San Lucas 24 - Ti Biblia (1973)

Ti panagungar.

¹ Ket iti umuna nga aldaw ti lawas, iti agsapa unay napanda iti tanem, nga incuyogda dagiti bangbanglo nga insaganada.

² Ket nasaracanda ti bato a naligsay idi tanem.

³ Ket simrecda ket saanda a nasaracan ti bagi ni Apo Jesus.

⁴ Ket naaramid, nga idi addada a silalagaw gapu itoy, adtoy a nagsardeng iti dinnada dagiti dua a lallaki a nagcawes ti macapurar:

⁵ Ket gapu ta nagbutengda indumogda dagiti rupada iti daga, ket kinuna dagiti lallaki cadacuada: Apayapay sapulenyo cadagiti natay ti sibibiag?

⁶ Awan ditoy, no di ket nagungaren: laglagipenyo ti insaona cadacayo, idi adda pay laeng idiay Galilea.

⁷ A cuna: Masapul a ti Anac ti tao maiyawat cadagiti ima dagiti tao a managbasol, ken mailansa iti cruz, ken agungar iti maicatlo nga aldaw.

⁸ Ket nalagipda dagidi saona.

⁹ Ket nagawidda nanipud iti tanem, ket impadamagda, amin dagitoy cadagiti sangapulo ket maysa ken cadagiti isu-amin pay met a sabsabali.

¹⁰ Ket da Maria Magdalena, ken Juana ken ni Maria nga ina ni Santiago, ken dagiti sabsabali a caduada; sinaoda dagitoy a banag cadagiti apostol.

¹¹ Ket dagitoy a saoda, impapanda nga arapaap ket dida ida pinati.

¹² Ngem timmacder ni Pedro ket timmaray a napan idi tanem: ket idi a nagdumog, nakitana dagiti lupot a nailasin: ket nagawid a sisisiddaaw itoy a naaramid.

Dagiti dua nga adalanna iti dalan sadi Emmaus.

¹³ Ket adtoy, ti dua cadacuada napanda iti daydi met la nga aldaw iti maysa a puroc, a managan Emmaus nga dua a legua ti caadayuna idiay Jerusalem.

¹⁴ Ket agsarsaritada a duddua cadagiti amin a banag a napasamac.

¹⁵ Ket naaramid, nga idi agsasaoda, ken agsinsinnaludsudda, ni Jesus met laeng immasideg ket nakicuyog cadacuada.

¹⁶ Ngem dagiti matada nacul-laapanda, tapno isu dida mailasin.

¹⁷ Ket kinunana cadacuada: Ania a sarsarita dagitoy a sasaoenyo iti maysa ken maysa iti panpannagnayo? Ket nagsardengda a sililiday.

¹⁸ Ket simmungbat ti maysa, a managan Cleofas, ket kinunana kencuana: Sicsica laeng ti sangsangaili sadi Jerusalem, a dica ammo dagiti banag a naaramid sadiay cadagitoy nga aldaw?

¹⁹ Idin kinunana cadacuada: Ania a banbanag? Ket simmungbatda: Dagiti maipapan ken Jesus a Nazareno, isu a lalaki idi a mammadto, mannacabalin iti aramid ken sao iti sangoanan ti Dios ken ti isu-amin nga umili:

²⁰ Ken no casano ti panangyawatda kencuana dagiti turayen dagiti papadi ken dagiti agturaytayo tapno maipato a matay, ken ti panangilansada kencuana iti cruz.

²¹ Ngem dacami ur-urayenmi idi nga isu coma ti manubbot iti Israel; wen ken sabali pay amin dagitoy, daytoy ti maicatlo nga aldawen nanipud idi naaramid dagitoy a banag.

²² Uray pay met dagiti dadduma a babbai cadagiti cadcaduami pinagsiddaawdacami, isuda nga itay dipay bimmigat napanda iti tanem;

²³ Ket idi dida nasaracan ti bagina, immayda a cuncunada a nacakitada met ti maysa a buya dagiti angel isuda a nagcuna nga isu sibibiag.

²⁴ Ket napan dagiti dadduma cadagiti caduami iti tanem, ket nasaracanda cas insao dagiti babbai; ngem isu saanda a nakita.

²⁵ Ket kinunana cadacuada: O nacuneng a tattao ken naladaw ti panagpuspusoyo a mamati cadagiti isu-amin a sinao dagiti mammadto!

²⁶ Saan aya a masapul idi a ni Cristo lac-amenna dagitoy a banag ken sumrec iti gloriana?

