San Lucas 9 - Ti Biblia (1973)

Ti pannacaibaon dagiti sangapulo ket dua nga apostol.

¹ Ket idi nga inurnongna dagiti sangapulo ket dua, iniccana ida ti pannacabalin ken kinaturay cadagiti isu-amin a sairo, ken panangagas cadagiti sacsakit.

² Ket imbaonna ida a mangicascasaba iti pagarian ti Dios ken mangagas cadagiti masacsakit.

³ Ket cunana cadacuada: Dicay agbalon ti uray ania, sarucod man, supot man, uray tinapay, uray pirac; ket dicay mangicuyog ti dua a pagananay.

⁴ Ket iti uray ania a balay a sercanyo, agtaengcayo idiay ket isu met ti pagluasanyo.

⁵ Ket isu-amin dagiti saan a mangawat cadacayo, intono rumuarcayo iti daydiay nga Ili, pampagenyo iti tapoc dagiti sacsacayo a pangpanecnec iti maibusor cadacuada.

⁶ Ket napanda, iti inilin-ili nga icascasabada ti evangelio, ket nangagagasda cadagiti isu-amin a purpuroc,

Ni Herodes nga agturay ken ni Juan a Bautista.

⁷ Ket ni Herodes nga agturay nadamagna dagiti isu-amin a maararamid; ket agpangpangadua, ta cuna dagiti dadduma a ni Juan nagungar cadagiti natay;

⁸ Ket dagiti dadduma cunada, a ni Elias nagparang, ket dagiti sabsabali cunada, a maysa cadagiti cadaanan a mammadto nagungar.

⁹ Ket kinuna ni Herodes: Ni Juan pinutulac; ngem, asino daytoy pacangngeggac cadagitoy a banag a maipapan kencuana? Ket tartarigagayanna a kitaen.

Umuna nga iyaadu dagiti tinapay.

¹⁰ Ket idi nagsubli dagiti apostol, sinaritada kencuana dagiti isu-amin nga inararamidda, Ket innalana ida napanda a nalimed iti maysa a disso a putputong a masacupan ti Betsaida,

¹¹ Ngem idi maammoan daytoy dagiti adu a tao, simmurotda kencuana; ket inawatna ken kinasaona ida ti maipapan iti pagarian ti Dios, ket inagasanna dagiti macasapul ti pannacaagas.

¹² Ket idi a mumalemen immasideg dagiti sangapulo ket dua ket kinunada kencuana: Pagawidemon dagiti adu a tao, tapno mapanda cadagiti purpuroc ken awaway iti arubayan, nga agdagus ken agsapul ti pagtaraonda; ta addatayo ditoy disso nga awan matatao.

¹³ Ngem cunana cadacuada: Iccanyo ida ti canen, Ket kinunada: Awan cadacami no di laeng lima a tinapay ken dua nga ican, no dicam mapan gumatang ti pagtaraon a maipaay cadagitoy amin a tattao.

¹⁴ Ta aglimariboda a tao. Ket kinunana cadagiti adalanna: Pagtugawenyo ida a paglalanglangen ti tunggal saglilima pulo.

¹⁵ Ket casta ti inaramidda ket pinagtugawda ida amin.

¹⁶ Ket innalana dagidi lima a tinapay ken dagidi dua nga ican, ket idi a timmangad sadi langit binendicionanna ida; ket pinispisina ket intedna cadagidi adalanna tapno isangoda cadagiti adu a tao.

¹⁷ Ket nanganda amin, ket nabsogda; ket iti natda cadagiti pispisi, nacargaanda ti sangapulo ket dua nga alat.

Ti panangipaduyacyac ni Pedro iti pammatina.

¹⁸ Ket naaramid nga idi agcarcararag a maymaysa, addada dagiti adalanna; ket inintuudna cadacuada a kinuna: Asinoac iti panagcuna dagiti adu a tao?

¹⁹ Ket simmungbatda ket kinunada: Ni Juan a Bautista; ket dagiti dadduma cunada, ni Elias; ket dagiti sabali cunada a nagungar ti maysa cadagiti cadaanan a mammadto.

