San Lucas 22 - Ti Biblia (1973)

Ti pateg ti liput.

¹ Ket asideg idi ti fiesta ti awan levadurana a tinapay a managan Pascua.

² Ket dagiti panguloen dagiti papadi ken dagiti escriba agsapsapulda ti pamuspusan ti panangpapatayda kencuana; ta nagbutengda cadagiti umili.

³ Ket simrec ni Satanas ken Judas; a napanaganan ti Iscariote, isu a maysa cadagiti sangapulo ket dua.

⁴ Ket napan ket nakisao cadagidi panguloen dagiti papadi ken cadagiti capitan, no casano ti panangyawatnanto kencuana cadacuada.

⁵ Ket nagrag-oda ket nagtutulaganda nga isu iccanda ti pirac.

⁶ Ket inanamungana ket nagsapul iti nasayaat a panangyawat kencuana cadacuada, inton awan dagiti adu a tao.

Ti camaudianan a Pascua: ti nasantoan a panangrabii.

⁷ Ket dimteng ti aldaw ti awan levadurana a tinapay nga isu ti pannacasapul a maparti ti carnero ti Pascua.

⁸ Ket imbaonna da Pedro ken Juan, a kinunana: Incayo, agsaganacay iti maipaay cadatayo iti Pascua tapno mangantayo.

⁹ Ket kinunada kencuana: Adino ti cayatmo a pangisaganaanmi?

¹⁰ Ket kinunana cadacuada: Adtoy, inton macasreccayo iti ciudad, masaracannacayto ti maysa a tao a nagawit ti maysa a caramba ti danum: isu ti surutenyo agingga iti balay a sercanna.

¹¹ Ket cunaenyo iti akincua iti balay: Ti Mannursuro cunana kenca: Adino ti yan ti pacasangailiac a panganac ti pascua agraman dagiti adadalac?

¹² Ket isu ipakitananto cadacayo ti maysa a dackel a salas a naarcosan; agsaganacay idiay.

¹³ Napanda ngarud, ket nasaracanda a cas imbagana cadacuada: ket insaganada ti pascua.

¹⁴ Ket idi dimteng ti horas, simmango agraman cadagiti sangapulo ket dua nga apostol.

¹⁵ Ket kinunana cadacuada: Tinarigagayac iti nasged unay ti makipangan cadacayo iti daytoy a pascua, ita ta diac pay agsagaba:

¹⁶ Ta cunac cadacayo a diacto manganen agingga iti matungpal ti pagarian ti Dios.

¹⁷ Ket nangala ti maysa a copa ket idi nacapagyamanen kinunana: Alaenyo daytoy, ket bingbingayenyo cadacayo:

¹⁸ Ta cunac cadacayo a diacto uminumen manipud ita iti bunga ti uvas, agingga iti umay ti pagarian ti Dios.

¹⁹ Ket innalana ti tinapay, ket idi nacapagyamanen pinisina ket intedna cadacuada a kinunana: Daytoy isu ti bagic, a maited gapu cadacayo: aramidenyo daytoy a panglaglagip caniac.

²⁰ Ket casta met ti copa, iti calpasan ti panangrabiida, kinunana: Daytoy a copa isu ti baro a tulag iti darac, a maibuyat gapu cadacayo.

²¹ Ngem adtoy, ti ima ti mangyawat caniac adda a nailanglang caniac iti panganan.

²² Ta ti kinapudnona, ti Anac ti tao mapan; a cas adda a naipato; ngem, asipay dayta tao a mangyawat!

²³ Ket rinugianda a sinapsapul cadacuada met laeng, no asino ngarud cadacuadanto ti mangaramidto iti daytoy.

Ti cadackelan isu ti cas la cabassitan.

²⁴ Ket nabangon cadacuada ti maysa a supiat: no asino cadacuada ti cas la cadackelan.

²⁵ Ket isu kinunana cadacuada: Dagiti arari dagiti Gentil iturayanda ida: ket dagiti addaan turay cadacuada, managanda ti managparabur.

