San Lucas 12 - Ti Biblia (1973)

No asino ti rebbeng a cabuteng.

¹ Ket idi nga naguurnong ti linacsa a tattao iti casta nga agdadarisonda, rinugianna a kinuna cadagidi adalanna, umuna: Agaluadcayo iti levadura dagiti Fariseo, ta isu ti panaginsisingpet.

² Ngem awan ti naabbungan a dinto maipatac; ken nailemmeng a dinto maammoan:

³ Gapuna nga, amin a sinaoyo iti sipnget, mangngegto iti lawag; ket ti sinaoyo nga inyarasaas cadagiti silid a makinuneg, maiwarragawagto cadagiti tuctoc ti balay.

⁴ Ket cunac cadacayo, gagayyemco: dicay pagbutngan dagiti mamapatay ti bagi, ket iti calpasanna, awan ti sabali a mabalinda nga aramiden.

⁵ Ngem ibagacto cadacayo, no asino ti pagbutnganyo. Pagbutnganyo day diay adda pannacabalinna a mangitappuac iti infierno, iti calpasan ti panangpapatayna; pudno a cunac cadacayo: Pagbutnganyo daydiay.

⁶ Saan a malaco aya ti lima a bil-lit tuleng iti maysa a centavo? Ket uray maysa cadacuada awan ti malipatan iti imatang ti Dios.

⁷ Ngem uray pay dagiti booc ti oloyo addada amin a nabilang. Dicay agbuteng: napatpategcayo ngem cadagiti adu a bil-lit tuleng.

⁸ Ket cunac cadacayo nga isu-amin a mangipaduyacyac caniac iti sangoanan dagiti tao, ti Anac ti tao ipaduyacyacnanto met iti sangoanan dagiti angel ti Dios;

⁹ Ngem ti mangilibac caniac iti sangoanan dagiti tao mailibacto met iti sangoanan dagiti angel ti Dios.

¹⁰ Ket isu-amin nga agsao iti maicaniwas iti Anac ti tao, mapacawanto; ngem ti agtabbaaw iti Espiritu Santo, saanto a mapacawan.

¹¹ Ket inton isaclangdacayo cadagiti sinagoga ken cadagiti panguloen ken cadagiti agturay, dicay pacadanagan no casano wenno anianto ti isungbatyo wenno ti saoenyonto:

¹² Ta ti Espiritu Santo isuronacayto iti dayta met la nga horas no ania ti rebbengyo a saoen.

Pangngarig iti nabacnang a nacuneng.

¹³ Ket kinuna kencuana ti maysa cadagiti adu a tao: Mannursuro, ibagam ken cabsatco nga ibingayannac ti tawid.

¹⁴ Ngem isu kinunana kencuana: Tao, asino ti mangicabil caniac a mangocom wenno mamagbingay cadacayo?

¹⁵ Ket kinunana cadacuada: Kitaenyo ket agaluadcayo iti amin nga agum; ta ti biag ti tao saan nga adda iti caadu dagiti gameng a cupcupicupanna.

¹⁶ Ket isu sinaritana cadacuada ti maysa a pangngarig, a kinunana: Ti talon ti maysa a tao a nabacnang nagbunga ti adu:

¹⁷ Ket pacpakinacmenna a cuncuna: Anianto ti aramidec, ta awan ti pangidulinac cadagiti apitco?

¹⁸ Ket kinunana: Aramidecto daytoy: racrakecto dagiti camaligco, ket bangonecto ida a dacdackel; ket idulinconto idiay dagiti amin nga apitco ken gamgamengco.

¹⁹ Ket cunacto iti cararuac: Cararua, adu dagiti gameng nga indulinmo a maisagana iti adu a taoen; aginanaca, manganca, uminumca, agragsacca.

²⁰ Ngem kinuna kencuana ti Dios: Nacuneng! ita a rabii masublian a dawaten kenca ti cararuam: ket dagiti adda nga insaganam asinonto ti agtagicua cadacuada?

²¹ Castoy ti agurnong ti gamgameng a maisagana kencuana, ket saan a nabacnang iti Dios.

Panagagawa iti biag.

²² Ket kinunana cadagiti adalanna: Gapuna cunac cadacayo: dicay agagawa iti maipaay iti biagyo, no anianto ti canenyo; wenno iti bagiyo, no anianto ti icawesyo.

²³ Ta ti biag nangnangrona ngem ti canen, ket ti bagi nangnangrona ngem ti pagananay.

²⁴ Panunutenyo dagiti wac, a dida agmula ket dida met agani ket awan ti pagidulinanda wenno agamangda, ket ti Dios taraonanna ida Anianto ketdin cadacayo a napatpategcayo nga adayu ngem dagiti tumatayab!

²⁵ Ket asino cadacayo ti, nupay agagawa mabalinna a nayonan iti kinatayagna ti sangcasico?

²⁶ No dicay ngarud mabalinan ti basbassit, apayapay agawaanyo ti maipapan cadagiti sabali?

²⁷ Kitaenyo dagiti lirio, no casano ti idadackelda: saanda nga agtrabajo ket saanda met a mambi, ngem cunac cadacayo nga uray ni Salomon agraman ti isu-amin a dayagna saan a nacawesan a cas ti maysa cadacuada,

²⁸ No castoy ngarug ti panangawes ti Dios iti root, nga ita adda iti talon, ket inton bigat maibel-leng iti horno, dinto adadda pay cadacayo bassitan ti pammati?

²⁹ Ket dicay agagagawa ti canenyonto wenno ti inumenyonto; ket dicay met agdanag.

³⁰ Ta isu-amin dagitoy a banag agagawaan dagiti nacion ti lubong; ngem ni Amayo ammona a masapulyo dagitoy.

