San Lucas 7 - Ti Biblia (1973)

Ti Centurion wenno panguloen dagiti tao a nagigam sadi Capernaum.

¹ Idi naipalawagnan amin dagitoy a banag cadagiti umili a nagdengngeg kencuana simrec idiay Capernaum.

² Ket ti maysa nga adipen a dongdongoen ti maysa a Centurion, adda idi a masakit ket nganngani matay.

³ Ket idi nangngegna ti maipapan ken Jesus, imbaonna kencuana dagiti panglacayen dagiti Judio, tapno cararaganda nga umay coma ket agasanna ti adipenna.

⁴ Ket isuda, idi dimtengda ken Jesus kinararaganda iti naganetget a cunada: Maicari nga ipaaymo kencuana daytoy;

⁵ Ta ayatenna ti naciontayo ket isu imbangonannatayo ti sinagogatayo.

⁶ Ket ni Jesus simmurot cadacuada. Ngem idi nacaasidegdan iti balay ti Centurion nangibaon ti gagayyemna a nagcuna kencuana: Apo, saanca nga agbannog, ta diac maicari a sumrecca iti uneg ti balayco;

⁷ Siac pay diac impapan a maicariac nga umay kenca: ngem agsaoca laeng ket ti adipenco umimbagto.

⁸ Ta siac idinto a taoac a naisaad iti babaen ti turay adda met iturayac a solsoldado, ket cunac itoy: Inca, ket mapan; ket iti sabali; Umayca, ket umay; ket iti adipenco: Aramidem daytoy, ket aramidenna.

⁹ Ket idi mangngeg ni Jesus dagitoy, nagsiddaawanna; ket simmango cadagiti tattao a sumursurot kencuana, ket kinunana: Cunac cadacayo, nga uray iti Israel diac pay nacasarac ti castoy a cadackel ti pammati.

¹⁰ Ket dagiti naibaon idi nagawidda iti balay, nadanonda a nasalunaten daydi adipen.

Ti anac ti balo sadi Nain.

¹¹ Ket naaramid iti calpasan bassit daytoy, nga isu napan iti Ili a managan Nain ket kimmuyog kencuana dagidi adalanna ken adu unay a tattao.

¹² Ket idi nacaasidegda iti ruangan ti Ili, adtoy nga iruarda ti maysa a natay, bugbugtong nga anac ni inana isu a balo; ket adu dagiti tao iti Ili kimmuyogda kencuana.

¹³ Ket idi nakita ti Apo nakipagricna ket kinunana kencuana: Dica agsangit.

¹⁴ Ket immasideg ket sinagidna ti lungon; ket dagiti nagawit nagsardengda. Ket cunana: Baro, cunac kenca, Bumangonca.

¹⁵ Ket bimmangon daydi natay ket nangrugi a nagsao. Ket inyawatna ken inana.

¹⁶ Ket nagbutengda amin ket dinaydayawda ti Dios a cuncunada: Ti maysa a dackel a mammadto timmaud cadatayo; ket ti Dios sinarungcaranna dagiti tattaona.

¹⁷ Ket nagracurac daytoy a damagna iti isu-amin a Judea, ken iti pay met amin a daga a cabangibang.

Dagiti imbaon ni Juan a Bautista.

¹⁸ Ket dagidi adalan ni Juan impadamagda kencuana dagitoy amin a naar-aramid.

¹⁹ Ket idi inayaban ni Juan dagiti dua cadagiti adadalanna, imbaonna ida iti Apo, tapno cunaenda: Sica daydi unay wenno urayenmi ti sabali?

²⁰ Ket idi napanda kencuana, kinunada: Ni Juan a Bautista imbaonnacami kenca, a cunaenmi: Sica daydi umay wenno urayenmi ti sabali?

²¹ Iti daydi nga horas inagasanna dagiti adu cadagiti sacsakit ken an-annayen, ken cadagiti espiritu a dakes: ket iniccanna ti pannacakita dagiti adu a bulsec.

²² Ket simmungbat ni Jesus ket kinunana cadacuada: Incayo, ket saritaenyo ken Juan dagiti banbanag a nakita ken nangngegyo: a dagiti bulsec macakitada, dagiti pilay magnada, dagiti agcucutel nadalusanda, ket dagiti tuleng macangngegda, dagiti natay nagungarda, ket cadagiti napanglaw naicascasaba cadacuada ti naimbag a damag.

²³ Ket nagasat ti siasinoman a dinto macasarac caniac ti pacaitibcolan.

²⁴ Ket idi pimmanawdan dagiti imbaon ni Juan, nangrugi a nagsao cadagiti adu a tao iti maipapan ken Juan: Ania ti rinuaranyo a kinita idiay let-ang? Maysa a rono a ginargaraw ti angin?

²⁵ Ngem ania ti rinuaranyo a kinita? Maysa a tao a nacawesan iti pagananay a nalapat? Adtoy, dagiti nacacawes iti pagananay a napateg, ken agbiag cadagiti nam-ay, addada cadagiti palacio dagiti arari.

