Malakias 3 - Ti Biblia (1973)

Idadateng ti ibaon ni Jehova. Ti panangtubngar ni Jehova. Ti panaglasin ti nalinteg ken ti dakes.

¹ Adtoy, ibaonco ti babaonec, ket isu isaganananto ti dalan iti sangoc: ket ti Apo a birukenyo, umayto iti apagdaricmat iti templona; ket ti babaonen ti tulag, isu a calicagumanyo, adtoy, umay, cuna ni Jehova dagiti buybuyot.

² Ngem siasino ti macabalin a mangibtor iti aldaw ti yaayna? ket siasinonto ti agtacder intono agparang? ta isu cas la iti apuy ti manggugor, ken cas la sabon ti agpapuscol ti lupot:

³ Ket isu tumugawto a cas iti mangdalus ken manggugor iti pirac, ket gugorannanto dagiti annac ni Levi, ket dalusannanto ida a cas iti balitoc ken pirac; ket agidatagdanto ken Jehova cadagiti datdaton iti kinalinteg.

⁴ Iti casta ti daton ti Juda ken ti Jerusalem macaay-ayonto ken Jehova, a cas cadagiti al-aldaw idi ugma ken cas cadagiti tawen idi punganay.

⁵ Ket siac umasidegacto cadacayo iti panangocom; ket nasiglatacto a sacsi a maibusor cadagiti managanito, ken maibusor cadagiti mannakicamalala, ken maibusor cadagiti naulbod a managsapata, ken maibusor cadagiti mangilupit cadagiti mangmangged cadagiti tangdanda, iti balo a babai, ken cadagiti ul-ulila, ken mangballicug iti gangannaet iti calinteganna, ken saan nga agbuteng caniac, cuna ni Jehova dagiti buybuyot.

⁶ Ta siac, ni Jehova, diac agbaliw, gapuna dacayo, O annac ni Jacob, saancayo a maikisap.

⁷ Nanipud cadagiti al-aldaw dagiti ammayo simminacayo cadagiti bilbilinco, ket dicayo sinalimetmetan ida. Sumublicayo caniac, ket siac sumubliacto cadacayo, cuna ni Jehova dagiti buybuyot. Ngem dacayo cunayo, Iti ania ti pagsublianminto?

⁸ Ti tao tacawannanto aya ti Dios? nupay casta dacayo tacawandac. Ngem dacayo cunayo, Iti ania ti nangtacawanmi kenca? Cadagiti apagcapullo ken datdaton.

⁹ Babaen ti panangilunod, nailunodcayo, ta tacawandac, daytoy met laeng amin a nacion.

¹⁰ Yegyo ti amin nga apagcapullo, iti camalig, tapno adda coma taraon iti balayco, ket padasendac ita iti daytoy, cuna ni Jehova dagiti buybuyot, no siac diacto luctan cadacayo dagiti tawtawa ti langit, ket ibuyatconto cadacayo ti bendicion, nga awanto ti lugar a macalaon nga umawat.

¹¹ Ket ungtacto ti manangalun-on maipuon cadacayo, ket isu dinanto dadaelenen dagiti bungbunga ti dagayo, uray ti uvasyo dinanto regregenen dagiti bungana idiay away iti sacbay ti panawen, cuna ni Jehova dagiti buybuyot.

¹² Ket amin a nasnacion naganendacayto a nagasat; ta dacayto ti namayengmeng a daga, cuna ni Jehova dagiti buybuyot.

¹³ Dagiti sasaoyo nadagsenda a maibusor cania, cuna ni Jehova. Nupay casta cunayo, Ania ti insaomi a maicaniwas kenca?

¹⁴ Dacayo kinunayo, Ubbaw ti panagservi iti Dios; ket ania ti gungunami iti panangaywanmi iti intalecna, ken iti pannagnami a silaladingit iti saclang ni Jehova dagiti buybuyot?

¹⁵ Ket ita naganentayo a nagasat dagiti natangsit; wen, dagiti agaramid ti dakes isuda ti narang-ay; wen, isuda sinulisogda ti Dios, ket nacalisida.

¹⁶ Iti casta dagiti nagbuteng ken Jehova nagsaoda iti maysa ken maysa; ket ni Jehova nagimdeng, ken nangipangag, ket maysa a libro a pacalaglagipan nasuratan iti saclangna, agpaay cadagidiay nagbuteng ken Jehova, ken cadagidiay nga nagpanunot iti naganna.

¹⁷ Ket isuda cucuacto ida, cuna ni Jehova dagiti buybuyot, cucuac met laeng, iti aldaw nga aramidecto; ket igagacto ida a cas iti panangigaga ti tao iti anacna met laeng nga agservi kencuana.

¹⁸ Iti casta agsublicayto ken mabigbigyonto iti nalinteg ken iti managdacdakes, daydiay agservi iti Dios ken daydiay saan nga agservi kencuana.