San Lucas 5 - Ti Biblia (1973)

Ti calap a datdatlag. Dagiti immuna nga adalanna.

¹ Ket naaramid nga idi aguummong dagiti adu a tattao iti yanna, tapno denggenda ti sao ti Dios, isu a sitatacder iti igid ti danaw ti Gennezaret;

² Ket nakitana ti dua a barangay nga addada iti asideg ti igid ti danaw; ngem dagiti agcalcalap dimsaagda cadacuada ket inugugasanda dagiti iketda.

³ Ket isu limmugan iti maysa cadagiti barangay, nga isu daydi cucua ni Simon, ket dinawatna kencuana nga iyadayuna bassit iti daga; ket idi nacatugaw iti barangay, insursurona dagiti adu a tattao.

⁴ Ket idi nagsardeng a nagsao, kinunana ken Simon: Agpataawca ket iwayatyo dagiti iketyo ta cumalapcay pay.

⁵ Ket simmungbat ni Simon ket kinunana kencuana: Mannursuro, nagbannogcami a nagpatpatnag ket awan ti naalami; nupay casta gapu iti saom iwayatco.

⁶ Ket idi nga inaramidda daytoy, nacasacawda ti adu unay nga ican, ket nabesbessang dagiti iketda;

⁷ Ket sininiasanda dagidi casugponda iti sabali a barangay, ta umayda coma tulungan ida; ket immayda ket pinunnoda dagiti dua a barangay ket iti casta arilennedanda.

⁸ Ket idi makita daytoy ni Simon Pedro, nagparintumeng iti sangoanan ni Jesus, a kinunana: Adaywannac Apo, ta taoac a managbasol.

⁹ Gapu ta nasdaaw isu ken dagiti amin nga adda a caduana, agsipud ti pannacacalapda cadagiti ican a naalada;

¹⁰ Ken casta met da Santiago ken Juan nga annac ni Zebedeo, a casugpon ida ni Simon. Ket ni Jesus kinunana ken Simon: Dica agbuteng; manipud ita mangngalapcanto cadagiti tattao,

¹¹ Ket idi naisang-atdan dagiti barangay, pinanawanda amin ket simmurotda kencuana.

Pannacaagas ti maysa nga agcucutel.

¹² Ket napasamac nga idi adda iti maysa cadagiti ili, adtoy ti maysa a tao a nalungpus ti cucutel, ket idi nakitana ni Jesus, nagrucbab ket nagdawat kencuana a cuncunana: Apo, no cayatmo, mabalinnac a dalusan.

¹³ Idin inunnatna ti imana ket sinagidna a cunana: Cayatco; madalusanca coma. Ket naigiddato a di cucutel pimmanaw kencuana.

¹⁴ Ket isu imbilinna kencuana a dina sasaoen iti uray siasino: Ngem inca, agparangca iti padi ket mangidatonca a maipaay iti pannacadalusmo, cas imbilin ni Moises, tapno pacapnecanda.

¹⁵ Ngem nagsacnap iti adadu ti damagna ket naguurnong ti adu a tao nga agdengngeg ken paagasan cadagiti sacsakitda.

¹⁶ Ngem isu nagpacni nga napan cadagiti let-ang ket nagcarcararag.

Pannacaagas ti maysa a di macagunay.

¹⁷ Ket napasamac iti maysa cadagidi nga aldaw nga isu adda a manursuro, ket dagiti Fariseo ken mamasirib iti linteg addada nga agtutugaw, isuda a naggapu iti isu-amin a puroc ti Galilea, ken ti Judea ken Jerusalem: ket ti pannacabalin ti Apo adda kencuana tapno mangagas.

¹⁸ Ket adtoy dagiti tao a nangipan ti maysa a tao a di macagunay nga adda ti pagiddaan: ket sapsapulenda ti pangiserrecanda ken ti pangicabilanda kencuana iti sangoananna.

¹⁹ Ket idi nga awan masaracanda a pangiserrecan kencuana agsipud ti caadu ti tao, immulida iti tuctoc ti balay ket manipud idiay imbabada agraman ti nagiddaanna idi tengnga iti sangoanan ni Jesus.