²⁶ Ngem dacayo, saan a casta; no di ket, ti dacdackel cadacayo isu coma ti cas la basbassit; ket ti agturay isu coma ti cas la agservi.

²⁷ Ta asino ti dacdackel, ti sumango iti panganan wenno ti agservi? Saan a ti sumango iti panganan? Ngem cadacayo siac ti cas la agservi.

²⁸ Ngem dacayo dagiti nagtalinaed caniac cadagiti pannacasusuotco;

²⁹ Ket siac ipatagicuac cadacayo ti maysa a pagarian a cas ti panangipatagicua ni Amac caniac.

³⁰ Tapno macapangan ken macainumcayo iti panganac iti pagariac; ket agtugawcayto cadagiti trono a mangocom cadagiti sangapulo ket dua a tribu ti Israel.

Mapacaammoan ni Pedro.

³¹ Kinuna met ti Apo: Simon, Simon, adtoy ni Satanas dinawatnacayo tapno iriidennacayo a cas la trigo:

³² Ngem siac indawatanca tapno ti pammatim saan coma a mapucaw: ket sica inton macapagbabawican, pabilgem dagiti cacabsatmo.

³³ Ket kinunana kencuana: Apo, sisasaganaac a sumurot kenca uray pay iti pagbaludan ken iti patay.

³⁴ Ket kinunana: Pedro, cunac kenca a dinto pay agtaraoc ti cawitan ita, nailibacmonton a mamitlo nga dinac amammo.

Dagiti dua a campilan.

³⁵ Ket kinunana cadacuada: Idi imbaoncayo nga awan supot ti cuarta, pagbalonan ken awan zapatos, adda aniaman a nagcurang cadacayo? Ket kinunada: Awan.

³⁶ Ket kinunana cadacuada: Ngem ita, ti adda supot ti cuartana alaenna, ket casta met ti pagbalonanna, ket ti awanan, ilacona ti cagayna ket gumatang ti campilan.

³⁷ Ta cunac cadacayo, a masapul a matungpal caniac daytoy adda a naisurat: Ket naibilang cadagiti managdacdakes ta dagiti banbanag a maipapan caniac adda pannacatungpalda.

³⁸ Idin kinunada: Apo, adtoy ti dua a campilan. Ket isu kinunana cadacuada: Umanayen.

Ni Jesus idiay Getsemani.

³⁹ Ket immaway ket napan, cas cadawyanna, iti Bantay dagiti Olivo: ket dagiti adalanna simmurotda met kencuana.

⁴⁰ Ket idi dimteng idiay a disso, kinunana cadacuada: Agcararagcayo tapno dicay masulisog.

⁴¹ Ket isu immadayu cadacuada iti cas las magaw-at a batoen; ket nagparintumeng ket nagcararag,

⁴² A kinunana: Ama, no pagayatam, iyadayum cadi daytoy a copa caniac; nupay casta, saan coma a maaramid, ti pagayatac no di ti pagayatam.

⁴³ Ket nagparang ti maysa nga angel ti langit a nangpabileg kencuana.

⁴⁴ Ket idi nga agtutuoc unay, nagcararag iti nasnasged: ket nagling-et iti cas la cadagiti tedted ti dara a nagtinnag iti daga.

⁴⁵ Ket idi timmacder iti panagcararagna, napan cadagiti adalanna ket nasaracanna ida a nacaturog gapu iti sennaay,

⁴⁶ Ket kinunana cadacuada: Apayapay maturogcayo? Bumangoncayo ket agcararagcayo, tapno dicay masulisog.

Pannacatiliw ni Jesus.

⁴⁷ Ket idi nga adda pay laeng nga agsasao, adtoy ti maysa a dackel a bonggoy; ket daydi managan Judas, maysa cadagiti sangapulo ket dua, isu ti namangulo cadacuada; ket immasideg ken Jesus tapno umagep kencuana.

⁴⁸ Ngem ni Jesus kinunana kencuana: Judas, iti maysa nga agep iyawatmo ti Anac ti tao?

