ket timmabunoda idi kencuana dagiti amin a taga Judea ken dagiti amin a taga Jerusalem, ket nabautizaranda kencuana idiay carayan Jordan, nga ipudpudnoda dagiti basbasolda.

⁶ Ket ni Juan agcawcawes idi iti dutdot ti camello ken maysa a barikes a lalat ket mangmangan cadagiti dudon ken diro iti bakir:

⁷ Ket nangascasaba a cuncunana: Umay iti malicudac ti adadda ti pannacabalinna ngem siac, diac maicari uray pay agdumogac a mangwarwar iti galut dagiti zapatosna.

⁸ Siac, iti kinapudnona binautizarancayo iti danum; ngem isu bautizarannacayto iti Espiritu Santo.

Pannacabautizar ken pannacasulisog ni Jesus.

⁹ Ket napasamac cadagidi nga aldaw a ni Jesus immay nanipud idiay Nazaret ti Galilea, ket binautizaran ni Juan iti Jordan.

¹⁰ Ket apaman, nga idi sumangsang-at nanipud iti danum, nakitana a naglucat dagiti langlangit, ken ti Espiritu a cas la calapati a bumabbaba kencuana.

¹¹ Ket nangngeg ti maysa a timec nanipud langit: Sica ti dungdungngoec nga Anac; maayayoac unay kenca.

¹² Ket dagus a ti Espiritu impanna iti let-ang.

¹³ Ket naggian idiay iti uppat a pulo nga aldaw a sulsulisogen ni Satanas; ket nakipaggian cadagiti animal a narungsot: ket dagiti angel nagservida kencuana.

Pannacaawis dagiti immuna nga adalan.

¹⁴ Ngem idi nalpas a nabalud ni Juan, ni Jesus simrec idiay Galilea a nangicascasaba iti evangelio ti Dios,

¹⁵ Ket cuncunana: Naturposen ti aldaw ket ti pagarian ti Dios asidegen: agbabawicayo ket patienyo ti evangelio.

¹⁶ Ket idi limmabas iti dinna ti baybay ti Galilea, nakitana ni Simon ken ni Andres a cabsatna, nga iwaywayatda ti iket iti baybay; ta dumadaclisda idi.

¹⁷ Ket kinuna cadacuada ni Jesus; Surutendac ket pagbalinencayto a dumadaclis cadagiti tao.

¹⁸ Ket dagus, a pinanawanda dagiti iketda, ket simmurotda kencuana.

¹⁹ Ket idi nagna pay bassit nakitana ni Santiago nga anac ni Zebedeo ken ni Juan a cabsatna, nga addada idi iti barangayda, a tartarimaanenda dagiti iketda.

²⁰ Ket inayabanna ida a dagus; ket pinanawanda ni amada a Zebedeo iti barangay agraman cadagiti mangmangged, ket simmurotda kencuana.

Pannacaagas ti nagun-gan ti sairo idiay Capernaum.

²¹ Ket simrecda idiay Capernaum; ket rinugianna a dagus ti nangisursuro idiay sinagoga, cadagiti aldaw a panaginana,

²² Ket nagsidsiddaawda iti sursurona; ta insursurona ida, a cas la adda turayna, ket saan a cas la cadagiti escriba.

²³ Ket adda iti sinagoga ti maysa a tao nga addaan espiritu a narugit, ket nagickis,

²⁴ A cuncunana: Ania ti bibiangmi kenca, Jesus Nazareno? Immayca mangpucaw cadacami? Ammoc no siasinoca, sica ti Santo ti Dios.

²⁵ Ket inamsan ni Jesus a cuncunana: Agulimecca ket rummuarca kencuana.

²⁶ Ket daydi espiritu a narugit napagpigerger ket di nagickis iti dackel a timec, rimmuar kencuana.

²⁷ Ket nagsiddaawda amin iti casta unay a nagsisinnaludsudda a cuncunada: Ania daytoy? Maysa a baro a sursuro! Situturay nga agbilin uray pay cadagiti espiritu a narugit ket agtulnogda kencuana!

²⁸ Ket nagracurac a dagus ti dayawna iti amin a daga ti Galilea ken dagiti arubayanna.

Pannacaagas ti babai a catugangan ni Pedro ken dagiti sabsabali a masacsakit.

²⁹ Ket apaman nga rimmuarda iti sinagoga, simrecda iti balay da Simon ken Andres, a naicuyog da Santiago ken Juan.

³⁰ Ngem ti babai a catugangan ni Simon adda idi iti idda nga aggorigor; ket dagus nga imbagada kencuana.

³¹ Ket immasideg ni Jesus ket iniggamanna iti imana ket pinatacderna; ket pinanawan ti gorigor, ket nagservi cadacuada.

³² Ket iti malem, idi limneken ti init, inyegda kencuana dagiti amin a masacsakit ken dagiti nagun-gan ti sairo.

³³ Ket ti amin nga umili naguurnongda iti ruangan.

³⁴ Ket pinaimbagna dagiti adu, nga agsagsagaba cadagiti nadumaduma a sacsakit, ket pinaruarna dagiti adu a sairo; ket dina binaybay-an nga agsao dagiti sairo, ta isu amammoda.

³⁵ Ket bimmangon iti parbangon, iti nasipnget pay laeng, rimmuar ket napan iti maysa a disso a napacni, ket idiay nagcararag.

³⁶ Ngem ni Simon ken dagiti adda a cumuycuyog, simmurotda kencuana;

³⁷ Ket idi nasaracanda, cunada kencuana: Isuda amin sapulendaca.

³⁸ Ngem isu kinunana cadacuada: Mapantayo cadagiti purpuroc ken ilili a caparanget tapno mangasabaac met sadiay; ta maipoon itoy immayac.

³⁹ Ket napan cadagiti sinagogada, iti isu-amin a Galilea, a nangascasaba ken namarparuar cadagiti sairo.

Pannacaagas ti maysa nga agcucutel.

⁴⁰ Ket immay kencuana ti maysa nga agcucutel nga agdawdawat kencuana; ket idi nagparintumeng kinunana kencuana: No cayatmo, mabalinnac a dalusan.

⁴¹ Ket ni Jesus idi a simnec ti asina kencuana inunnatna ti imana ket idi nga sinagidna kinunana kencuana: cayatco: madalusanca coma.

⁴² Ket naigiddato a pimmanaw kencuana ti cucutel, ket nadalusan.

⁴³ Ket idi a kinarianna iti nairut unay pinalubusanna a dagus.

⁴⁴ Ket kinunana kencuana: Kitaem, ta dica ibaga iti uray siasino, no di ket inca, agparangca iti sacerdote ket idatonmo ti maipaay iti pannacagugormo dagiti imbilin ni Moises, a pacapanecnecanda.

⁴⁵ Ngem isu idi a rimmuar, rinugianna nga inwarragawag unay ken inracuracna ti naaramid; iti casta ni Jesus dina mabalin ti sumreken iti na panayag iti ili no di ket naggian iti ruar cadagiti disso a let-ang. Ket immayda kencuana nanipud cadagiti amin a disso.