San Lucas 15 - Ti Biblia (1973)

Pangpangarig ti carnero ken iti dracma a napucaw.

¹ Ket immasidegda dagiti isu-amin nga agsingsingir ti buis ken dagiti managbasol nga agdengngeg kencuana.

² Ket agtantanabutob dagiti Fariseo ken dagiti escriba a cuncunada: Daytoy awatenna dagiti managbasol ket makipangan cadacuada.

³ Ket isu insaona cadacuada daytoy a pangngarig, a cuncunana:

⁴ Asino cadacayo, ti adda sangagasut a carnerona, no mapucawna ti maysa cadacuada, dina panawan iti away dagiti siam a pulo ket siam ket apanna sapulen ti napucaw agingga ti masaracanna?

⁵ Ket inton masaracannan icabilna a siraragsac cadagiti abagana.

⁶ Ket inton agsubli iti balay, urnongenna dagiti gagayyemna ken cacaarubana, a cuncunana cadacuada: Makipagrag-ocay caniac, ta nasaracac ti carneroc a nupucaw.

⁷ Cunac cadacayo, a casta met nga adaddanto ragsac sadi langit gapu iti maysa a managbasol nga agbabawi, ngem cadagiti siam a pulo ket siam a nasingpet a dida masapul ti panagbabawi.

⁸ Wenno asino ti babai nga adda sangapulo a dracmana, no mapucawna ti maysa a dracma, di manggangat ti pagsilawan ket sagadanna ti balay, ket sapulenna a sireregta agingat iti masaracanna?

⁹ Ket inton mabirucanna, urnongenna dagiti ingngana ken cacaarubana, a cuncunana: Makipagragsaccay caniac, ta nasaracac ti dracma a napucawco.

¹⁰ Casta met ti cunac cadacayo nga addanto ragsac iti sangoanan dagiti angel ti Dios gapu iti maysa a managbasol nga agbabawi.

Pangngarig iti anac a mayaoawan.

¹¹ Ket kinunana: Maysa a tao addaan ti dua nga anacna a lalaki:

¹² Ket ti inaudi kinunana ken amana: Ama, itedmo caniac ti paset dagiti cucuam a panacabagic. Ket biningayna cadacuada ti cucuana.

¹³ Ket idi napalabas, ti sumagmamano nga aldaw ti inaudi nga anac inurnongna amin ket napan iti maysa a daga nga adayu; ket idiay dinadaelna ti cucuana a nagbiag a nagdacdakes.

¹⁴ Ket idi nagastona aminen, napasamac idiay a daga ti dackel a bisin, ket isu nangrugi a nagsagaba ti kirang.

¹⁵ Ket napan ket immasideg iti maysa cadagiti umili ti daydi a daga, ket isu imbaon daydi cadagiti taltalonna tapno agtaraken cadagiti babuy.

¹⁶ Ket isu tartarigagayanna ti agbusog cadagiti algarrobas a canen dagiti babuy: ket awan ti nangted kencuana.

¹⁷ Ngem idi a nagpanunot, kinunana: Nagadu dagiti mangmangged idiay balay ni amac nga agsobsobraanda iti taraon ket siac addaac ditoy a matmatay iti bisin!

¹⁸ Tumacderacto ket innacto ken ama ket cunaecto kencuana: Ama, nacabasolac iti maicaniwas iti langit ken iti sangoanam.

¹⁹ Diac maicarin a managan ti anacmo; icabilnac a cas maysa cadagiti mangmangged kenca.

²⁰ Ket timacder ket napan ken amana. Ngem idi adayu pay laeng nakita ni Amana ket simnec ti caasina ket timmaray ket inappungolanna ti tengngedna, ket inagagcanna.

²¹ Ket di anac kinunana kencuana: Ama, nacabasolac iti maicaniwas iti langit ken iti sangoanam; diac maicarin a managan ti anacmo.

²² Ngem ni amana kinunana cadagiti adipenna: Alaenyo iti madaras ti capatgan a pagan-anay ket cawesanyo, ket icabilyo ti maysa a singsing iti imana, ken zapatos cadagiti sacana;

²³ Ket iyegyo ti vaca a napalucmeg ket partienyo; ket mangantayo ket agraragsactayo.

²⁴ Ta daytoy anacco natay ket nagungar; napucaw, ket nasaracan. Ket nangrugida a nagrarambac.

²⁵ Ngem di anacna nga inauna adda idi iti talon; ket isu idi sumangpet ken immasideg iti balay, nangngegna ti nasam-it a toctocar ken dagiti salsala.

²⁶ Ket idi nga inayabanna ti maysa cadagiti ubbingda, inintuudna kencuana no ania daydi.

²⁷ Ket isu kinunana kencuana: Ni cabsatmo dimteng; ket ni amam pinapartina ti napalucmeg a vaca agsipud ta inawatna a nacaradcad.

²⁸ Ngem naglucsaw ket dina kinayat ti simrec. Ket rimmuar ni amana, ket inayayona.

²⁹ Ngem isu simmungbat ket kinunana ken amana: Adtoy, iti adun a tawen a panagserservic kenca uray caano diac kinaniwas ti bilinmo, ket uray caano dinac iniccan ti bassit a calding, tapno makipagragsacac cadagiti gagayyemco:

³⁰ Ngem apaman a simmangpet daytoy anacmo, nga inibusna ti cucuam cadagiti balangcantis, impartiam ti vaca a napalucmeg.

³¹ Ket isu kinunana kencuana: Anac, sica addaca nga agnanayon caniac, ket amin dagiti gamengco cucuam ida.

³² Ngem masapul ti panagrambac ken panagayayat, ta daytoy cabsatmo natay ket nagungar; ken napucaw, ket nasaracan.