⁴⁹ Ket idi nakita dagiti adda a naicuyog kencuana ti maaramid kinunada kencuana: Apo, tagbatenmi iti campilan?

⁵⁰ Ket maysa cadacuada tinagbatna ti maysa a tagabu ti turayen dagiti papadi, ket piningasna ti lapayagna a macanawan.

⁵¹ Ngem simmungbat ni Jesus ket kinunana: Bay-anyo, agingga itoy. Ket sinagidna ti lapayagna ket isu inagasanna.

⁵² Ket ni Jesus kinunana cadagiti turayen dagiti papadi ken dagiti agturay ti Templo ken dagiti lallacay a napan kencuana: Immawaycayo aya a cas bumusor iti maysa a tulisan, a nagtagicampilan ken nagtagipangor?

⁵³ Idi nakipaggianac cadacayo nga inaldaw idiay Templo saanyo nga inunnat dagiti imimayo a pangtiliw caniac; ngem daytoy ti horasyo, ken ti pannacabalin dagiti sipnget.

Ni Pedro ilibacna ni Jesus.

⁵⁴ Ket idi natiliwdan, impanda iti balay ti cangatoan dagiti papadi Ket ni Pedro simmursurot kencuana iti adayu.

⁵⁵ Ket idi a nangpasgedda iti tengngati patio, ket nagtutugawda a nagtataripnong nakicatugaw ni Pedro cadacuada.

⁵⁶ Ket idi nakita ti maysa a babai nga adipen nga adda a nakicatugaw iti asideg ti apuy, isu minatmatanna, ket kinunana: Daytoy naicuycuyog met kencuana.

⁵⁷ Ngem inlibacna a kinunana: Babai isu diac amammo.

⁵⁸ Ket idi madamdama bassit, isu nakita ti sabali ket kinunana: Maysaca met cadacuada: Ngem ni Pedro kinunana: Tao, saan a siac.

⁵⁹ Ket idi nalabes ti cas la maysa nga horas, pinanecnecan ti sabali a sitatalged a nagcuna: Pudno a daytoy nakicuycuyog met kencuana, ta isu taga Galilea.

⁶⁰ Ngem ni Pedro kinunana: Tao, diac ammo dayta sasaoem. Ket naigiddato, idi nga agsasao pay laeng, a ti cawitan nataraoc.

⁶¹ Ket timmaliaw ti Apo ket kinitana ni Pedro: ket ni Pedro nalagipna ti sao ti Apo, nga insaona kencuana: Casangoanan ti panagtaraoc ti cawitan ita, nailibacnacton a mamitlo.

⁶² Ket rimmuar ket nagsangit ti napait unay.

Ni Jesus iti sangoanan ti Sanedrin wenno gimong dagiti papadi dagiti Judio.

⁶³ Ket dagiti tao nga nangaywan kencuana, inuy-uyunganda ken kinabcabilda.

⁶⁴ Ket inabbunganda dagiti matana, dinisnogda ti rupana ket sinaludsuda kencuana a cuncunada: Padtoam: siasino ti kimmabil kenca?

⁶⁵ Ket adu pay ti sabali nga insaoda a nacas-ang a pangab-abida kencuana.

⁶⁶ Ket apaman a bimmigat, nagguurnong dagiti lallacay dagiti umili, dagiti turayen dagiti papadi ken dagiti escriba ket impanda iti pangocomanda.

⁶⁷ A kinunada: No sica ti Cristo, ibagam cadacami. Ngem kinunana cadacuada: No ibagac cadacayo, saandacto a patien:

⁶⁸ Ket no agintuudac met, didacto met sugbatan.

⁶⁹ Ngem manipud ita ti Anac ti tao agtugawto iti macanawan ti pannacabalin ti Dios.

⁷⁰ Ket kinunada amin: No casta sica ti Anac ti Dios? Ket isu kinunana cadacuada: Cunayo a siac.

⁷¹ Idin kinunada: Ania pay ti pa casapulantayo ti pangpanecnec? Ta datayo met laeng nangngegtayo iti ngiwatna.