San Lucas 19 - Ti Biblia (1973)

Ni Zaqueo nga agsingsingir ti buis.

¹ Ket idinto a simrec limmabas sadi Jerico,

² Ket adtoy ti maysa a lalaki a managan Zaqueo, ket daytoy isu idi ti turayen dagiti agsingsingir ti buis, ket nabacnang.

³ Ket inagawaanna a kinita ni Jesus no asino, ngem saanna a nabalin gapu cadagiti adu a tao, ta pandec, saan a natayag.

⁴ Ket timmaray iti masangoananna, ket immuli iti maysa a cayo a sicomoro, tapno isu kitaenna; ta lumabas sadiay.

⁵ Ket idi dimteng ni Jesus idiay a disso, tinangadna ket kinunana kencuana: Zaqueo, umulogca daras ta ita masapul nga agdagusac idiay balaymo.

⁶ Ket immulog a nagdardaras ket isu inawatna a siraragsac.

⁷ Ket idi nakitada daytoy, nagtanabutobda amin a cuncunada: Napan nakidagus iti maysa a tao a managbasol.

⁸ Ket ni Zaqueo nagtacder, ket kinunana iti Apo: Adtoy, ti guddua dagiti cucuac Apo, itedco cadagiti napanglaw; ket no adda nangulbudac iti asinoman a tao, isublic ti maminpat pay nga caadu.

⁹ Ket ni Jesus kinunana kencuana: Ita nga aldaw immay ti pannacaisalacan iti daytoy a balay, ta isu anac met ni Abraham.

¹⁰ Ta toy Anac ti tao immay nga agsapul ken mangisalacan iti napucaw.

Pangngarig cadagiti sangapulo a mina.

¹¹ Ket iti panangdengdengngegda cadagitoy innayonna a sinao ti maysa a pangngarig, agsipud ta isu adda iti asideg ti Jerusalem; ket impapanda nga iti apagdaricmat agparang ti pagarian ti Dios.

¹² Kinunana ngarud: Maysa a tao a natan-oc napan iti maysa a daga nga adayu, tapno awatenna ti panagarina, ket sa agsublinto.

¹³ Ket idi nga inayabanna dagiti sangapulo nga adipenna, iniccana ida ti sangapulo a mina, ket kinunana cadacuada: Pagsapulyo agingga iti agsubliac.

¹⁴ Ngem dagidi cailianna kinagurada ket nangibaonda iti sumurot kencuana a manangipacaammo a cuncunana: Dicam cayat nga agari daytoy cadacami.

¹⁵ Ket naaramid, nga idi simmubli, iti calpasan ti panangawatna iti pagarian, pinaayabanna dagidi nga adipen, isuda a nangtedanna idi ti pirac, tapno maammoanna ti nasapulanda.

¹⁶ Ket immay ti immuna, a cunana: Apo, ti minam nacagun-od ti sangapulo a mina.

¹⁷ Ket isu kinunana kencuana: Naimbag, nalaing nga adipen; agsipud ta iti bassit unay napagtalcanca, adda turaymo iti sangapulo nga Ili.

¹⁸ Ket immay ti maicadua a nagcuna; Apo, ti minam nacasapul ti lima a mina.

¹⁹ Ket iti daytoy kinunana met: Sica agturayca met iti lima nga Ili.

²⁰ Ket immay ti maysa a kinunana: Apo, adtoy ti minam, nga indulinco iti maysa a pano:

²¹ Ta nagbutengac kenca, ta taoca a nainget; alaem ti dica incabil, ket aniem ti dica immula.

²² Ket kinunana kencuana: Dakes nga adipen, iti ngiwatmo ti pangocomac kenca. Ammom a taoac a nainget, nga alaec ti diac incabil, ket aniec ti diac immula:

²³ Apayapay ngarud a dica inted ti piracco iti agsucsucat ti pirac, tapno inton dumtengac singirecto agraman gongonanna?

²⁴ Ket kinunana cadagiti adda a sisasango: Iccatenyo kencuana ti mina, ket itedyo iti addaan cadagiti sangapulo a mina.

