San Lucas 2 - Ti Biblia (1973)

Pannacayanac ni Jesu-Cristo.

¹ Ket napasamac cadagidi nga aldaw a naiwarragawag ti bilin ni Augusto Cesar, nga amin a lubong maipadron.

² Daytoy ti immun-una a naaramid a pannacaipadron, idi naggobernador sadi Siria ni Cirenio.

³ Ket napanda amin idi a pinaipadron tunggal maysa iti ilina.

⁴ Ket ni Jose naggapu idiay Galilea iti ili a Nazaret, simmang-at met sadi Judea, idiay ili ni David, a managan Bet-lehem, gapu ta nagtaud iti balay ken caputotan ni David;

⁵ Tapno paipadron agraman ken Maria, a nakisacsi kencuana isu a masicog idi.

⁶ Ket naaramid, nga idi addada sadiay, nadanunan ti panaganacna.

⁷ Ket impasngayna ti anacna nga inauna, ket binungonna ti lampin, ket impaiddana iti maysa a col-loong; ta awan ti lugarda iti pagdagusan.

Dagiti pastor sadi Bet-lehem.

⁸ Ket adda paspastor idi idiay met laeng a daga nga aggiyan iti away nga agay-aywan nga agpuyat iti rabii cadagiti animalda.

⁹ Ket ti maysa nga angel ti Apo nactacder iti arpadda, ket ti dayag ti Apo linicmutna ida ti raniag; ket nagbutengda unay.

¹⁰ Ket di angel kinunana cadacuada: Dicay agbuteng, ta adtoy, yegancayo ti naimbag a damag ti dackel a ragsac, a maipaayto cadagiti amin a tattao:

¹¹ Ta ita nga aldaw nayanac cadacayo idiay ili ni David, ti maysa a Manangisalacan, isu ti Cristo nga Apo.

¹² Ket daytoy isu ti pagilasinanyo; masaracanyonto ti ubing a nabungon ti lampin, a naipaidda iti maysa a col-loong.

¹³ Ket naigiddato nga adda a naicuyog idi angel ti maysa a dackel a bonggoy dagiti nailangitan nga buybuyot, a nagdaydayaw iti Dios, ket cuncunada.

¹⁴ Dayaw iti Dios idiay cangatoan, Ken talna iti rabaw ti daga, naimbag a nakem cadagiti tattao,

¹⁵ Ket idi nga pinanawan ida dagidi angel a napanda sadi langit, dagidi paspastor nagsasaoda a kinunada: Intayo ngarud idiay Betlehem, ket kitaentayo daytoy a naaramid, nga impacaammo cadatayo ti Apo.

¹⁶ Ket napanda a napardas ket natumpunganda ni Maria ken ni Jose, ken ti ubing a naipaidda iti col-loong.

¹⁷ Ket idi nakitadan, impacaammoda ti damag a naisao cadacuada a maipanggep itoy nga ubing.

¹⁸ Ket amin dagiti nacangngeg, nagsiddaawda cadagiti insao cadacuada dagiti paspastor.

¹⁹ Ngem ni Maria sinalimetmetanna amin dagitoy a banbanag, a pinanpanunot iti pusona.

²⁰ Ket nagawid dagiti paspastor a dinaydayaw ken intantan-ocda ti Dios gapu cadagiti amin a nangngeg ken nakitada, a cas naipacaammo cadacuada.

Pannacugit ken pannacaiparang ni Jesus.

²¹ Ket idi matungpalen ti walo nga aldaw ta isu ti pannacacugit ti ubing, pinanagananda ti JESUS, isu a pinangnagan ti angel idi di pay naisicog.

²² Ket idi natungpal dagiti aldaw ti pannacagugorda, cas ti linteg ni Moises, impanda ti ubing idiay Jerusalem nga iparang iti Apo,

²³ (Cas adda a naisurat iti linteg ti Apo: Amin nga inauna nga anac a lalaki, managanto ti santo a maipaay iti Apo),

²⁴ Ken mangigay at ti daton, cas adda a naisao iti linteg ti Apo: Dua a pagaw wenno dua nga pichon.

Ni Simeon ken ni Ana.

²⁵ Ket adtoy, adda idi ti maysa a lalaki idiay Jerusalem, a managan Simeon; ket daytoy a tao, nasingpet, ken managdaydayaw, agururay idi ti liuliwa ti Israel; ket ti Espiritu Santo adda kencuana.