²⁰ Ket kinunana cadacuada: Ngem dacayo asinoac iti panagcunayo? Ket simmungbat ni Pedro ket kinunana: Sica ti Cristo ti Dios.

²¹ Ngem isu imbilinna iti nairut cadacuada a dida saoen daytoy iti uray siasino;

²² A cunana: Masapul a ti Anac ti tao aglac-am ti adu a banag, ken lacsiden dagiti lallacay ken turayen dagiti papadi ken dagiti escriba, ket mapapatay ken agungar iti maicatlo nga aldaw.

Awiten ti Cruz.

²³ Ket cuncunana cadacuada amin: No asinoman a tao ti mayat nga sumurot caniac, paglicudanna ti bagina, ket alaenna ti cruzna iti inaldaw ket surutennac.

²⁴ Ta uray siasino a mayat coma a mangisalacan iti biagna, mapucawnanto; ngem uray siasino a macapucaw iti biagna gapu caniac, maisalacannanto.

²⁵ Ta ania ti magongona ti tao no maalana amin a lubong, ngem mapucawna ken dadaelenna ti bagina?

²⁶ Ta uray siasino a mangibain caniac ken cadagiti saoc, ibainto met ti Anac ti tao, inton umay a sidadayag ken ni Ama ken dagiti nasantoan nga anangel.

²⁷ Ngem cunac cadacayo iti napudno: Adda sumagmamano ditoy a didanto matay agingga iti makitada ti pagarian ti Dios.

Ti panagbalbaliw ti langana.

²⁸ Ket iti agwalo nga aldaw iti calpasan dagitoy a sasao incuyogna ni Pedro ken ni Juan ken ni Santiago, ket ummuli iti bantay a nagcararag.

²⁹ Ket idi madama nga agcarcararag, ti langa ti rupana nagbaliw ket ti pagananayna nagpudaw ken nagraniag.

³⁰ Ket adtoy dagiti dua a lallaki a makisasaoda kencuana, nga isuda Moises ken Elias;

³¹ A nagparangda a sidadayag, ket sinasaoda ti panagwayawayna, a nganngani matungpal idiay Jerusalem.

³² Ngem ni Pedro ken dagidi caduana, macaturogda unay ket idinto a nagriingda, nakitada ti dayagna ken dagidi dua a lallaki nga caduana.

³³ Ket naaramid, nga idi pimmanawdan kencuana, ni Pedro kinunana ken Jesus: Mannursuro, naimbag nga agiantayo coma ditoy ket agaramidcami ti tal-lo nga abong: maysa ti maipaay kenca, ket maysa ken Moises, ket sabali ken Elias, a dina ammo ti sasaoenna.

³⁴ Ket idi madama a sasaoenna daytoy, immay ti maysa nga ulep a nangabongot cadacuada; ket nagbutengda idi maulepanda.

³⁵ Ket nagtaud ti maysa a timec idi ulep a nagcuna: Daytoy ti Anacco a dongdongoec, denggenyo.

³⁶ Ket idi immay daydi a timec maymaysan ni Jesus: ket nagulimecda; ket cadagidi nga aldaw awan ti nangisaonda cadagiti nakitada.

Pannacaagas ti baro a bulanbulanen.

³⁷ Ket napasamac iti sumaruno nga aldaw, idi sumalogda idi bantay, adu a tattao ti simmabet kencuana.

³⁸ Ket adtoy ti maysa a tao cadacuada a nagpuccaw a nagcuna: Mannursuro, dawatec kenca nga taliawem cadi toy anacco, ta cacaisuna:

³⁹ Ket adtoy nga maysa nga espiritu alaenna ket maigiddato nga agickis; ket riribukenna agingga iti aglablabutab ket agrigat a pumanaw kencuana ket cacaasi a pamayanna.

⁴⁰ Ket dinawatco cadagiti adalam a paruarenda coma, ket dida nabalin.

⁴¹ Ket simmungbat ni Jesus ket kinunana: O caputotan nga awan pammatina ken managdacdakes! aginga iti caano ti panagtaengco cadacayo ken iturturedcayo? Iyegmo ditoy ti anacmo.

