San Lucas 13 - Ti Biblia (1973)

Ti pannacapapatay dagiti taga Galilea: ken ti torre sadi Siloe.

¹ Ket iti dayta met laeng a tiempo, adda sumagmamano a tattao idiay a nangsarita kencuana ti maipapan cadagiti taga Galilea, a ti darada ti inlaoc ni Pilato cadagiti datonda.

² Ket isu simmungbat ket kinunana cadacuada: Pagarupenyo a dagitoy taga Galilea, agsipud ta linac-amda dagitoy, isuda ti adadda a managbasol ngem dagiti isu-amin a taga Galilea?

³ Saan, cunac cadacayo; ngem no dicayto agbabawi, mapucawcayto met amin iti casta.

⁴ Wenno dagiti sangapulo ket walo a natupacan ti torre sadi Siloe, ket pinatayna ida, pagarupenyo nga adaddada a nacautang ngem dagiti isu-amin a tattao nga agnaed sadi Jerusalem?

⁵ Saan, cunac cadacayo; ngem no dicayto agbabawi; mapucawcayto amin iti casta.

Pangngarig iti cayo nga higos a saan nga agbunga.

⁶ Ket kinunana daytoy a pangngarig: Ti maysa a tao addaan sangapoon nga higos a naimula iti minuyunganna, ket immay nagsapul ti bungana, ket saan a nacasarac.

⁷ Ket kinunana idi agaywan iti minuyungan: Adtoy, tal-lo a tawenen nga umumayac agsapul ti bunga daytoy a cayo nga higos ket diac macasarac: pucanem, apayapay macasalin pay laeng iti daga?

⁸ Ket isu simmungbat ket kinunana kencuana: Apo, bay-am pay laeng iti daytoy a tawen, agingga iti caliac iti arubayanna ket gaburac ti pataba:

⁹ Ket no agbunganto iti masangoanan, naimbag; ket no saan, pucanemto.

Pannacaagas ti maysa a babai a di macagunay.

¹⁰ Ket adda a mangisursuro iti maysa cadagiti sinagoga iti aldaw a panaginana.

¹¹ Ket adtoy ti maysa a babai nga addaan espiritu ti kinacapsut iti sangapulo ket walo a tawenen, ket napacubbo nga uray ananoenna dina mabalin ti aglinteg.

¹² Ket idi nakita ni Jesus, inayabanna ket kinunana kencuana: Babai, nacalapsutcan iti sakitmo.

¹³ Ket impatayna kencuana dagiti imana, ket dagus a napalinteg ket dinaydayawna ti Dios.

¹⁴ Ket idi simmungbat ti panguloen ti sinagoga, a sipupungtot agsipud ta nangagas ni Jesus iti aldaw a panaginana, kinunana cadagiti umili; Adda innem nga aldaw a rebbeng ti agtrabajo: cadagitoy ngarud umaycayo ket agpaagascayo, ket saan nga iti aldaw a panaginana.

¹⁵ Ket ti Apo simmungbat kencuana ket kinunana: Managinsisingpet, tunggal maysa cadacayo, dina aya bucraan iti aldaw a panaginana ti vacana wenno ti asnona iti col-loong, ket apanna painumen?

¹⁶ Ket daytoy babai, nga anac ni Abraham, adtoy a binalud ni Satanas iti bayat ti sangapulo ket walo a tawen, saan aya a maipaay a bucraan iti daytoy a pannacabalud iti aldaw a panaginana?

¹⁷ Ket idi sinaona dagitoy a banag, nabainan dagiti isu-amin a cabusorna: ket amin dagiti adu a tao nagragsacda cadagiti amin a banbanag a nagloriaan nga inaramidna.

Pangngarig ti bukel ti mostaza, ken iti levadura.

¹⁸ Kinunana ngarud: Ania ti caarig ti pagarian ti Dios, ket anianto ti pangipadisac kencuana?

¹⁹ Mayarig iti bukel ti mostaza, nga innala ti maysa a tao ket inpuruacna iti minuyunganna; ket dimmackel ket nagbalin a cayo, ket dagiti tumatayab iti tangatang immaponda cadagiti sangsangana.

²⁰ Ket kinunana manen. Anianto ti pangyarigac iti pagarian ti Dios?

²¹ Mayarig iti levadura, nga innala ti maysa a babai ket ingamayna iti tal-lo a casucat nga harina, agingga iti bimsug amin.

Ti ruangan a nailet.

²² Ket pinagnana dagiti amin nga Il-ili ken purpuroc a nangisursuro, ket nagnagna a nagturong sadi Jerusalem.

²³ Ket kinuna kencuana ti maysa: Apo, bassit aya dagiti maisalacan? Ngem isu kinunana cadacuada:

²⁴ Agawaanyo ti sumrec iti ruangan a nailet; ta cunac cadacayo nga adu dagiti agsapulto no casano ti iseserrecda ket didanto mabalin.

²⁵ Inton ti ama ti sangacabbalayan simreken ket pinunitannan ti ruangan, ket mangrugicay nga agtacder iti ruar, ken tumugtog iti ruangan nga agcuncuna: Apo, Apo, ilucatannacami; ket isu sumungbatto ket cunaennanto cadacayo; Saancayo nga amammo ken no taga anocayo;

²⁶ Iti dayta rugianyonto a cuna: Iti imatangmo nangan ken imminumcami ket cadagiti daldalanmi nanursuroca:

²⁷ Ket cunaennanto: Cunac cadacayo a diac amammo no taga anocayo: umadayucay caniac dacay amin a managararamid ti kinadakes.

²⁸ Idiay addanto panagsangsangit ken panagngaretnget dagiti ngipen, inton makitayo ni Abraham, ken ni Isaac ken ni Jacob, ken dagiti amin a mammadto idiay pagarian ti Dios, ket dacay met laeng maparuarcayto.

²⁹ Ket umaydanto manipud daya ken laud, ken manipud amianan ken abagatan, ket tumugawdanto idiay pagarian ti Dios.

³⁰ Ket adtoy, adda maudi nga umunadanto; ket adda umuna a maudidanto.

Ibagada ken Jesus nga agaluad ken Herodes.

³¹ Iti daydi met la nga horas dimteng dagiti dadduma a Fariseo a nagcuna kencuana; Rumuarca ket pumanawca ditoy, ta ni Herodes cayatnaca a papatayen.

³² Ket kinunana cadacuada: Incayo ket cunaenyo iti daydiay nasicap. Adtoy, paruarec dagiti sairo, ket mangagasac ita ken inton bigat, ket iti maicatlo nga aldaw agturpusac.

³³ Nupay casta masapul a magnaac ita ken inton bigat, ken inton aldaw a sumaruno; ta saan a mabalin a ti maysa a mammadto matay iti ruar ti Jerusalem.

³⁴ Jerusalem, Jerusalem! a papatayem dagiti mammadto ken uburem dagiti maibaon kenca; namin-ano a kinayatco nga urnungen coma dagiti annacmo, cas iti upa urnungenna dagiti piecna iti siroc dagiti payacna, ket dicayo kinayat!

³⁵ Adtoy a ti balayyo mapanawan a taltalipungawen: ket cunac cadacayo a didacto makitan, agingga iti panagcunayonto, Bendito ti umay iti nagan ti Apo.