San Lucas 14 - Ti Biblia (1973)

Pannacaagas ti Maysa nga imbal.

¹ Ket naaramid nga idi simrec iti balay ti maysa a panguloen dagiti Fariseo iti maysa nga aldaw a panaginana a mangan ti tinapay, isu sinisiimda.

² Ket adtoy, adda iti sangoananna ti maysa a tao nga imbal.

³ Ket ni Jesus nakisao cadagiti mamasirib iti linteg ken cadagiti Fariseo, a cunana: Maipalubos ti panangagas iti aldaw a panaginana wenno saan?

⁴ Ngem dida naguni. Ket isu iniggamanna, ket pinaimbagna ket pinagawidna.

⁵ Ket kinunana cadacuada: Asino cadacayo ti adda asno wenno vacana a natnag iti bubon, ket dinanto alawen a dagus iti aldaw a panaginana?

⁶ Ket dida nabalin a sinungbatan dagitoy a banag.

Pangngarig cadagiti nagundawayan a tugaw ken dagiti maawis.

⁷ Ket idi madlawna no casano ti panangpili dagiti naawis cadagiti nagundawayan a tugaw, sinaona ti maysa a pangngarig, a cuncunana cadacuada:

⁸ No adda mangawis kenca iti pagbodaan, saanca a tumugaw iti nagundawayan a tugaw; di la ket ta adda natactacneng ngem sica nga inawisna,

⁹ Ket inton umay daydiay nangawis kenca ken isu, cunaennanto kenca: Itedmo iti daytoy ti tugaw: ken itinto casta, agininutcanto a sibabain a tumugaw iti cutit.

¹⁰ Ngem inton maawisca inca, ket agtugawca iti cababaan a saad; ta inton umay ti nangawis kenca, cunaenanto: Gayyem, umalisca iti nangatngato: itinto casta addanto dayawmo cadagiti makisango kenca iti panganan.

¹¹ Ta amin a mangitan-octo iti bagina, maipababanto; ket ti agpacumbaba, maitan-octo.

¹² Ket kinunana met idi nangawis kencuana. No agaramidca ti pangaldaw wenno pangrabii, dica awisen dagiti pagayammo, uray dagiti cacabsatmo, uray dagiti cacabagiam, uray dagiti caaroba a nabacnang; di la ket ta awisendaca met ket supapacandaca.

¹³ Ngem no agaramidca ti daya, ayabam dagiti napanglaw, dagiti pawad, dagiti pilay, dagiti bulsec:

¹⁴ Ket nagasatcanto: ta awan ti maisupapacda kenca; ta magonggonaancanto inton panagungar dagiti nalinteg.

Pangngarig iti dackel a pangrabii.

¹⁵ Ket idi mangngeg daytoy ti maysa a nakisango iti panganan, kinunana kencuana: Nagasat ti manganto ti tinapay idiay pagarian ti Dios.

¹⁶ Ngem kinunana kencuana: Maysa a tao nagaramid ti dackel a pangrabii ket nangawis ti adu:

¹⁷ Ket iti horas ti panangrabii imbaonna ti adipenna a nagcuna cadagiti naawis: Umaycayo, ta adda a naisagana aminen.

¹⁸ Ket isuda amin nagrugida a nagpambar a naggigiddan. Ti umuna kinunana kencuana: Gimmatangac ti maysa a talon ket masapulco ti umaway ken kitaen daydiay: dawatec kenca nga ipacawannac.

¹⁹ Ket kinuna ti maysa: Gimmatangac ti lima a pagasawaan ti vaca ket innac ida padasen, dawatec kenca nga ipacawannac.

²⁰ Ket kinuna ti sabali: Caccascasarco ket gapu itoy saanco a mabalin ti umay.

²¹ Ket idi nagsubli daydi adipen, impacaammona dagitoy a banag iti apona. Idin nagpungtot ti ama ti sangacabbalayan ket kinunana idi adipenna; Rumuarca daras cadagiti daldalan, ken cadagiti lanlansangan iti Ili ket iyegmo ditoy dagiti napanglaw, dagiti pawad, ken dagiti bulsec, ken dagiti pilay.

²² Ket kinuna di adipen: Apo, naaramid cas imbilinmo, ket adda pay laeng yan.

²³ Ket kinuna di apo iti adipen: Rumuarca cadagiti daldalan ken cadagiti inalaladan ket ipapilitmo a sumrecda tapno mapno ti balayco.

²⁴ Ta cunac cadacayo nga awan cadagiti tattao a naawis ti macaramanto iti pangrabiic.

Pangngarig iti kinasalucag.

²⁵ Ket adu dagiti tao a sumursurot kencuana; ket idi a timmaliaw kinunana cadacuada:

²⁶ No asinoman a tao ti umay caniac, ket dina guraen ni amana, ken ni inana, ken ni asawana ken dagiti annacna, ken dagiti cacabsatna a lallaki ken babbai, ken ti biagna met laeng, saan a macapagbalin nga adalac.

²⁷ Uray siasino nga umay sumurot caniac ken dina baclayen ti cruzna saan a macapagbalin nga adalac.

²⁸ Ta asino cadacayo ti, idinto a cayatna ti mangbangon ti maysa a torre, di agpanunot nga umuna cadagiti masapul a gastoen ta kitaenna no adda umanay a pangleppas?

²⁹ Di la ket ta inton naicabilnan ti cimiento ket saana a mabalin a leppasenen, amin dagiti macakita rugianda nga uyuyungan.

³⁰ A cuncuna: Daytoy a tao nangrugi a nangbangon ket dina nabalin a lineppas.

³¹ Wenno asino ti ari, nga idinto a mapan gumubat iti sabali nga ari, di agpanunot nga umuna, ket iyumanna no adda pannacabalinna a mangisango ti sangsangapulo a ribo iti daydiay umay manggubat kencuana, nga addaan duapulo a ribo?

³² Ta no saan, inton ti sabali, nga ari adda pay laeng iti adayu, mangibaonto ti mapan makitulag kencuana cadagiti condicion ti cappia.

³³ No casta ngarud, uray siasino cadacayo a dina paglicudan dagiti isu-amin a cucuana saan a macapagbalin nga adalac.

³⁴ Nasayaat ti asin; ngem no ti asin tumamnay, anianto ti pagtempla?

³⁵ Awanen ti pagpaayanna, uray iti daga ken uray iti pagibel-lengan ti pagpataba; ngem ibel-lengda iti ruar. Ti adda pagdengngegna dumngeg coma.