²⁰ Ket isu idi makitana ti pammatida, kinunana: Tao, dagiti basbasolmo mapacawanda kenca.

²¹ Ket dagiti escriba ken dagiti Fariseo rinugianda a pinanunot a kinuna: Asino daytoy nga agsasao iti tabbaaw? Asino ti macabalin a mamacawan cadagiti basbasol no saan laeng a ti Dios?

²² Ngem ni Jesus idi naawatanna dagiti panpanunotda, sinungbatanna ida a kinuna: Ania ti panpanunutenyo cadagiti puspusoyo?

²³ Ania ti nalaclaca, ti panagcuna: Dagiti basbasolmo mapacawanda kenca; wenno ti panagcuna: Tumacderca ket magnaca?

²⁴ Ngem tapno maamoanyo a toy Anac ti tao adda pannacabalinna ditoy daga a mamacawan cadagiti basbasol, (cunana idi saan a macagunay): Cunac kenca: Tumacderca, ket bagcatem ta iddam, ket inca iti balaymo.

²⁵ Ket dagus a timmacder iti sangoananda, ket binagcatna daydi nagiddaanna, ket napan iti balayna a day dayawenna ti Dios.

²⁶ Ket nagsiddaawda amin ket dinaydayawda ti Dios; ket napnoda ti buteng a cuncunada: Nacakitacami ti datdatlag ita.

Pannacaayab ni Levi.

²⁷ Ket idi nalpas dagitoy, rimmuar ket nacakita ti maysa nga agsingsingir ti buis a managan Levi, a situtugaw iti pagsingiran cadagiti buis, ket kinunana kencuana; Surutennac.

²⁸ Ket pinanawanna amin dagidi, ket timmacder ket simmurot kencuana.

²⁹ Ket inyaramidan ni Levi ti dackel a daya iti balayna ket adda idi ti dackel a gimong dagiti agsingsingir ti buis ken sabsabali nga adda idi a nakisango cadacuada iti panganan.

³⁰ Ket dagiti Fariseo ken dagiti escriba idiay nagtanabutobda ket kinunada cadagiti adalanna: Apayapay makipangan ken makiinumcayo cadagiti agsingsingir ti buis ken cadagiti managbasol?

³¹ Ket simmungbat ni Jesus ket kinunana cadacuada: Dagiti sisasalun-at saanda a masapul ti mangngagas, no di ket dagiti masakit.

³² Saanac nga immay nga agayab cadagiti nalinteg, no di ket cadagiti managbasol iti panagbabawi.

Ti panagayunar.

³³ Ket kinunada kencuana: Dagiti adalan ni Juan masansan nga agayunarda ken agcararagda, ket casta met dagiti adalan dagiti Fariseo, ngem dagiti adalam mangan ken uminumda.

³⁴ Ket ni Jesus kinunana cadacuada: Mabalinyo a pagayunaren dagiti catulungan ti pagbodaan no ti novio adda pay la a maicuyog cadacuada?

³⁵ Ngem dumtengto dagiti aldaw a maiccatto cadacuada ti novio; ket iti casta agayunardanto cadagidiay nga aldaw.

³⁶ Ket kinunana met cadacuada ti maysa a pangngarig: Awan ti tao a mangitacup ti lupot a baro iti daan a pagananay; ta no casta ti baro pigisenna ti daan ket saan met a mainumo ti panagtinnacup ti baro ken daan.

³⁷ Ket awan ti mangicabil ti baro nga arac cadagiti daan a supot a lalat; to no casta, ti baro nga arac bettakennanto dagiti lalat, ket ti arac maibel-lengto ket madadaelto dagiti lalat.

³⁸ Ngem ti baro nga arac rebbengna ti maicabil cadagiti babbaro a lalat.

³⁹ Ket awan ti tao nga idinto a nacainum ti arac a baac, calicagumanna ti baro; ta cunana; Nasaysayaat ti baac.