²⁶ Ngem ania ti rinuaranyo a kinita? Maysa a mammadto? Wen, cunac cadacayo, ket nangnangrona pay ngem maysa a mammadto.

²⁷ Daytoy isu ti nacaisuratan daydi: Adtoy, ibaonco ti baonec iti sangoanam, isu a mangisagananto ti dalanmo ti sacbaymo.

²⁸ Ta cunac cadacayo a cadagiti nayanac cadagiti babbai, awan ti dacdackel ngem ni Juan; nupay casta ti basbassit iti pagarian ti Dios, dacdackel ngem isu.

²⁹ Ket amin dagiti umili ken dagiti agsingsingir ti buis, idi nangngegda dinaydayawda ti Dios idinto a nabautizaranda iti pammautizar ni Juan.

³⁰ Ngem dagiti Fariseo ken dagiti mamasirib ti linteg sinukirda ti panggep ti Dios, a maipaay cadacuada ta dida pinabautizaran kencuana.

³¹ Ket kinuna ti Apo: Asino, ngarud, ti pangipadisac cadagiti tao itoy a caputotan ket ania ti caaspingda?

³² Umaspingda cadagiti ubing nga agtutugaw iti plaza, nga agiinnikis ti maysa ken maysa cadacuada; a cunada: Dacami tinocarandacayo ti flauta, ket dicay nagsala: indung-awandacayo ket dicay nagsangit.

³³ Ta immay ni Juan a Bautista, a di mangan ti tinapay, ken di met uminum ti arac, ket cunayo: Adda sairona.

³⁴ Immay toy Anac ti tao, a mangan ken uminum, ket cunayo: Adtoy ti maysa a tao a manangan ken managinum ti arac, gayyem dagiti agsingsingir ti buis ken dagiti managbasol!

³⁵ Nupay casta ti kinasirib mapanecnecan gapu cadagiti amin nga annacna.

Ti babai a managbasol a nangsapsapo cadagiti sacsaca ni Jesus.

³⁶ Ket dinawat ti maysa cadagiti Fariseo a makipangan coma kencuana. Ket simrec iti balay ti Fariseo ket simmango iti panganan.

³⁷ Ket adtoy ti maysa a babai a managbasol nga adda iti Ili ket idi a naammoanna a ni Jesus adda a simmango iti panganan idiay balay daydi Fariseo; nangyeg ti maysa a fraskita ti bangbanglo.

³⁸ Ket idinto nga agtatacder nga agsangsangit iti licudan dagiti sacsaca ni Jesus rinugianna a sinibugan ida cadagiti luluana ket pinunasanna ida cadagiti boocna ket inagagepanna ken sinapsapoanna ida ti bangbanglo.

³⁹ Ngem idi nakita daytoy daydi Fariseo a nangawis kencuana, kinuncunana iti pununotna: Daytoy, no coma no mammadto, ammona coma no asino ken no ania a kita ti babai daytoy a mangsagid kencuana, ta isu managbasol.

⁴⁰ Ket ni Jesus simmungbat ket kinunana kencuana: Simon, adda ibagac kenca. Ket isu cunana: Ibagam, mannursuro.

⁴¹ Maysa a nagpautang adda dua a nacautang kencuana: ti maysa nacautang kencuana ti lima gasut a denario, ket ti maysa lima pulo,

⁴² Ket gapu ta awan ti pagbayadda, pinacawanna ida nga agpadpada. Asino cadagitoy ngarud ti agayatto kencuana iti adadu?

⁴³ Ket simmungbat ni Simon, a nagcuna: Pagarupec a daydiay nangpacawananna ti adu. Ket isu kinunana kencuana: Nalinteg ti panangipatom.

⁴⁴ Ket idinto a simmango idi babai, kinunana ken Simon: Makitam daytoy babai? Simrecac iti balaymo, saanca a nangted ti danum a maipaay cadagitoy sacsacac, ngem daytoy, sinibuganna dagitoy sacsacac cadagiti luluana ket pinunasanna ida cadagiti boocna.

⁴⁵ Saannac nga inagepan; ngem daytoy, nanipud itay simrecac; saan a nagsardeng nga immungngo cadagiti sacsacac.

⁴⁶ Saanmo a sinapsapoan toy oloc iti lana; ngem daytoy sinapsapoanna ti bangbanglo dagiti sacsacac.

⁴⁷ Gapuna cunac kenca, dagiti basbasolna, nga adu mapacawanda, ta nagayat ti adu; ngem iti mapacawan ti bassit, bassit ti panagayatna.

⁴⁸ Ket kinunana kencuana: Dagiti basbasolmo mapacawanda.

⁴⁹ Ket dagiti adda a nakisango kencuana iti panganan rinugianda a kinuncuna iti panunotda: Asino daytoy, a mamacawan pay cadagiti basbasol?

⁵⁰ Ket kinunana idi babai: Ti pammatim insalacannaca; incan a sitatalna.