San Lucas 8 - Ti Biblia (1973)

Dagiti babbai a pinagservida dagiti gamengda ken Jesus.

¹ Ket naaramid iti calpasanna, nga isu magmagna cadagiti amin nga Il-ili ken purpuroc a mangascasaba ken ipacaammona ti naimbag a damag ti pagarian ti Dios; ket dagiti sangapulo ket dua cumuycuyogda kencuana,

² Ken dagidi dadduma a babbai, a naagasanda cadagiti dakes nga espiritu ken cadagiti sacsakit; da Maria a nanaganan ti Magdalena, isu a rinuaran ti pito a sairo,

³ Ken ni Juana, asawa ni Chuza, a mapagtalcan ni Herodes, ken ni Susana ken adu pay a sabsabali a nagserservi kencuana cadagiti gamengda.

Pangngarig ti agmulmula.

⁴ Ket idi a nagguurnong ti umariwecwec a tattao a naggapuda cadagiti inilin-ili immayda kencuana nagsao nga inaramatna ti pangngarig:

⁵ Ti agmulmula rimmuar a napan nangimula iti bin-ina: ket idi a nagmula, dadduma nagdissoda iti igid ti dalan ket napayatpayat, ket dagiti tumatayab iti tangatang kinnanda ida.

⁶ Ket dadduma nagdissoda iti bato, ket apaman a timmubo nagango agsipud ta awan dam-egna.

⁷ Ket dadduma nagdissoda iti cacalunayan; ket idi a timmubo met dagiti calunay a nakirana, saanda ida a pinalung-aw.

⁸ Ket dadduma nagdissoda iti nasayaat a daga ket idi a timmubo, nagbunga ti ginasut. Idi nasaona dagitoyen, impuccawna: Ti addaan pagdengngeg, dumngeg coma.

⁹ Ket dagidi adalanna inintuudda kencuana no ania ti caipapanan daytoy a pangngarig.

¹⁰ Ket kinunana: Cadacayo maited ti panangammo cadagiti palimed ti pagarian ti Dios; ngem cadagiti sabali biig a pangngarig, tapno uray kitkitaenda saanda a mailasin, ket uray dengdenggenda dida maawatan,

¹¹ Daytoy ngarud ti pangngarig: Ti bin-i isu ti sao ti Dios.

¹² Ket dagiti nagdisso iti asideg ti dalan, isuda dagiti nagdengngeg; iti calpasanna umay ti sairo, ket iccatenna ti sao iti pusoda, tapno dida patien ket dida maisalacan.

¹³ Ket dagiti agdisso iti bato, isuda dagiti idinto a nagdengngegda, awatenda ti sao a siraragsac; ket dagitoy awan ti ramutda; ket mamatida iti apagbiit, ket iti aldaw ti pannacasulisog suminada.

¹⁴ Ket dagiti nagdisso cadagiti cacalunayan, isu dagitoy dagiti nagdengngeg; ket idinto a mapanda iti dalanda, malpesda cadagiti agagawa ken gamgameng ken ragragsac ti daytoy a biag ket dida agbunga ti maloom.

¹⁵ Ket dagiti nagdisso iti nasayaat a daga, isu dagitoy dagiti tao nga iti nasayaat ken nalinteg a puso dinengngegda ti sao ket salimetmetanda ket agbungada a siaanus.

Pangngarig ti silaw.

¹⁶ Ket awan ti tao nga inton nagangatanna ti maysa a silaw, calubanna iti banga, wenno icabilna iti siroc ti maysa a pagidaan; no di ket icabilna iti maysa a pagsilawan tapno dagiti sumrec makitada ti silaw.

¹⁷ Ta awan ti nailemmeng a dinto maiparangarang; ken aniaman a nalimed a dinto maamoan wenno maipanayag.

¹⁸ Imdenganyo ngarud cas mangngegyo; ta siasinoman nga addaan, maicanto pay, ket siasinoman nga awanan, uray ti panpanunutenna a cucuana, maiccatto pay.

Dagiti cacabsat ken ina ni Jesus.

¹⁹ Ket immay ni inana ken dagiti cacabsatna; ket dida macaasideg ken cuana gapu cadagiti adu a tattao.

²⁰ Ket naibaga kencuana: Ni inam ken dagiti cacabsatmo actatacderda iti ruar, a cayatdaca a kitaen.

²¹ Ngem isu simmungbat ket kinunana cadacuada: Ti inac ken dagiti cacabsatco isuda dagiti dumngeg ken mangtungpal iti sao ti Dios.

Ni Jesus pagtalnaenna ti bagio.

²² Ket naaramid iti maysa cadagidi nga aldaw, nga isu limmugan iti maysa a barangay ken dagidi adalanna. Ket kinunana cadacuada: Intayo idiay bangir ti danaw. Ket nagluasda.

²³ Ngem idi nga aglaylayagda, isu naturog. Ket nagbagio idi danaw ket matintinepda ken agpeggadda.

²⁴ Ket immasidegda kencuana, ket riniingda a kinunada: Mannursuro, mannursuro, mapucawtayon! Ket idi nacariing, tinubngarna di angin ken ti daleg ket nagtalnada, ket naglinac.

²⁵ Ket kinunana cadacuada: Adino ti yan ti pammatiyo? Ket isuda nagbutengda a sisisiddaaw a cuncuna ti maysa ken maysa cadacuada: Ania a cababalin ti tao daytoy ta uray ti angin ken danum bilinenna ida ket agtulnogda kencuana?

Ti taga Gadara a nagun-gan dagiti sairo.

²⁶ Ket dimtengda iti daga ti Gadara, nga adda iti batug ti Galilea.

