San Lucas 23 - Ti Biblia (1973)

Ni Jesus iti sangoanan ni Pilato ken iti saclang ni Herodes.

¹ Ket timmacderda amin ket impanda iti sangoanan ni Pilato.

² Ket rinugianda nga impulong a cuncunada: Daytoy nasaracanmi a daddadaelenna ti ilimi ket iparitna ti mangted ti buis ken Cesar ket cuncunana nga isu ni Cristo, nga Ari.

³ Ket ni Pilato inintuudna kencuana a cunana: Sica ti Ari dagiti Judio? Ket isu simmungbat ket kinunana: Casta ti cunam.

⁴ Ket ni Pilato kinunana cadagiti turayen dagiti papadi ken cadagiti tattao: Awan ti bassol a masaracac itoy a tao.

⁵ Ngem ipapilitda laeng a cuncunada: Riribukenna dagiti umili, a mangisursuro iti isu-amin a Judea, ket mangrugi idiay Galilea agingga ditoy.

⁶ Ket ni Pilato, idi a mangngegna daytoy, inintuudna no di tao taga Galilea.

⁷ Ket apaman a naammoanna a casacupan ni Herodes, isu imbaonna ken Herodes nga adda met sadi Jerusalem cadagidi nga aldaw.

⁸ Ket ni Herodes, idi makitana ni Jesus, nagragsac iti napalalo, ti nabayagen a tartarigagayanna nga makita; ta isu adu ti nangnangngegna kencuana, ket ninamnamana ti macakita ti maysa a datdatlag nga aramidenna,

⁹ Ket nagintuudanna iti adu; ngem isu saanna a sinungbatan.

¹⁰ Ket addada dagiti turayen dagiti papadi ken dagiti escriba nga ipulpulongda a napalalo.

¹¹ Ket ni Herodes agraman dagiti guardiana linaisda ket nagang-angawanda nga pinel-lesanda ti maysa a napateg a pagananay; ket pinaisublina ken Pilato.

¹² Ket naggayyemda da Pilato ken Herodes iti daydi met la nga aldaw, ta idi damo aggurangurada.

¹³ Ket ni Pilato inurnongna dagiti turayen dagiti papadi, dagiti agtuturay ken dagiti umili.

¹⁴ Ket kinunana cadacuada: Insaclangyo caniac daytoy a tao a cas la mangdaddadael cadagiti umili; ket adtoy siac sinukimatco iti sangoananyo ket awan ti basol a nasaracac kencuana cadagiti pangipulonganyo.

¹⁵ Ket uray pay ni Herodes ta imbaoncayo kencuana: ket adtoy, nga awan ti inaramidna a maicari iti pannacapapatay.

¹⁶ Isu wayawayaacto ngarud calpasan pannacasaplitna.

¹⁷ (Ta adda rebbengna cadacuada a mangibbet ti maysa a balud iti tunggal rambac)

¹⁸ Ngem nagickisda amin a nagmaymaysa, a kinunada: Pucawem daytoy, ket ibbatam cadacami ni Barrabas:—

¹⁹ Isu a naibel-leng iti pagbaludan gapu iti maysa nga yaalsa a naaramid iti ciudad, ken gapu iti maysa a panangpapatay.

²⁰ Ket ni Pilato kinasaona manen ida a tartarigagayanna nga ibbatan ni Jesus;

²¹ Ngem nagickisda a cuncunada: Pailansam, pailansam iti cruz.

²² Ket kinunana cadacuada iti maicatlo a daras: Apayapay, ania aya ti dakes nga inaramid daytoy a tao? Awan ti nasaracac kencuana a pacaigapuan ti ipapatay: dusaecto laeng, ket ibbatacton.

²³ Ngem ipapilitda iti dacdackel a timec a dawdawatenda a mailansa coma iti cruz. Ket dagiti ickisda pumigpigsa.

²⁴ Ket ni Pilato inkeddengna a maaramid ti dawatda.

²⁵ Ket inibbatanna cadacuada daydi naipisoc iti pagbaludan gapu iti yaalsa ken panangpapatay isu a dinawatda ngem inyawatna ni Jesus iti pagayatanda.

Ni Jesus iti dalan Golgota.

²⁶ Ket idi impanda ti tiniliwda ti maysa a managan Simon, a taga Cirene a naggapu iti away ket impabaclayda kencuana ti cruz, tapno isurotna ken Jesus.

²⁷ Ket simmursurot ti dackel a caadu ti umili, ken babbai, isuda a mangsangsangit ken mangdungdung-aw kencuana.

²⁸ Ngem ni Jesus, idi a timmaliaw cadacuada, kinunana: Babbai nga annac ti Jerusalem, saandac a sangitan, ngem sangitanyo ketdi ti bagiyo met laeng, ken dagiti annacyo.

