San Lucas 20 - Ti Biblia (1973)

Ti pammautizar ni Juan.

¹ Ket naaramid iti maysa cadagidi nga aldaw, nga idi manursuro iti umili idiay Templo ken icascasabana ti naimbag a damag, kinel-laat dagiti panguloen dagiti papadi ken dagiti escriba agraman dagiti lallacay;

² Ket nagsaoda kencuana a kinunada: Ibagam cadacami: Ania ti akinpannacabalin ti pangaramidmo cadagitoy a banag? wenno siasino ti nangted kenca itoy a pannacabalin?

³ Ket simmungbat ket kinunana cadacuada. Siac intuudec met cadacayo ti maysa a banag; ket sungbatandac:

⁴ Ti pammautizar ni Juan naggapu iti langit, wenno cadagiti tao?

⁵ Ket pinacpakinakemda a cuncunada: No cunaentayto: Iti langit; cunananto: Apayapay ngarud a dicay namati kencuana?

⁶ Ngem no cunaentayto: Cadagiti tao; amin dagiti umili uburendatayto ta napnecda a ni Juan maysa a mammadto.

⁷ Ket simmungbatda a dida ammo no adino.

⁸ Ket ni Jesus kinunana cadacuada: Uray siac diac met ibaga cadacayo no ania a pannacabalin ti pangaramidco cadagitoy a banag.

Pangngarig cadagidi agtaltalon a dakes.

⁹ Ket rinugianna a sinao cadagiti umili daytoy a pangngarig: Maysa a tao nagmula ti maysa a cauvasan ket impaabangna cadagiti agtaltalon, ket napan iti sabali a daga iti nabayag.

¹⁰ Ket idi tiempona, nangibaon ti maysa nga adipen cadagidi agtaltalon, tapno itedda kencuana ti abang ti cauvasan; ngem dagidi agtaltalon kinabilda ken pinagawidda nga ongaong.

¹¹ Ket nangibaon manen iti sabali nga adipen; ngem daytoy kinabilda met ket nagsasaoanda iti nacababain unay ket pinagawidda nga onga-ong.

¹² Ket nangibaon manen ti maicatlo; ket sinugatda met ken pinagtalawda.

¹³ Ket ti apo ti cauvasan kinunana: Ania ti aramidecto? ibaonconto ti anacco nga ayayatec: nalabit padayawandanto no makitada.

¹⁴ Ngem dagiti agtaltalon, idi nakitada, nagsasaoda, a kinunada: Daytoy isu ti agtawid; papatayentayo, tapno ti tawid cucuatayto.

¹⁵ Ket isu induronda iti ruar ti cauvasan, ket pinatayda. Anianto ngarud ti aramiden ti apo ti cauvasan cadacuada?

¹⁶ Umayto ket pucawennanto dagitoy nga agtaltalon, ket itednanto ti cauvasanna cadagiti sabali. Ket idi nangngegda, kinunada: Uray caanoman saan coma a casta.

¹⁷ Ngem isu kinitana ida, ket kinunana: Ania ngarud daytoy adda a naisurat: Ti bato nga imbel-leng dagiti agcabcabite, isu ti naaramid a bato a pasuli?

¹⁸ Isuamin a matnag iti dayta a bato maburacto; ngem iti siasinoman a pagtinnagannanto, marumrumecto.

Ti maipapan iti buis.

¹⁹ Ket agawaan dagiti escriba ken dagiti panguloen dagiti papadi a tiliwen iti daydi nga horas; ngem kinabutengda dagiti umili: ta naawatda nga insaona daytoy a pangngarig a maibusor cadacuada.

²⁰ Ket isu sinisiimda, ket nangibaonda cadagiti agsisiim nga aginlalaing tapno matiliwda cadagiti saona ket tapno mayawatda iti pagturayan ken pannacabalin ti gobernador.

²¹ Ket inintuudda kencuana a kinunada: Mannursuro, ammomi nga agsaoca ken manursuroca a nalinteg, ket awan ti panagbutengmo iti tao no di ket isurom a sipupudno ti dalan ti Dios:

²² Maipalubos cadacami ti panagbayad ti buis ken Cesar, wenno saan?