²⁶ Ket impaltiing kencuana ti Espiritu Santo a dinanto makita ni patay agingga iti makitana ti Cristo ti Apo.

²⁷ Ket simrec iti Templo nga tinignay ti Espiritu. Ket idi inserrecda dagiti dadackel ni ubing a Jesus idiay Templo, tapno aramidenda kencuana cas cadawyan ti linteg.

²⁸ Isu inubbana cadagiti tackiagna, ket dinaydayawna ti Dios, ket kinunana:

²⁹ Apo, ita, palubusamon a matay a sitatalna toy adipenmo, cas ti saom.

³⁰ Ta dagitoy matac nakitadan ti Pacaisalacanan.

³¹ Isu nga insaganam iti sangoanan dagiti amin a tattao;

³² Maysa a silaw a manglawag cadagiti Gentil, Ken dayaw dagiti tattaom nga Israel;

³³ Ket ni amana ken ni inana masmasdaawda cadagidi naisasao a maipapan kencuana;

³⁴ Ket binendicionan ida ni Simeon, ket kinunana ken inana a Maria: Adtoy, daytoy nga ubing; maicabil tapno pacapasagan ken pacaitan-ocan dagiti adu iti Israel, ken poon ti suppiat:

³⁵ Ket maysa nga igam salputennanto met laeng ta cararuam, tapno maiparangarang dagiti panunot dagiti adu a puspuso.

³⁶ Ket adda idi ti maysa a mammadto a managan Ana, anac nga babai ni Fanuel, iti caputotan ni Aser; isu a baket unayen ket nakipagbiag ken asawana iti pito a tawen nanipud idi kinabalasangna.

³⁷ Ket isu balo iti agwalopulo ket uppat a tawen, a di pimmanaw iti Templo, a nagdaydayaw iti Apo iti rabii ken aldaw agraman panagayayunar ken panagcararag.

³⁸ Ket idi immay met iti daydi nga horas, nagyaman iti Dios, ket nagsao ti maipapan idi ubing cadagiti amin nga agururay ti pannacasubbot ti Jerusalem.

³⁹ Ket idi natungpalda aminen cas iti linteg ti Apo, nagsublida sadi Galilea, idiay ilida a Nazaret.

⁴⁰ Ket daydi ubing dimmackel ken pimmigsa, ken napno ti sirib; ket ti gracia ti Dios adda idi kencuana.

Ni ubing a Jesus iti tengnga dagiti mamasirib.

⁴¹ Ket tinawen a mapan dagiti dadackelna sadi Jerusalem iti rambac ti pascua.

⁴² Ket idi agtawen ti sangapulo ket dua, simmang-atda cas cadaoyan ti fiesta;

⁴³ Ket idi napalabasen dagidi nga aldaw, idi agawiddan, nabati ni ubing a Jesus sadi Jerusalem a di ammo dagidi dadackelna;

⁴⁴ Ket agsipud ta impapanda nga adda idi a naicuyog, nagnada iti bayat ti maysa nga aldaw, ket sinapsapulda cadagiti cacabagian ken am-ammoda;

⁴⁵ Ngem agsipud ta dida la masaracan, nagsublida sadi Jerusalem a nangbiruc kencuana.

⁴⁶ Ket naaramid nga idi napalabas ti tal-lo nga aldaw, natumpunganda idi Templo, a situtugaw iti tengnga dagiti mamasirib a dumdumngeg ken agsalsaludsod cadacuada;

⁴⁷ Ket amin dagidi nacangngeg kencuana, nasnasdaawda iti saririt ti isipna ken cadagidi sungbatna.

⁴⁸ Ket idi nakitadan, nagsiddaawda, ket kinuna kencuana ni inana; Anac, apayapay a casta ti inaramidmo cadacami? Adtoy ni amam ken siac silaladingitcami a nagsapsapul kenca.

⁴⁹ Ket isu simmungbat cadacuada: Apayapay sinapsapuldac? Dicay ammo a masapul a sangoec dagiti banbanag ni Amac?

⁵⁰ Ngem dida naawatan dagiti sao nga imbagana cadacuada.

⁵¹ Ket simmalog a nakicuyog cadacuada ket simmangpet idiay Nazaret, ket nagtulnog cadacuada. Ket ni inana sinalimetmetanna iti pusona amin dagitoy a masasao.

⁵² Ket ni Jesus dimmackel iti kinasirib ken kinatayag, ken ti gundaway iti Dios ken cadagiti tao.