²⁷ Ket idinto a rinugianna manipud ken Moises ken dagiti isu-amin a mammadto, impalawagna cadacuada dagiti amin a sursurat a mangsarita iti maipapan kencuana.

²⁸ Ket immasidegda iti puroc a papananda, ket isu impakitana a cas la mapan iti adadayu.

²⁹ Ngem isuda ingawidda a kinunada: Agbatica cadacami, ta rumabiin ket nalabes ti horasen. Ket isu simrec a nagbati cadacuada.

³⁰ Ket naaramid nga idi nakisango cadacuada iti panganan, innalana ti tinapay, ket binendicionanna, ket pinisina ket intedna cadacuada.

³¹ Ket naglawag dagiti matada ket nabigbigda; ket isu nagpucaw cadagiti panagkitada.

³² Ket kinunada iti maysa ken maysa: Saan aya a rumayrayray ti pusota iti unegta, itay madama nga agsasao iti dalan, ken itay ilawlawagna cadata dagiti Sursurat?

³³ Ket timmacderda iti daydi met la nga horas, ket nagsublida sadi Jerusalem, ket nasaracanda a nagoornong dagidi sangapulo ket maysa, ken dagiti adda a nakipaggian cadacuada.

³⁴ Nga cuncunada: Nagungar a pudno ti Apo ket nagparang ken Simon.

³⁵ Ket dagitoy sinaritada met dagiti naaramid iti dalan, ken no casano ti pannacailasinda kencuana idi pinisina ti tinapay.

Panagparparang ni Jesus cadagiti sangapulo ket maysa nga Apostol.

³⁶ Ket idi madamada a sasaoen dagitoy a banag, ni Jesus nagtacder iti nagtengngaanda ket kinunana cadacuada: Talna cadacayo!

³⁷ Ngem isuda nakigtot ken nagbutengda, ket impapanda a nacakitada ti maysa nga espiritu.

³⁸ Ngem isu kinunana cadacuada: Apayapay agkigtotcayo, ket apayapay rumasuc dagiti panagpanpanunot iti pusoyo?

³⁹ Kitaenyo dagiti ima ken sacac, ta siac met laeng; aricapendac ket kitaenyo: ta ti espiritu awan ti lasag ken tulangna, a cas makitayo nga adda caniac.

⁴⁰ Ket idi naisaona daytoy, impakitana cadacuada dagiti imana ken sacana.

⁴¹ Ket idi dida pay la patien gapu iti ragsac ken panagsidsiddaawda, kinunana cadacuada: Adda cadacay ditoy ti aniaman a macan?

⁴² Ket intedda kencuana ti sangcagerret nga ican a natuno ken bassit a tasa ti diro.

⁴³ Ket isu innalana ket nangan iti sangoananda.

⁴⁴ Ket kinunana cadacuada: Dagitoy dagiti sao nga insaoc cadacayo, idi addaac pay laeng cadacayo: A masapul a matungpal dagiti isu-amin a banag a naisurat a maipapan caniac iti Linteg ni Moises, ken cadagiti mammadto ken cadagiti Salmos.

⁴⁵ Idin linawaganna dagiti isipda, tapno maawatanda dagiti Sursurat;

⁴⁶ Ket kinunana cadacuada: Casta ti adda a naisurat ken masapul a ti Cristo agsagaba, ken agungar cadagiti natay iti maicatlo nga aldaw;

⁴⁷ Ket maicascasaba ti naganna ti panagbabawi ken ti pannacasubbot dagiti basbasol cadagiti isu-amin a nacion, a mangrugi iti Jerusalem.

⁴⁸ Ket dacayo dagiti macasacsi cadagitoy a banag.

⁴⁹ Ket adtoy, ibaonco ti cari ni Amac cadacayo; ngem agnaedcayo iti ciudad a Jerusalem, agingga iti maramenancayo iti pannacabalin ti ngato.

Ti iyuuli.

⁵⁰ Ket inyawayna ida idiay Betania, ket intayagna dagiti imana, ket binendicionanna ida.

⁵¹ Ket naaramid nga idi benbendicionanna ida, pimmanaw cadacuada: ket naipangato sadi langit.

⁵² Ket isuda, iti calpasan ti panagdayawda kencuana, nagsublida idiay Jerusalem a siraragsac unay:

⁵³ Ket naggigianda nga agnanayon iti Templo a nagdaydayaw ken nagyaman iti Dios.