San Lucas 17 - Ti Biblia (1973)

Dagiti gapuanan ti pacaitibcolan, dagiti aakes nga aramid a lac-amentayo, ken ti bileg ti linteg. Dagiti adipen nga awan kapapayanda.

¹ Ket kinunana cadagiti adalanna: Saan a mabalin no di ket umay dagiti pacaitibcolan; ngem asipay dayta pacaigapuanan ti iyaayda!

² Nasaysayaat coma kencuana, no maibattoon iti tengngedna ti maysa a bato a gilingan ket maitappuac iti baybay; ngem iti mangituggod ti maysa cadagitoy babassit nga ubbing.

³ Kitaenyo dagiti bagbagiyo. No macabasol ni cabsatmo, babalawen; ket no agbabawi, pacawanem.

⁴ Ket no maminpito ti inaldaw a macabasol kenca ket maminpito ti inaldaw nga umay kenca, a cuncunana: Agbabawiac; pacawanem.

⁵ Ket dagiti apostol kinunada iti Apo: Nayonam ti pammatimi.

⁶ Ket ti Apo kinunana: No adda coma pammatiyo a cas iti bukel ti mostaza cunaenyo coma itoy sicomoro: Maparutca ket maimulaca iti baybay: ket pagtulnogannacayonto.

⁷ Ket asino cadacayo ti adda maysa nga adipenna nga agarado wenno agpaarab, nga inton agsubli manipud iti talon ket cunaennanto kencuana: Sumrecca a dagus, ket sumangoca iti panganan:

⁸ Ket dina cunaen pay kencuana nga umuna: Isaganaannac ti pangrabiic; ket agservica caniac agingga iti macapanganac ken macainumac; ket calpasanna, mangancanto ket uminumcanto?

⁹ Agyaman aya iti daydiay nga adipen gapu ta inaramidna ti naibilin kencuana?

¹⁰ Castacay met, inton naaramidyo ti isu-amin a naibilin cadacayo, cunayo: Adadipencami, nga awan capapayan; ta inaramidmi laeng ti rebbengmi nga aramiden.

Pannacaagas dagiti sangapulo nga agcucutel.

¹¹ Ket naaramid nga idi mapanda idiay Jerusalem, nagna iti nagtengngaan ti Samaria ken Galilea.

¹² Ket idi simrec iti maysa a puroc, simmabet kencuana dagiti sangapulo a tao nga agcucutel, a nagsardengda iti adayu:

¹³ Ket nagpuccawda a cuncunada: Jesus, Mannursuro, caasiannacami.

¹⁴ Ket idi makitana ida, kinunana cadacuada: Incayo, agparangcayo cadagiti papadi. Ket naaramid, nga idi magmagnada a mapan, nadalusanda.

¹⁵ Ket maysa cadacuada, idi makitana nga nadalusanen, nagsubli a dinaydayawna ti Dios iti dackel a timec:

¹⁶ Ket inrocnoyna ti rupana cadagiti sacsaca ni Jesus, a nagyaman kencuana: ket daytoy taga Samaria.

¹⁷ Ket simmungbat ni Jesus ket kinunana: Saanda a sangapulo aya dagiti nadalusan? Ket dagiti siam adino ti yanda?

¹⁸ Awan ti nagsubli a nagyaman iti Dios no saan a daytoy gangannaet?

¹⁹ Ket kinunana kencuana: Tumacderca, incan: ti pammatim insalacannaca.

Ti iyaay ti pagarian ti Dios a di mapasungadan.

²⁰ Ket idi inintuud dagiti Fariseo kencuana, no caanonto ti iyaay ti pagarian ti Dios, sinungbatanna ida, ket kinunana: Ti pagarian ti Dios saanto nga umay babaen ti panagpalpaliiw a makita.

²¹ Ket didanto met cuncuna: Adtoy wenno adda idiay: ta adtoy, ti pagarian ti Dios adda iti unegyo.

²² Ket kinunana cadagiti adalanna: Umayto dagiti aldaw nga inton tarigagayanyo a kitaen ti maysa cadagiti aldaw ti Anac ti tao, ket dicayto makita.

²³ Ket cunaendanto cadacayo: Adda ditoy wenno idiay. Dicay mapan ket dicay suruten;

²⁴ Ta cas iti kimat, a no agkimat manipud iti maysa a disso iti baba ti langit, sumilap agingga iti sabali a bangir ti baba iti langit, castanto met ti Anac ti tao inton aldawna.

²⁵ Ngem umuna pay a masapul nga isu agsagaba ti adu, ket pagtalawen daytoy a caputotan.

²⁶ Ket no casano ti naaramid cadagiti aldaw ni Noe, castanto met cadagiti aldaw ti Anac ti tao.

²⁷ Manganda idi, aginumda, mangasawada, ken makiasawada agingga iti aldaw nga iseserrec ni Noe iti daong: ket immay ti layus ket pinucawna amin ida.

²⁸ Casta met ti naaramid cadagiti aldaw ni Lot: manganda idi, aginumda, aggatangda, aglacoda, agmulada, agbalayda;

²⁹ Ngem idi aldaw nga iruruar ni Lot idiay Sodoma, nagtudo nanipud langit iti apuy ken azufre, ket pinucawna amin ida:

³⁰ Cas itoy, castanto iti aldaw a pannacaiparangarang ti Anac ti tao.

³¹ Iti dayta nga aldaw, ti addanto iti tuctoc ti balay, ket dagiti alicamenna addada iti uneg ti balay, saanto nga umulog a mangala cadacuada: ket ti adda iti talon, casta met a dinto macapagsubli.

³² Laglagipenyo ti asawa ni Lot.

³³ Uray siasino nga umagawa a mangisalacan iti biagna, a maipaay kencuana met laeng isut mapucawnanto, ket uray siasino a macapucawto kencuana isu mataginayonnanto a sibibiag.

³⁴ Cunac cadacayo nga iti dayta a rabii addanto dua a tao iti maysa a pagiddaan: ti maysa maalanto, ket ti sabali mabaybayanto.

³⁵ Addanto dua a babbai a madamadanto nga aggilgiling nga agdinna: ti maysa maalanto ket ti sabali mabaybayanto.

³⁶ (Addanto dua a tao iti talon; ti maysa maalanto, ket ti sabali mabaybayanto).

³⁷ Ket nagintuodda ket kinunada kencuana: Adino, Apo? Ket isu kinunana cadacuada: No adino ti yan ti bangcay, idiayto met ti paguurnungan dagiti aguila.