San Lucas 16 - Ti Biblia (1973)

Pangngarig a maipapan iti mayordomo a di mapagtalcan.

¹ Ket kinunana met cadagiti adalanna: Adda idi maysa a tao a nabacnang, nga adda maysa a mayordomona; ket daytoy impulongda kencuana, nga agdadael cadagiti cucuana.

² Ket isu inayabanna ket kinunana kencuana: Ania daytoy a nadamagco a maipapan kenca? Idatagmo ti panagaywanmo, ta dicanto mabalinen ti agmayordomo.

³ Ket di mayordomo kinunana iti nakemna: Anianto ti aramidec? ta ni apoc iccatennac a mayordomo, Agcali, diac mabalin; makilimos, cabainco.

⁴ Ammoc ti aramidecto, tapno inton maiccatac iti kinamayordomo, awatendacto cadagiti balbalayda.

⁵ Ket idinto nga inayabanna a sinaggaysa dagiti nacautang ken apona, kinunana iti immuna: Mano ti utangmo ken apoc?

⁶ Ket isu kinunana: Sangagasut a burnay ti lana. Ket kinunana kencuana: Alaem cadi ti escrituram, ket agtugawca daras ket isuratmo ti limapulo.

⁷ Iti calpasanna, kinunana iti sabali: Ket sica, mano ti utangmo? Ket kinunana: Sangagasut a cavan ti trigo. Ket kinunana kencuana? Alaem cadi ti escrituram ket isuratmo ti walopulo.

⁸ Ket dinayaw di apo daydi mayordomo a di mapagtalcan, agsipud ta nagaramid a nainsiriban, ta dagiti annac daytoy a lubong, nasirsiribda cadagiti caputotanda ngem cadagiti annac ti silaw.

⁹ Ket siac cunac cadacayo: Pakigayyemyo dagiti kinabacnang a saan a pudno, tapno inton maibusen awatendacayto cadagiti abong-abong nga agnanayon.

¹⁰ Ti mapagtalcan iti bassit unay, mapagtalcan met iti adu; ket ti nakil-lo iti bassit unay nakil-lo met iti adu.

¹¹ No ngarud no cadagiti kinabacnang a saan a pudno dicayo napagtalcan, asinonto ti mangitalec cadacayo cadagiti napudno?

¹² Ket no iti cucua ti sabali dicay napagtalcan, asinonto ti mangted cadacayo iti cucuayo?

¹³ Awan ti adipen a macabalin nga agservi iti dua nga apo: ta wenno guraennanto ti maysa ket ayatennanto ti sabali, wenno makidecketto iti maysa ket laisennanto ti sabali. Dicay mabalin ti agservi iti Dios ken cadagiti kinabacnang.

Ti pannacabalin ti linteg.

¹⁴ Ket dagiti Fariseo, nga naagum idi nangngegda amin dagitoy a banbanag, inuy-uyunganda.

¹⁵ Ket kinunana cadacuada: Dacayo dagiti mangidayaw ti bagiyo met laeng iti sangoanan dagiti tao; ngem ti Dios ammona dagiti puspusoyo; ta ti natan-oc cadagiti tattao nacaap-aprang iti imatang ti Dios.

¹⁶ Ti linteg ken dagiti mammadto agpatinggada ken Juan: nanipud idin ti evangelio ti pagarian ti Dios maipacaammo, ket tunggal maysa aggarasugas a sumrec kencuana.

¹⁷ Ngem nalaclaca a mapucaw ti langit ken daga, ngem ti matnag ti maysa a tulnec ti linteg:

¹⁸ Ti tunggal maysa a mangisina iti asawana a babai ket mangasawa ti sabali, macabasol iti pannakiabig iti dina asawa: ket ti mangasawa iti naisina a babai, macabasol iti pannakiabig iti dina asawa.

Pangngarig iti tao a nabacnang ken ni napanglaw a Lazaro.

¹⁹ Adda idi maysa a tao a nabacnang ket nagpagpagananay ti purpura ken lupot a napateg, ket mangan a sibubuslon iti inaldaw:

²⁰ Ket maysa nga agpalpalama a managan Lazaro, a napno cadagiti derder adda idi a nagsadag iti ruanganna.

²¹ Ket tartarigagayanna ti mabussog cadagiti murcat nga agtinnag iti panganan di bacnang ngem awan ti nangted kencuana: ket dagiti aso umayda ket dildilanda ti derderna.

²² Ket naaramid a daydi agpalpalama natay ket impan dagiti angel iti saclot ni Abraham: ket natay met di bacnang ket naitanem.

²³ Ket idi adda a matutuoc idiay Hades intangadna dagiti matana ket nakitana ni Abraham iti adayu, ken ni Lazaro iti saclotna.

²⁴ Ket isu nagickis, ket kinunana: Ama Abraham, caasianac, ket ibaonmo ni Lazaro, ta babasaenna coma ti ngudo ti ramayna iti danum, ket palamiisanna toy dilac; ta addaac a matuocan iti daytoy a darang.

²⁵ Ngem kinuna kencuana ni Abraham: Anac, laglagipem nga inawatmon dagiti nam-aymo idi panagbiagmo, ket ni Lazaro casta met inawatna dagiti rigat; ngem ita isu malioliwa ditoy, ket sica matutuocca.

²⁶ Ket mainayon pay cadagitoy adda nagbabaetantayo a maysa a dackel a yuyeng, iti casta dagiti agtarigagay ditoy nga umal-latiw cadacayo, saanda a mabalin, casta met manipud dita dicay macaal-latiw ditoy,

²⁷ Ket kinunana: Dawatec ngarud kenca, ama, nga ibaonmo coma iti balay ni amac:

²⁸ Ta adda lima a cacabsatco; tapno ipanecnecna cadacuada, di la ket ta umayda met ditoy yan ti tooc.

²⁹ Ngem ni Abraham kinunana: Adda cadacuada ni Moises ken dagiti mammadto: denggenda coma ida.

³⁰ Ket isu kinunana: Saan ama Abraham: ngem no mapan coma cadacuada ti maysa nga aggapu cadagiti natay, agbabawidanto.

³¹ Ngem kinunana kencuana: No dida denggen ni Moises ken dagiti mammadto, didanto met mamati no adda maysa nga agungar cadagiti natay.