²⁷ Ket idi dimsaag ni Jesus iti daga, simmabet kencuana ti maysa a tao a taga Ili nga adda sairona iti nabayagen nga aldaw, ket saan nga agpagpagananay, di met nagtaeng iti aniaman a balay, no di cadagiti tanem.

²⁸ Ket isu idi makitana ni Jesus nagrucbab iti sangoananna ket nagpuccaw a kinunana: Ania ti pacaibiangac kenca, Jesus, Anac ti Dios a Cangatoan? Dawatec a dinac coma parigaten.

²⁹ Ta ibilbilinna idi iti espiritu a narugit a pumanaw coma idi tao: ta nabayag a nalugananen; ket uray ipuppupocda cawaran ken grillosanda, peccaenna ida ket impan ti sairo cadagiti let-ang.

³⁰ Ket ni Jesus inintuudna kencuana a kinuna: Ania ti naganmo? Ket kinunana: Sangarbaanan; ta adu a sairo ti simrec kencuana.

³¹ Ket dawdawatenda kencuana a dina coma ibaon ida a mapan iti yuyeng.

³² Ket adda idiay idi ti maysa nga arban ti adu a babuy nga agararab iti bantay, ket dinawatda kencuana a baybayanna coma ida a sumrec cadacuada; ket pinalubosanna ida.

³³ Ket idi rimmuaren dagiti sairo idi tao, simrecda cadagidi babuy; ket di arban timmappuac iti maysa a teppang iti danaw ket nalmesda.

³⁴ Ket idi nakita dagiti agtartaraken ti naaramid, timmarayda, ket impacaammoda iti Ili ken cadagiti awaway.

³⁵ Ket rimmuarda a cumita iti naaramid ket immayda ken Jesus; ket nasaracanda daydi tao a rinuaran dagiti sairo, a sipapagananay ken sinanakem, nga nagtugaw iti sacaanan ni Jesus; ket nagbutengda.

³⁶ Ket sinarita cadacuada dagidi nacakita, no casano ti pannacapaimbag daydi nagungan dagiti sairo.

³⁷ Ket amin dagiti umili iti Gadara dinawatda kencuana a panawanna coma ida: ta adda dackel a butengda. Ket isu limmugan iti barangay, ket nagawid,

³⁸ Ket daydi tao a rinuaran dagiti sairo, nagdawat tapno agian kencuana: ngem ni Jesus pinagawidna, a kinunana:

³⁹ Agawidca idiay balaymo ket saritaem ti dackel a banag nga inaramid ti Dios kenca. Ket napan nga inwarragawagna iti isu-amin nga Il-ili dagiti amin nga imbag nga inaramid ni Jesus kencuana.

Ti balasang ni Jairo: ti babai a masakit iti panagbulos ti dara.

⁴⁰ Ket napasamac nga idi nagsubli ni Jesus, dagiti adu a tao inawatda a siayat ta isuda amin nagururayda kencuana.

⁴¹ Ket adtoy, immay ti maysa a lalaki a managan Jairo; isu a panguloen ti sinagoga, ket nagrucnoy cadagiti sacsaca ni Jesus, ket kiniddawna kencuana a sumrec coma iti balayna;

⁴² Ta adda cacaisuna nga anacna a babai nga agsangapulo ket dua ti tawenna ket nganngani matay. Ngem idi a magmagna, nagaaribongbong dagiti tattao kencuana.

⁴³ Ket maysa a babai, nga agsagsagaba iti panagbulos ti dara iti sangapulo ket dua a taoenen, isu rinaritna cadagiti mangngagas ti amin a cucuana, ket awan ti nacapaimbag kencuana,

⁴⁴ Immasideg iti licudan ni Jesus, ket sinagidna ti gayadan ti pagan-anayna; ket naigiddato a nagsardeng ti panagbulos ti darana.

⁴⁵ Ket kinuna ni Jesus: Asino ti nangsagid caniac? Ket idinto a naglibacda amin, kinuna ni Pedro ken dagiti caduana: Mannursuro, dagiti adu a tao iletandaca ken agaaribongbonda kenca.

⁴⁶ Ngem kinuna ni Jesus: Adda nangsagid caniac; ta naricnac nga adda rimmuar a pannacabalin caniac.

⁴⁷ Ket idi makita di babai a saan a macalinged, immay nga agpigpigerger ket nagrucno iti sangoananna, ket imbagana iti sangoanan dagiti amin nga umili ti gapu ti nangsagidanna kencuana ken ti pannacaigiddatonna a napaimbag.

⁴⁸ Ket isu kinunana: Anacco, ti pammatim pinasalun-atnaca: incan a sitatalna.

⁴⁹ Ket idi agsasao pay laeng, immay ti maysa a naggapu iti balay ti panguloen ti sinagoga a cuncunana: Tay anacmo a babai natayen, dica bannogen ti Mannursuro.

⁵⁰ Ngem idi mangngeg ni Jesus, simmungbat kencuana; dica agbuteng: mamatica laeng, ket isu mapasalun-atto.

⁵¹ Ket idi dimteng iti balay, awan ti pinasrecna a sumurot kencuana, no di laeng da Pedro ken Santiago ken Juan ken ti ama ken ina di balasang.

⁵² Ket agsangsangitda amin ket dungdung-awanda. Ngem isu kinunana: Dicay agsangit; ta saan a natay, no di ket matmaturog.

⁵³ Ket rinabrabacda, ta ammoda a natayen.

⁵⁴ Ngem isu, idi nga iniggamanna iti imana, nagpuccaw a kinunana: Balasang, bumangonca.

⁵⁵ Ket nagsubli ti espirituna ket bimmangon a dagus; ket imbilinna nga iccanda coma ti canenna.

⁵⁶ Ket dagiti dadackelna nagsidsiddaawda; ngem isu imbilinna cadacuada, nga awan coma ti pangibagaanda iti naaramid.