³¹ Ngem sapulenyo a nangnangrona ti pagarian ti Dios, ket isu-amin dagitoy a banbanag-mainayonto cadacayo.

³² Dicay agbuteng, bassit nga ipastoran, ta nagayatan ni Amayo nga ited cadacayo ti pagarian.

³³ Ilacoyo dagiti cucuayo, ket mangtedcayo ti limos; agaramidcayo ti supsupotyo a di agdaan, maysa a gameng a saan nga mapucaw cadagiti langlangit, isu a di maasitgan ti mannanacaw ken di met dadaelen ti sanga.

³⁴ Ta no adino ti yan ti gamengyo, addanto met idiay ti pusoyo.

Pangngarig ti adipen a nasalucag.

³⁵ Baricsanyo dagiti siketyo ket sigagangat coma dagiti silawyo;

³⁶ Ket dacayo coma ti cas cadagiti tao nga agururay iti apoda no caano ti panagsublinanto manipud iti pagbobodaan; tapno inton umay ket umawag, dagus nga ilucatandanto.

³⁷ Nagasat dagidiay adipen nga inton umay ti apoda, masaracannanto ida nga agpuypuyat: pudno a cunac cadacayo, nga baricsannanto ket aramidennanto ida a sumango iti panganan, ket umayto ket agservinto cadacuada.

³⁸ Ket no umayto iti maicadua a paset ti panagpuyat wenno iti maicatlo ket masaracanna ida a casta, nagasat dagidiay nga adipen.

³⁹ Ngem ammoenyo daytoy, a no naammoan coma ti ama ti sangacabbalayan no ania nga horas ti iyaay ti mannanacaw, nagpuyat coma ket dina coma binaybay-an nga inabutanda ti balayna.

⁴⁰ Addacay met coma a sisasagana; ta iti horas a dicay ipappapan, ti Anac ti tao umay.

⁴¹ Ket kinuna ni Pedro kencuana: Apo, cunam daytoy a pangngarig a maipaay cadacami, wenno cadagiti isu-amin met?

⁴² Ket kinuna ti Apo: Asino ngarud ti mayordomo a mapagtalcan ken manakem, nga insaad ni apona nga agaywan cadagiti tao ti balayna, tapno inton pannacaipaayna itedna cadacuada ti pannacabagida a taraon?

⁴³ Nagasat daydiay adipen nga inton umay ni apona, masaracannanto a casta ti araramidenna.

⁴⁴ Kinapudnona a cunac cadacayo, nga isu isaadnanto nga agaywan cadagiti isu-amin a sanicuana.

⁴⁵ Ngem no dayta nga adipen cunaennanto iti pusona: Ni apoc agbayag nga umay, ket rugiannanto a cabilen dagiti tagabu a lallaki ken babbai, ket mangan ken uminum ken agbartec;

⁴⁶ Umayto ti apo dayta nga adipen iti aldaw a dina ipagpagarup, ken iti horas a dina ammo, ket saplitennanto, ket ikeddengnanto ti pannacabagina a maicanunong cadagiti saan a mapagtalcan.

⁴⁷ Ket dayta adipen a nacaawat ti pakinakem ni apona, ket saan a nagsagana ket saanna met nga inaramid cas iti pakinakemna, masaplitto iti adu.

⁴⁸ Ket ti saan a nacaammo, ket nagaramid cadagiti banbanag a maicari iti dusa mabaotto iti bassit: ta iti uray siasino a nacaitedan ti adu, adaddanto ti masingir kencuana, ket daydiay a nacaicumitan iti adu, adadunto met ti madawat kencuana.

Ni Jesus iserrecna ti apuy ken ti susic iti daga.

⁴⁹ Immayac mangibacal ti apuy iti daga: ket ania pay ti cayatco, no adda a sigagangaten?

⁵⁰ Ngem adda maysa a pammautizarco a pacabautizarac ket ania ket ti panagtooccon agingga iti di matungpal!

⁵¹ Ipapanyo nga, immayac a mangted ti talna ditoy daga? Saan, cunac cadacayo; ngem panaglalasin ketdi;

⁵² Ta manipud ita aglalasindanto dagiti lima iti maysa a balay: tal-lo maibusor cadagiti dua; ket dua maibusor cadagiti tal-lo.

⁵³ Aglalasindanto, ti ama bumusor iti anac a lalaki ket ti anac a lalaki bumusor iti ama; ti ina bumusor iti anacna a babai, ket ti anac a babai bumusor iti inana; ti catugangan a babai bumusor iti manugangna a babai ket ti manugang a babai bumusor iti catuganganna a babai.

Dagiti pagilasinan cadagiti aldaw.

⁵⁴ Ket cuncunana met cadagiti adu a tao: No makitayo ti maysa nga ulep a tumpoar iti laud, dagus a cunaenyo: Umay ti tudo ket casta ti maaramid.

⁵⁵ Ket no agangin ti abagat, cunayo: Addanto pudot; ket casta ti maaramid.

⁵⁶ Managinsisingpet! Ammoyo nga ilasin ti langa ti langit ken daga; ngem casano dayta ket dicay ammo nga ilasin daytoy nga aldaw?

⁵⁷ Ket apayapay dicay agipato uray cadacay met laeng ti nalinteg?

⁵⁸ Ta cas no mapanca iti agturay agraman ti caringgormo, agawaam ti mabalinmo iti dalan, tapno macalapsotca kencuana: tapno dinaca uluden iti sangoanan ti Ocom ket ti ocom iyawatnaca iti polis, ket ti polis ipisocnaca iti pagbaludan.

⁵⁹ Cunac kenca a dicanto rummuar sadiay agingga iti dica mabayadan ti camaudianan a maravilis.