⁴² Ket idi umasidegen, di sairo intublacna ket pinarigatna; ngem ni Jesus inungtanna daydi espiritu a narugit, ket inagasanna daydi baro, ket insublina ken amana.

⁴³ Ket nasnasdaawda amin iti dackel a pannacabalin ti Dios. Ngem idi a nasnasdaawda amin cadagitoy amin nga inararamidna, kinunana cadagiti adalanna:

⁴⁴ Tandaananyo a naimbag dagitoy a sao: ta toy Anac ti tao mayawatto cadagiti ima dagiti tao.

⁴⁵ Ngem saanda a naawat idi daytoy a sao, ket nacudrep cadacuada, iti casta dida maawatan, ket mabutengda met a mangintuud kencuana maipapan iti daytoy.

Ti cadackelan iti pagarian ti langit.

⁴⁶ Ket nabangon ti supiatda no asinonto cadacuada ti cangatoan.

⁴⁷ Ngem ni Jesus, idi nakitana ti supiat cadagiti pusposoda, nangala ti maysa nga ubing, ket incabilna iti sikiganna.

⁴⁸ Ket cunana cadacuada: Uray siasino nga umawatto itoy ubing iti naganco, awatennacto; ket uray siasino nga umawat caniac, awatenna ti nangibaon caniac; ta ti canumoan cadacay amin, isu met laeng ti cangatoan.

Ti saan a sumalungasing cadacayo; adda cadacayo.

⁴⁹ Ket simmungbat ni Juan ket kinunana: Mannursuro, nacakitacami ti maysa a mamaruar cadagiti sairo iti nagamo; ket imparitmi kencuana, ta saan a sumurot cadatayo.

⁵⁰ Ngem ni Jesus kinunana kencuana: Dicay iparit, ta ti saan a sumalungasing cadacayo, adda cadacayo.

Dagiti Samaritano dida awaten ni Jesus.

⁵¹ Ket naaramid, nga idi ta dimtengen dagiti aldaw a pannacaitanocna nagturong a mapan a sitatalged sadi Jerusalem:

⁵² Ket nangibaon cadagiti immuna ngem isu ket napanda ket simrecda iti maysa a puroc dagiti Samaritano, tapno isaganaanda ti pagdagusan.

⁵³ Ket isu dida inawat gapu ta agturong a mapan sadi Jerusalem.

⁵⁴ Ket idi naammoan dagidi adalanna a Santiago ken Juan, kinunada: Apo, cayatmo nga ibilinmi a bumaba ti apuy ti langit, tapno ibusenna ida, (a cas met ti inaramid ni Elias?)

⁵⁵ Ngem isu simmango ket inungtanna ida (a kinuna: Dicay ammo no aniacayo nga espiritu).

⁵⁶ (Ta ti Anac ti tao saan nga immay tapno agdadael cadagiti biag dagiti tao, no di ket tapno insalacanna ida). Ket napanda iti sabali a puroc.

No casano ti panangsurot ken Jesus.

⁵⁷ Ket idi magmagnada iti dalan, kinuna ti maysa a tao kencuana: Surutencanto uray adino ti papanam.

⁵⁸ Ket kinuna kencuana ni Jesus: Dagiti musang adda rukibda, ket dagiti tumatayab ti tangatang adda umocda; ngem ti Anac ti tao awan ti pangisadaganna iti olona.

⁵⁹ Ket kinunana iti sabali: Surutennac: Ngem kinunana: Apo, palubosannac pay a mapan ken mangiponpon ken amac.

⁶⁰ Ngem ni Jesus kinunana kencuana: Bay-am dagiti natay a mangiponpon cadagiti minatayda; ngem sica mapanca ket ipacaammom ti pagarian ti Dios.

⁶¹ Ket kinuna met ti sabali: Surutencanto, Apo; ngem palubosannac, ta innac pay agpacada cadagiti cabbalayco.

⁶² Ngem ni Jesus kinunana kencuana: Awan ti tao nga idinto nga immiggem iti arado ken tumaliaw pay iti licudan, a maicari iti pagarian ti Dios.