²⁵ Ket isuda kinunada kencuana: Apo, addaanen ti sangapulo a mina.

²⁶ Siac cunac cadacayo nga uray siasino nga addaan, maiccanto; ngem iti awanan, uray pay ti adda kencuana, maiccatto.

²⁷ Ngem dagidiay cabusorco a dida cayat coma nga agariac cadacuada, iyegyo ditoy, ket putulanyo ida iti sangoanac.

²⁸ Ket idi nasaona dagitoy intuloyna ti nagna a simmang-at sadi Jerusalem.

Iseserrec a sibabal-ligi ni Jesus idiay Jerusalem.

²⁹ Ket naaramid, nga idi nacaasideg iti Betfage ken iti Betania, iti bantay a managan ti Caolivaan, imbaonna ti dua cadagiti adalanna,

³⁰ A cunana: Incay iti puroc a masangoanan; ket inton sumreccayo, masaracanyonto ti maysa nga urbon nga asno a naibaod, isu a di pay sinacayan ti uray siasino a tao, warwaranyo ket iyegyo.

³¹ Ket no adda mangintuud cadacayo: apayapay bucraanyo? sungbatanyonto ti castoy: Ta ti Apo masapulna.

³² Ket napan dagiti naibaon ket nasaracanda cas kinunana cadacuada.

³³ Ket idi a warwaranda ti urbon nga asno, dagiti agtagicua kinunada cadacuada: Apayapay bucraanyo ti urbon nga asno?

³⁴ Ket kinunada: Ta ti Apo masapulna.

³⁵ Ket impanda ken Jesus, ket inyap-apda dagiti pagananayda iti urbon nga asno, ket impasacayda ni Jesus.

³⁶ Ket idi magmagna, inyaplagda dagiti cagayda iti dalan.

³⁷ Ket idi umasidegen iti sasalugan ti Bantay dagiti Olivo, amin dagiti adu unay nga adalanna, rinugianda ti nagragsac ken nagdaydayaw iti Dios iti dackel a timec gapu cadagiti isu-amin a datdatlag a nakitada,

³⁸ A cuncunada: Naingasatan ti Ari, nga umay iti nagan ti Apo. Talna idiay langit, ket dayaw iti cangatoan.

³⁹ Ket dadduma a Fariseo a nailaoc cadagidi adu a tao, kinunada kencuana: Mannursuro, atipaem dagiti adalam.

⁴⁰ Ket isu simmungbat ket kinunana cadacuada: Cunac cadacayo a no dagitoy agulimecda coma dagiti bato agickisdanto.

⁴¹ Ket idi nacaasideg nakitana ti ciudad ket sinangitanna,

⁴² A kinunana: Ay no naawatam coma laeng, sica met uray iti daytoy laeng nga aldaw, dagiti maipapan iti talnam! ngem ita nailingedda cadagiti matam.

⁴³ Ta umayto dagiti aldaw a dagiti cabusormo licmutendacanto cadagiti sarikedked ket lawlawendacanto ket pairutandacanto iti amin a disso.

⁴⁴ Ket rebbaendacanto agingga iti daga, sica ken dagiti annacmo nga adda iti unegmo, ket awanto ti matda a bato iti rabaw ti bato kenca agsipud ta dica binigbig ti aldaw ti pannacasucnalmo.

Pannacagugur ti Templo.

⁴⁵ Ket simrec iti Templo ket rinugiana a pinaruar dagiti naglaclaco,

⁴⁶ A kinunana cadacuada: Adda a naisurat: Ti balayco, isu ti balay ti cararag; ngem dacayo pinagbalinyo a rukib dagiti mannanacaw.

⁴⁷ Ket nanursuro nga inaldaw idiay Templo; ngem dagiti panguloen dagiti papadi ken dagiti escriba ken dagiti nangnangrona cadagiti umili inagawaanda a papatayen:

⁴⁸ Ngem dida nacasarac ti pamcuatanda; ta dagiti amin nga umili pagayayatanda unay a dengdenggen.