San Lucas 21 - Ti Biblia (1973)

Ti daton ti napanglaw a balo a babai.

¹ Ket idi a timmaliaw, nakitana dagiti babacnang nga ipispisocda dagiti datonda iti pagidulinan cadagiti daton.

² Ket nakitana met ti maysa a napanglaw a balo a babai nga nangipisoc met idiay ti dua a maravilis.

³ Ket kinunana: Kinapudnona cunac cadacayo, a daytoy napanglaw a balo nangicabil ti adadu ngem isuda amin:

⁴ Ta amin dagitoy, nangidatonda iti paset dagiti sobrada; ngem daytoy, iti kinapanglawna, intedna amin ti pagtaraon nga adda kencuana.

Ti cascasaba a padto:—Ti pangrugian dagiti tuoc.

⁵ Ket idi dagiti dadduma imbagada kencuana ti maipapan iti Templo, no casano ti pannacaarcosna cadagiti nalibnos a batbato ken sagsagut, kinunana:

⁶ Cadagitoy a makitayo, umayto dagiti aldaw nga awan ti mabati a bato iti rabaw ti bato a dinto marumec.

⁷ Ket inintuudda kencuana, a kinunada: Mannursuro, caanonto daytoy? Ket anianto ti pagilasinan no mangrugida a maaramid dagitoy a banag?

⁸ Ket kinunana: Kitaenyo, ta dicay coma maal-lilaw; ta adu dagiti umayto iti naganco, a cuncunada: Siac ti Cristo, ket ti tiempo asidegen; dicay suruten ida.

⁹ Ket inton mangngegyo dagiti gubat ken ariwawa, dicay agkigtot; ta masapul a dagitoy a banag maaramidda nga umuna; ngem saanto a maigiddato ti panungpalan.

¹⁰ Idin kinunana cadacuada: Tumacderto ti nacion a makibacal iti sabali a nacion, ti pagarian ken pagarian;

¹¹ Ket addanto dadackel a gingined, ket iti nadumaduma a disso, bisbisin ken baybayangobong: ket addanto maaramid a nacakigkigtot ken dadackel a pagilasinan ti langit.

¹² Ngem inton dipay maaramid amin dagitoy, tiliwendacayto ket idadanesdacayo ket iyawatdacayto cadagiti sinagoga, ken cadagiti pagbaludan, nga ipandacayo iti saclang dagiti arari ken dagiti agturay gapu iti naganco.

¹³ Ket daytoy maaramidto cadacayo a pangpanecnec.

¹⁴ Imaldityo ngarud cadagiti puspusoyo a dicayto agpanunot nga umuna no casanonto ti isusungbatyo:

¹⁵ Ta siac iccancayto ti ngiwat ken sirib a di matngelan ken masalungasing dagiti isu-amin a cabusoryo.

¹⁶ Ngem iyawatdacayto uray pay dagiti dadackelyo ken cacabsat ken cacabagian ken gagayyem: ket addanto papatayenda cadacayo.

¹⁷ Ket caguradacayto dagiti amin a tao gapu iti naganco.

¹⁸ Ngem uray maysa a booc ti oloyo saanto a mapucaw.

¹⁹ Iti panaganusyo macupicupanyonto dagiti cararuayo.

Ti cascasaba a padto (canayon): Ti dackel a tuoc.

²⁰ Ngem inton makitayo ti Jerusalem a malicmut cadagiti buybuyot, ammoenyo a ti pannacarbecna asidegen.

²¹ Dagiti adda iti Judea aglemmengda coma cadagiti banbantay; ket dagiti adda iti tengngana, pumanawda coma; ket dagiti adda cadagiti taltalon, saanda coma a sumrec kencuana.

²² Ta dagitoy isuda dagiti aldaw ti panagibales; tapno matungpal amin dagiti adda a naisurat.

²³ Ngem asipay dagiti masicog ken dagiti agtagtagibi cadagita nga aldaw! ta addanto dackel a rigat iti rabaw ti daga ken gura a maicaniwas itoy nga ili.

²⁴ Ket mapasagdanto iti tadem ti campilan ket maipandanto a macayawan cadagiti amin a nacion: ket ti Jerusalem ibaddecto dagiti Gentil, agingga iti panacatungpal dagiti aldaw dagiti naciones.

Ti cascasaba a padto (canayon): Ti panagsubli ti Anac ti tao.

²⁵ Ket addanto dagiti pagilasinan iti init ken bulan ken cadagiti bitbituen; ket ditoy rabaw ti daga rigat dagiti nacion nga agdanag gapu ti daranudor ti baybay ken dagiti dalluyon;

²⁶ Dagiti tattao agcapuydanto gapu ti buteng ken danagda cadagiti maararamid nga umayto iti amin a daga ta dagiti pannacabalin dagiti langlangit agkintayegdanto.

²⁷ Ket iti dayta makitadanto ti Anac ti tao, nga umayto iti maysa nga ulep agraman ti pannacabalin ken dackel a dayagna.

²⁸ Ngem inton dagitoy a banag mangrugida a maaramid, cumitacayo ket itangadyo dagiti ol-oloyo, ta ti pannacasubbotyo umasidegen.

²⁹ Ket sinaona cadacuada ti maysa a pangngarig: kitaenyo ti cayo nga higos ken dagiti isu-amin a caycayo:

³⁰ Inton aguggutda, makitayo ket ammoyon a ti calgaw asidegen.

³¹ Castacayo met, inton makitayo dagitoy a maararamid, ammoenyo a ti pagarian ti Dios asidegen.

³² Kinapudnona cunac cadacayo, a dinto pay macalabas daytoy a caputotan maaramidton amin dagitoy.

³³ Ti langit ken daga lumbesdanto ngem dagiti saoc didanto lumbes.

Ti cascasaba a padto (panungpalan): Ti panagsalucag.

³⁴ Ket agaluadcayo, di la ket ta dagiti puspusoyo mapnoda ti kinarawet ken panagbartec, ken cadagiti tarigagay itoy a biag ket iti casta umayto a kel-laat cadacayo dayta nga aldaw:

³⁵ Ta cas maysa a silo ti yaaynanto cadagiti amin nga agnaed iti rabaw ti isu-amin a daga.

³⁶ Agsalucagcayo ngarud ken agcarcararagcayo nga agnanayon, tapno macalisicayo cadagitoy amin a maaramid nga umayto, ken macapagtacdercayo iti sangoanan ti Anac ti tao.

³⁷ Ket mangisursuro idi nga inaldaw iti Templo; ket rinabii nga umaway ket agdagus iti bantay a managan ti Caolivaan.

³⁸ Ket amin dagiti umili parbangonenda ti umay agdengngeg kencuana idiay Templo.