San Lucas 6 - Ti Biblia (1973)

Ni Jesus, Apo ti aldaw a panaginana.

¹ Ket napasamac iti maysa nga aldaw a panaginana a lumab-labas cadagiti namulaan a talon ket dagiti adalanna nagalada cadagiti dawa ket binucsilanda cadagiti imimada ket kinnanda.

² Ngem dagiti dadduma a Fariseo kinunada: Apayapay aramidenyo ti saan a maipalubos nga aramiden iti aldaw a panaginana?

³ Ket simmungbat ni Jesus ket kinunana cadacuada: Dicay pay nabasa aya ti inaramid ni David idi nagbisin isu ken dagidi caduana;

⁴ No casano ti iseserrecna iti balay ti Dios ket innalana dagiti tinapay a sidadaya iti altar, ket nangan ket iniccanna met dagidi kimmuyog kencuana; isu a di maipalubos a canen ti uray siasino no di laeng dagiti papadi?

⁵ Ket kinunana cadacuada: Toy Anac ti tao isu ti Apo ti aldaw a panaginana.

Pannacaagas ti maysa a tao nga adda maysa nga imana a nagango.

⁶ Ket napasamac iti sabali nga aldaw a panaginana, nga isu simrec iti sinagoga ket nangisursuro; ket adda idi ti maysa a tao idiay ket ti imana a macanawan nagango.

⁷ Ket isu palpaliiwen dagiti escriba ken dagiti Fariseo no mangagas iti aldaw a panaginana, tapno macasaracda ti pangipulonganda kencuana.

⁸ Ngem isu ammona dagiti panunotda; ket kinunana idi tao nga nagango ti imana; Tumacderca ket agpatengngaca. Ket isu timmacder ket nagpatengnga.

⁹ Ket ni Jesus kinunana cadacuada: Intuudec cadacayo: Maipalubos iti aldaw a panaginana ti panagaramid ti naimbag wenno ti dakes? ti panangisalacan ti biag wenno ti panangpucaw kencuana?

¹⁰ Ket idinto a kinitana ida amin iti sibayna, cunana idi tao: Unnatem ta imam, ket isu inaramidna, ket ti imana immimbag.

¹¹ Ngem napnoda ti gura ket nagsasaoda iti maysa ken maysa no ania ti mabalinda coma nga aramiden ken Jesus.

Pannacapili dagiti sangapulo ket dua.

¹² Ket napasamac cadagidi nga aldaw nga immuli iti bantay nga agcararag, ket nagpatnag iti panagcararagna iti Dios.

¹³ Ket idi bimmigaten inayabanna dagiti adalanna ket pimmili ti sangapulo ket dua cadacuada, isuda a ninaganna met ti apostoles:

¹⁴ Nga isuda: da Simon, a ninaganna ti Pedro, ken ni Andres a cabsatna, ken ni Santiago ken ni Juan ken ni Felipe ken ni Bartolome.

¹⁵ Ken ni Mateo ken ni Tomas, ken ni Santiago nga anac ni Alfeo, ken ni Simon, a managan Naregta.

¹⁶ Ket ni Judas cabsat ni Santiago, ken ni Judas Iscariote a nagbalin a mangliliput.

¹⁷ Ket simmalog a nakicuyog cadacuada, ket nagsardeng iti disso a nasimpa, ket ti dackel a bonggoy dagiti adalanna, ken umariwecwec nga umili iti isu-amin a Judea ken ti Jerusalem, ken ti igid ti baybay ti Tiro ken Sidon, a napanda nga agdengngeg kencuana, ken tapno mapaimbagda cadagiti sacsakitda;

¹⁸ Ken dagiti pinarparigat dagiti espiritu a narugit, naagasanda.

¹⁹ Ket amin dagiti umariwecwec a tattao inagawaanda a sagiden: ta rumuar kencuana ti pannacabalin, ket pinaimbagna amin ida.

Ti panangascasabana idiay bantay.

²⁰ Ket isu intannawagna dagiti matana cadagiti adalanna, ket kinunana: Nagasatcayo a napanglaw, ta cucuayo ti pagarian ti Dios.

²¹ Nagasatcayo a mabisbisinan ita ta mapneccayto. Nagasatcayo nga agsangsangit ita; ta agragragsaccayto.

²² Nagasatcayo inton guraendacayto dagiti tattao, ken inton pagtalawendacayto cadacuada, ket pagsasaoandacayo ket umsienda ti naganyo a cas la dakes gapu itoy Anak ti tao.

²³ Agrag-ocayo iti dayta nga aldaw ket aglagtocayo iti ragsac: ta adtoy, ti gonggonayo dackelto sadi langit: ta casta met laeng ti inaramid dagidi ammada cadagiti mammadto,

²⁴ Ngem asicay pay, a babacnang! ta inawatyon ti liuliwayo.

²⁵ Asicay pay a sipepennec ita! ta agbisincayonto. Asicay pay nga agcatcatawa ita! ta agdung-aw ken agsangitcayto.