²⁹ Ta adtoy nga umayda dagiti aldaw a cuncunadanto: Nagasat dagiti lupes, ken dagiti tian, a di naganac, ken dagiti barucong a di nagpasuso.

³⁰ Iti dayta rugiandanto ti agsao cadagiti banbantay: Agtinnagcayo cadacami: ket cadagiti turod: Gaburandacami.

³¹ Tao no iti cayo a nalangto aramidenda dagitoy a banag, Ania ti aramidendanto iti nagango?

Ti panangilansa.

³² Ket impacuyogda met kencuana ti dua a tulisan, tapno mapapatayda.

³³ Ket idi macagtengda iti disso a managan ti Bangabanga, isu inlansada idiay iti cruz ken dagiti tulisan; maysa iti macanawan, ket ti sabali iti macatigid.

³⁴ Ket ni Jesus kinunana: Ama, pacawanem ida, ta dida ammo ti aramidenda. Ket nagbibingayanda a naggiginnasatanda dagiti pagananayna.

³⁵ Ket dagiti umili sitatacderda nga agbuybuya; ket dagiti agtuturay a naicuyog cadacuada inuyunganda, a cuncunada: Dagiti sabsabali isalacanna: isalacanna ngad coma met ti bagina, no isu ti Cristo a pinili ti Dios.

³⁶ Ket casta met dagiti soldado, rinabrabngisda met nga umasidegda ket igaygayatda kencuana ti suca.

³⁷ Ket cuncunada: no sica ti Ari dagiti Judio, isalacanmo ta bagim met laeng.

³⁸ Ket adda met iti oloanna ti maysa a galad a naisurat: DAYTOY ISU TI ARI DAGITI JUDIO.

³⁹ Ket maysa cadagidi tulisan nga adda a nailansa iti cruz rabrabngisenna, a cuncunana: No sica ni Cristo isalacanmo ta bagim met laeng ken dacami.

⁴⁰ Ngem simmungbat di maysa ket binabalawna a kinunana: Uray sica dica pay cabuteng ti Dios idinto nga addaca ngaruden iti pannacadusa?

⁴¹ Ket data, kinapudnoanna, a rebbengta nga awaten ti maitutop cadagiti araramidta; ngem daytoy awan ti dakes nga inaramidna.

⁴² Ket kinunana: Jesus, laglagipennac inton umayca iti pagariam.

⁴³ Ket kinunana kencuana. Pudno cunac kenca. Ita nga aldaw makipagiancanto caniac idiay Paraiso.

⁴⁴ Ket idin cas la horas a maicanem, nagsipnget iti rabaw ti amin a daga agingga iti horas a maicasiam.

⁴⁵ Ket ti init nagsipnget. Ket ti abbong ti Templo napigis iti tengngana.

⁴⁶ Ket ni Jesus immawag iti dackel a timec, ket kinunana: Ama, cadagita imam ti pangitalcac itoy cararuac. Ket idi a nasaonan nauyusanen.

⁴⁷ Ket idi nakita ti centurion ti naaramid, indaydayawna ti Dios, a kinunana; Kinapudnona a daytoy a tao nalinteg.

⁴⁸ Ket amin dagiti adu a tao a naguurnong iti daytoy a buyaen, idi nakitada daydi a naaramid, nagawidda a dandanugenda dagiti barucongda.

⁴⁹ Ket amin dagidi amammona ken dagiti babbai a simmursurot kencuana nanipud Galilea, nagtactacderda iti adayu nga agbuybuya cadagitoy a naaramid.

Ti pannacaitanem ni Jesus.

⁵⁰ Ket adtoy ti maysa a tao a managan Jose, consejero, lalaki a naimbag ken nalinteg,

⁵¹ (Isu dina inanamungan ti nagnunumoan ken aramidda), taga Arimatea, ili dagiti Judio, isu nga agpadpadaan met idi ti pagarian ti Dios:

⁵² Daytoy napan ken Pilato ket dinawatna ti bagi ni Jesus.

⁵³ Ket idi imbabana binungonna iti maysa nga ules ket incabilna iti maysa a tanem a bato a kinungcungan isu nga awan pay ti naitanem.

⁵⁴ Ket aldaw idi ti Panagsagana ket nganngani aglawag iti aldaw a pannaginana.

⁵⁵ Ket dagiti babbai a naicuyog kencuana a naggapu sadi Galilea, simmurotda met, ket nakitada ti tanem ken no casano ti pannacaicabil ti bagina.

⁵⁶ Ket nagawidda ket nagsaganada ti bangbanglo ken sapsapo; ket naginanada iti aldaw a panaginana cas ti bilin.