Malakias 1 - Ti Biblia (1973)

Ti ayat ni Jehova ken Jacob.

¹ Ti awit a sao ni Jehova a maipaay iti Israel babaen ken ni Malakias.

² Siac inayatcayo, cuna ni Jehova. Ngem dacayo cunayo, Iti ania ti nangayatam cadacami? Ni Esau saan aya a cabsat ni Jacob? cuna ni Jehova nupay casta inayatco ni Jacob;

³ Ngem ginurac ni Esau, ket pinaglangalangco dagiti banbantayna, ken intedco ti tawidna cadagiti aso nga atap ti let-ang.

⁴ Agsipud ta ti Edom cunana, Dacami napababacami, ngem agsublicamto ket bangonenminto dagiti narba a disdisso; ni Jehova dagiti buybuyot cunana ti castoy, Isuda bangonendanto, ngem siac duprakecto; ket dagiti tattao naganendanto ida, Ti sacup ti kinadakes, ken Tattao a pagungtan nga agnanayon ni Jehova.

⁵ Ket dagita matayo makitadanto, ken cunaenyonto, Ni Jehova maitanoc coma iti labes ti sacup ti Israel.

⁶ Ti anac a lalaki dayawenna ni amana, ket ti adipen iti apona: no siac ngarud ti ama, sadino ti yan ti pannacadayawco? ket no siac ti apo, sadino ti yan ti panagbuteng caniac? cuna ni Jehova dagiti buybuyot cadacayo, O papadi, a manglalais iti naganco, ket dacayo cunaenyo, Iti ania ti nanglaisanmi iti naganmo?

⁷ Dacayo mangidatoncayo iti narugitan a tinapay iti rabaw ti altarco, ket cunayo, Iti ania ti nangtabbaawanmi kenca? Iti daydiay panagcunayo, Ti lamesaan ni Jehova uuyawen.

⁸ Ket no idatonyo ti bulsec nga animal nga agpaay iti daton, saan a dakes! ket no idatonyo ti pilay ken masakit, saan a dakes! Isu isagutmo ita iti Gobernadormo; maayayonto aya kenca? wenno padayawannanto ti kinataom? cuna ni Jehova dagiti buybuyot.

⁹ Ket ita, agdawatac cadacayo, a makicaasicayo iti parabur ti Dios, tapno mangngaasi coma cadatayo: daytoy nagtaud cadacayo isu pagdayawannanto aya ti kinatao siasinoman cadacayo? cuna ni Jehova dagiti buybuyot.

¹⁰ O no adda coma maysa cadacayo a mangirikep coma cadagiti ruangan, tapno dicayo coma gangatan ti apuy iti altarco iti barengbareng! siac diac maayayo cadacayo, cuna ni Jehova dagiti buybuyot, diacto met awaten ti daton iti imayo.

¹¹ Ta manipud iti ileleggac ti init agingga iti ilelennecna met laeng ti naganco dackelto cadagiti Gentiles; ket iti tunggal disso maidatonto ti incienso iti naganco, ken ti nadalus a daton: ta ti naganco dackelto cadagiti Gentiles, cuna ni Jehova dagiti buybuyot.

¹² Ngem dacayo bassawanganyo ti naganco, iti daydiay panagcunayo, Ti lamesaan ni Jehova narugitan, ken ti bungana, uray ti taraon kencuana uuyawen.

¹³ Dacayo cunayo met, Adtoy, anian a pannacabannog daydiay! ket dacayo agbang-escayo kencuana, cuna ni Jehova dagiti buybuyot; ket inyegyo ti rinabsut, ken ti pilay, ken ti masakit; casta ti panangidatagyo ti daton: awatecto coma aya daytoy iti imayo? cuna ni Jehova.

¹⁴ Ngem mailunod ti mangallilaw nga addaan iti arbanna animal a calakian, ket agcari, ken mangidaton iti Apo iti addaan pacapilawan; ta siac dackelac nga Ari, cuna ni Jehova dagiti buybuyot, ket ti naganco nacakigkigtot iti nagtengngaan dagiti Gentiles.