²⁶ Asicay pay, inton amin dagiti tao idaydayawdacayo! Ta casta met laeng ti inaramid dagiti ammada cadagiti sinan mammadto.

²⁷ Ngem cunac cadacayo nga agdengdengngeg: Ayatenyo dagiti cabusoryo: agaramidcay ti naimbag cadagiti gumura cadacayo,

²⁸ Agsaocay ti naimbag cadagiti mangilunod cadacayo, ket icarcararaganyo dagiti mangranggas cadacayo.

²⁹ Ti cumabil kenca iti maysa a pingping, iparangmo pay kencuana ti bangir; ket ti mangala kenca iti cagaymo, dica igawid kencuana ti pagananaymo pay.

³⁰ Ket iccam dagiti amin nga agkiddaw kenca; ket ti mangala iti cucuam, saanmo a dawatenen kencuana.

³¹ Ket no casano ti cayatyo nga aramiden coma dagiti tao cadacayo, casta met ti aramidenyo cadacuada.

³² Ket no ayatenyo dagiti agayat cadacayo, ania a kita ti parabur ti adda cadacayo? ta uray dagiti managbasol ayatenda met dagiti agayat cadacuada.

³³ Ket no agaramidcayo ti naimbag cadagiti agaramid ti naimbag cadacayo, ania a kita ti parabur ti adda cadacayo? Ta dagiti managbasol casta met ti aramidenda.

³⁴ Ket no pabuludanyo dagiti namnamaenyo a pangawatan, ania a kita ti parabur ti adda cadacayo? ta dagiti managbasol agpabulodda met cadagiti managbasol, tapno castanto met ti awatenda.

³⁵ Ngem ayatenyo dagiti cabusoryo; ket agaramidcay ti naimbag, ket agpabulodcayo a di mangnamnama a pulos ket dackelto ti gonggonayo, ket annacnacayonto ti Cangatoan: ta isu manangngaasi uray pay cadagiti managinlilipat ken managdacdakes.

³⁶ Agbalincayo coma a manangngaasi a cas ken ni Amayo a manangngaasi.

³⁷ Ket saancayo nga agipato, tapno didacayto met ipato: ket dicayo mangdusa ket dicayto met madusa: mamacawancayo ket mapacawancayto met;

³⁸ Mangtedcayo ket maiccancayto; sucat a naimbag, napenpen, nasedsed ken agliplippias ti maitedto met iti saclotyo: ta ti rucod a pangrucodyo isunto met laeng ti pacarucodanyo.

³⁹ Ket sinaona met cadacuada ti maysa a pangngarig: Mabalin ngata ti bulsec nga idalan ti padana a bulsec? Didanto ngata matnag nga agpadpada iti abut?

⁴⁰ Ti adalan saan a natantan-oc ngem ti mannursuro kencuana; ngem ti tunggal adalan nga awan pagcuranganna, umaspingto iti mannursurona.

⁴¹ Ket apayapay kitaem ti puling a bassit nga adda iti mata ni cabsatmo, ket dica mabigbig ti pasanggir nga adda ita matam met laeng?

⁴² Wenno casano ti pannacabalinmo nga agcuna ken cabsatmo: Cabsat, palubosannac a mangiccat ti puling nga adda dita matam, idinto a sica dica makita ti pasanggir nga adda ita matam? Managinsisingpet, iccatem pay nga umuna dita matam ti pasanggir ket iti casta makitamto a nalawag ti pannangiccat ti puling nga adda iti mata ni cabsatmo.

⁴³ Ta awan ti nasayaat a cayo a mangted ti bunga a dakes ket awan met ti cayo a dakes a mangted ti bunga a nasayaat.

⁴⁴ Ta ti tunggal cayo mailasin iti bungana met laeng, ta saan a macaala dagiti tao ti higos cadagiti espino, ket dida met macapuros ti uvas cadagiti zarza.

⁴⁵ Ti naimbag a tao iti nasayaat a gameng ti pusona iruarna ti naimbag; ket ti dakes a tao iti dakes a gameng iruarna ti dakes: ta iti nawadwad iti puso saoen ti ngiwatna.

⁴⁶ Ket apayapay awagandac iti: Apo, Apo, ket dicay aramiden ti ibagac?

⁴⁷ Ti tunggal maysa nga umay caniac ket denggenna dagiti saoc ket aramidenna ida, ipakitacto cadacayo no asino ti cayariganna:

⁴⁸ Maipadis iti maysa a tao a mamangbangon ti maysa a balay, isu a nagcali ket pinaunegna, ket incabilna ti cimientona iti rabaw ti bato; ket idi immay ti layus, nagayus ti napigsa idiay a balay, ket dina nagaraw ta nabangon a natibker.

⁴⁹ Ngem ti dumngeg ket saan nga agaramid, maipadis iti maysa a tao a nangbangon ti maysa a balay iti daga, nga awan ti cimiento, isu dinungpar ti ayus a sipepegges, ket dagus a natuang; ket dackel ti pannacadadael daydi a balay.