San Lucas 3 - Ti Biblia (1973)

Panagcascasaba ni Juan a Bautista.

¹ Ket idi tawen a maicasangapulo ket lima a panag-emperador ni Tiberio Cesar, idi agdama a gobernador sadi Judea ni Poncio Pilato, ket ni Herodes tetrarca sadi Galilea, ket ni cabsatna a Felipe, tetrarca sadi Iturea ken ti provincia ti Traconite, ket ni Lisanias, tetrarca sadi Abilinia.

² Ken idi agdama a panguloen dagiti papadi da Anas ken Caifas, immay ti sao ti Apo ken Juan, anac ni Zacarias, iti let-ang.

³ Ket isu napan cadagiti amin a daga iti arubayan ti Jordan a mangicascasaba iti pammautizar ti panagbawi a maipaay iti pannacaicat dagiti basbasol;

⁴ Cas adda a naisurat iti libro dagiti sasao ni mammadto nga Isaias a cunana: Timec ti maysa nga agaw-awag iti let-ang: Isaganayo ti dalan ti Apo, Palintegenyo dagiti danana.

⁵ Amin a baet ti banbantay mapnonto, ket maipababanto amin a bantay ken turod, ket ti nakil-lo malintegto, ket dagiti dalan a dakes mapalanasdanto.

⁶ Ket ti amin a lasag makitananto ti panangisalacan ti Dios.

⁷ Ket cunana cadagidi adu a tattao nga immaway a pabautizaran kencuana: O caputotan dagiti carasaen, asino ti namalacad a pumanawcayo iti pungtot nga umayto?

⁸ Agaramidcay ngarud ti bungbunga, a maicari iti panagbabawi, ket dicay agpanunot a cunaenyo: Adda ni Abraham a pannacaamami: ta cunac cadacayo a ti Dios mabalinna ti mamatacder cadagitoy a batbato ti annac ken Abraham.

⁹ Ket itatta met laeng ti wasay naisaaden iti ramut dagiti caycayo: amin a cayo ngarud, a saan nga agbunga ti nasayaat mapucan, ket maisungrod iti apuy.

¹⁰ Ket dagiti adu a tao nagintuudda kencuana a cuncunada: Ania ngarud ti rebbengmi nga aramiden?

¹¹ Ket simmungbat a kinunana cadacuada: Ti adda dua a pagananayna, ibingayanna ti awanan; ket ti adda canenna, casta met ti aramidenna.

¹² Ket immayda met dagiti agsingsingir ti buis tapno pabautizaranda, ket kinunada kencuana: Manursuro, ania ti rebbengmi nga aramiden?

¹³ Ket isu kinunana cadacuada: Saancayo nga agsingir ti adadda, ngem ti naibilin cadacayo.

¹⁴ Ket dagiti soldado inintuudda met kencuana a kinuna: Ket dacami, ania ti rebbengmi nga aramiden? Ket kinunana cadacuada: Saancayo nga agaramid ti ranggas iti uray asino, ket dicay mangpabpabasol; ket yamanenyo ti tangdanyo.

¹⁵ Ket idi nga cas la dagiti amin a tattao panpanunutenda cadagiti puspusoda ti maipapan ken Juan, no isu ni Cristo;

¹⁶ Simmungbat ni Juan a kinunana cadacuada amin: Siac, kinapudnoanna, bautizarancayo iti danum; ngem umayto ti sabali nga adadda ti pannacabalinna agem siac, isu a diac maicari a mangwarwar iti galut ti zapatosna: isu bautizarannacayto iti Espiritu Santo ken ti apuy;

¹⁷ Ti paidna adda iti imana, tapno sapridanna a naimbag ti pagbayoanna ken tapno urnongenna ti trigo iti camaligna; ngem puurannanto ti taep iti apuy a di maiddep.

¹⁸ Ket agraman dagiti adu pay a sabsabali a bagbaga, incasabana cadagiti tattao dagiti naimbag a damag;

¹⁹ Ngem ni Herodes a tetrarca, idinto a binabalaw ni Juan gapu ken Herodias, babai nga asawa ni cabsatna, ken gapu iti amin a kinadakes nga inararamid ni Herodes.

²⁰ Innayonna pay cadagiti isu-amin, daytoy; nga inpupocna ni Juan iti pagbaludan.

Pannacabautizar ni Jesus.

²¹ Ket naaramid, nga idi nabautizaran dagiti amin a tattao, ni Jesus nabautizaran met, ket idi nga agcarcararag, ti langit naglucat,

²² Ket bimmaba kencuana ti Espiritu Santo a nasimbubukel a cas la calapati, ket nangngeg ti maysa a timec ti langit: Sica ti Anacco a dungdungoen, maayayoac unay kenca:

Ti tinaudan ni Jesus.

²³ Ket ni Jesus met laeng, idi nangrugi iti trabajona agtawen ti cas tal-lopulo, ket (cas impagarupda idi) anac ni Jose, anac ni Eli,

²⁴ Nga anac ni Matat, nga anac ni Levi, nga anac ni Melqui, nga anac ni Jane, nga anac ni Jose.

²⁵ Nga anac ni Matatias, nga anac ni Amos, nga anac ni Nahum, nga anac ni Esli, nga anac ni Nage,

²⁶ Nga anac ni Maat, nga anac ni Matatias, nga anac ni Semei, nga anac ni Jose, nga anac ni Juda,

²⁷ Nga anac ni Joana, nga anac ni Resa, nga anac ni Zorobabel, nga anac ni Sealtiel, nga anac ni Neri.

²⁸ Nga anac ni Melqui, nga anac ni Adi, nga anac ni Cosam, nga anac ni Elmodam, nga anac ni Er.

²⁹ Nga anac ni Josue, nga anac ni Eliezer, nga anac ni Jorim, nga anac ni Mata, nga anac ni Levi,

³⁰ Nga anac ni Simeon, nga anac ni Judas, nga anac ni Jose, nga anac ni Jonan, nga anac ni Eliaquim.

³¹ Nga anac ni Melea, nga anac ni Mena, nga anac ni Matata, nga anac ni Natan, nga anac ni David,

³² Nga anac ni Jesse, nga anac ni Obed, nga anac ni Booz, nga anac ni Salmon, nga anac ni Naason,

³³ Nga anac ni Aminadab, nga anac ni Aram, nga anac ni Esrom, nga anac ni Fares, nga anac ni Juda,

³⁴ Nga anac ni Jacob, nga anac ni Isaac, nga anac ni Abraham, nga anac ni Tare, nga anac ni Nacor,

³⁵ Nga anac ni Serug, nga anac ni Ragau, nga anac ni Peleg, aga anac ni Heber, nga anac ni Selah,

³⁶ Nga anac ni Cainan, nga anac ni Arfaxad, nga anac ni Sem, nga anac ni Noe, nga anac ni Lamec,

³⁷ Nga anac ni Matusalem, nga anac ni Enoc, nga anac ni Jared, nga anac ni Mahalaleel, nga anac ni Cainan,

³⁸ Nga anac ni Enos, nga anac ni Set, nga anac ni Adam, nga anac ti Dios.