²³ Ngem isu, nadlawna ti sicapda, ket kinunana cadacuada:

²⁴ Ipakitaandac ti maysa a denario. Asino ti akinladawan ken naisurat kencuana? Ket kinunada: Ni Cesar.

²⁵ Ket kinunana cadacuada: Itedyo ngarud ken Cesar ti cucua ni Cesar, ket iti Dios ti cucua ti Dios.

²⁶ Ket saanda a nabalin a tiniliw cadagiti saona iti sangoanan dagiti umili: ket nagsiddaawanda ti sungbatna ket nagulimecda.

Dagiti Saduceo ken ti panagungar.

²⁷ Ket dimteng dagiti dadduma a Saduceo, nga saan a mamati ti panagungar, ket inintuudda kencuana,

²⁸ A cuncuna: Mannursuro, ni Moises imbatiannacami ti surat a no ti cabsat a lalaki nga adda asawana matay, ngem awan putotna, ti cabsat daydi asawaenna coma ti balo, ket iputotanna ti sumuno ken cabsatna.

²⁹ Ngarud adda pitoda nga agcacabsat: ket ti inauna nangala ti asawa a babai, ket natay nga awanan putot:

³⁰ Ket inasawa ti maicadua ket natay met nga awanan putot.

³¹ Ket inasawa manen ti maicatlo, ket casta a nagsasaganad dagidi pito, ket natayda nga awanan putot.

³² Ket iti calpasanna natay met di babai.

³³ Ngarud inton panagungar, asinonto cadacuada ti akinasawa? Ta pitoda a nangasawa kencuana.

³⁴ Ket ni Jesus kinunana cadacuada: Dagiti annac daytoy a lubong mangasawada ken mayasawada:

³⁵ Ngem dagiti maipatonto a maicari iti lubong nga umayto ken ti panagungar dagiti natay, saanda a mangasawa ket dida met mayasawa:

³⁶ Ta didanto matayen: ta capadpada ida dagiti angel, ket annac ida ti Dios, ta annac ida ti panagungar.

³⁷ Ngem, dayta panagungar dagiti natay, ni Moises imparangarangna idi iti denna ti Zarza, idi inawaganna ti Apo, ti Dios ni Abraham, ken Dios ni Isaac, ken Dios ni Jacob.

³⁸ Ta isu saan a Dios dagiti natay, no di ket dagiti sibibiag: ta agbiagda amin a maipaay kencuana.

³⁹ Ket simmungbat kencuana dagiti dadduma cadagiti escriba, ket kinunada: Mannursuro, naimbag ti panagsaom.

⁴⁰ Dida ngarud naitureden ti nagintuud kencuana ti uray ania.

Ti Cristo anac aya ni David.

⁴¹ Ket isu kinunana cadacuada: Casano ti panagcunada a ti Cristo anac ni David?

⁴² Ta ni David met laeng cunana iti libro dagiti Salmos: Ti Apo kinunana iti Apoc: Agtugawca iti macanawanco,

⁴³ Agingga iti panangaramidco cadagiti cabusormo a pagbatayan dagiti sacam,

⁴⁴ Ngarud ni David naganenna ti Apo: Ket casano ngarud nga isu ti Anacna?

Ni Jesus babalawenna dagiti escriba.

⁴⁵ Ket idi a dengdenggen ti isu amin dagiti umili, kinunana cadagiti adalanna:

⁴⁶ Agaluadcayo cadagiti escriba, nga gustoda ti magna a sicacawes iti nagayad, ken ayatenda ti maluglugayan cadagiti plaza ken dagiti natan-oc a tugaw cadagiti sinagoga, ken dagiti cangronaan a lugar cadagiti ramrambac;

⁴⁷ Isuda a mangalun-on cadagiti balbalay dagiti babbai a balo, ket pagpambarda dagiti atiddag a lualo; dagitoy awatendanto ti dacdackel a pannacadusa.