San Lucas 11 - Ti Biblia (1973)

Ti cararug ti Apo.

¹ Ket naaramid nga idi adda iti maysa a disso nga agcarcararag, ken idi nalpas, maysa cadagidi adalanna kinunana kencuana: Apo, isuronacami nga agcararag a cas met ti panangisuro ni Juan cadagiti adalanna.

² Ket kinunana cadacuada: No agcararagcayo, cunayo: Amami, (nga addaca sadi langit.) Madaydayaw coma ti naganmo. Umay coma ti pagariam. (Maaramid coma ti pagayatam, no casano idiay langit, casta met ditoy daga.)

³ Itdem coma cadacami ti taraonmi nga inaldaw.

⁴ Ket pacawanem cadacami dagiti basbasolmi; ta pacawanenmi met ti isu-amin a macautang cadacami. Ket dinacam iyeg iti pannacasulisog, (ngem isalacannacam ket iti dakes.)

Pangngarig ti gayyem a macaalimuteng.

⁵ Ket kinunana cadacuada: Asino ngata cadacayo ti adda maysa a gayyemna, ket mapanto kencuana iti tengnga ti rabii, ket cunananto kencuana: Gayyem, pabuludannac man ti tal-lo a tinapay:

⁶ Ta ti maysa a gayemco a naggapu iti viaje immay caniac a nagdagus, ket awan ti isangoc kencuana:

⁷ Ket isu manipud iti uneg sumungbatto a cunaenna: Dinac alimutngen; ti ruangan naripcanen; ket dagiti annacco ken siac addacamin iti pagiddaan; diac mabalin ti bumangon ken mangted kenca?

⁸ Cunac cadacayo, nga uray pay no saan coma a bumangon a mangted kencuana gapu ta gayyemna, bumangonto laeng agsipud iti pannacaalimutengna ket itednanto kencuana ti isu-amin a masapulna.

⁹ Ket siac cunac cadacayo: Dumawatcayo, ket maiccancayto; agsapulcayo, ket macasaraccayto; umawagcayo ket ilucatandacayto.

¹⁰ Ta tunggal maysa nga agdawat, umawat; ket ti agsapul, macasarac; ket ti umawag, mailucatanto.

¹¹ Ket asino cadacayo ti idinto nga ama, no ti anacna dumawat kencuana ti tinapay, iccanna ti maysa a bato? wenno ican ti dawatenna, iccanna aya ti maysa nga uleg?

¹² Wenno, no dumawatto ti maysa nga itlog, itednanto kencuana ti maysa a manggagama?

¹³ No ngarud no dacayo, idinto a dakescayo, ammoyo ti mangted cadagiti nasayaat a sagsagut cadagiti annacyo, dinto aya nangnangrona ni Amayo a nailangitan a mangtedto ti Espiritu Santo cadagiti agdawat kencuana?

Ti panagtabbaaw dagiti Fariseo.

¹⁴ Ket idi pagtaltalawenna ti maysa a sairo nga umel; ket idi naparuarna di sairo, di umel; nagsao, ket dagiti adu a tao nagsiddaawda.

¹⁵ Ngem dagiti dadduma cadacuada cuncunada: Iti pannacabalin ni Beelzebub a turayen dagiti sairo, ti pamagtalawna cadagiti sairo.

¹⁶ Ket dagiti dadduma susuutenda, a dumawatda kencuana ti maysa a pagilasinan a nailangitan.

¹⁷ Ngem isu, idi a mailasinna dagiti panunotda, cunana cadacuada: isu-amin a pagarian mabingaybingay a maibusor met la kencuana mapaglangalang; ket ti maysa a balay a mabingbingay a maibusor met la kencuana marba.

¹⁸ Ket no ni Satanas mabingaybingay a maibusor met la kencuana, casanonto ti panagtacder ti pagarianna? Ta cunayo nga iti pannacabalin ni Beelzebub ti pamaruarco cadagiti sairo,

¹⁹ Ket no paruarec coma dagiti sairo gapu ti pannacabalin ni Beelzebub, dagiti annacyo asino ngarud ti akinpannacabalin ti pamaruarda cadacuada? iti casta isudanto dagiti mangocom cadacayo.

²⁰ Ngem no gapu iti ramay ti Dios paruarec dagiti sairo, kinapudnona a ti pagarian ti Dios dimteng cadacayo.

²¹ No ti napigsa a tao siiigam nga agaywan iti paraanganna, amin dagiti cucuana addada a sitatalged:

²² Ngem no umay ti napigpigsa ngem isu, ket abakennanto, alaennanto kencuana dagiti isu-amin nga igamna a nagcammatalcanna, ket bingayenna dagiti inabacna.

²³ Ti awan caniac, sumalungasing caniac: ket ti saan a makipagurnong caniac, agiwara.

²⁴ No ti espiritu a narugit macaruar iti tao, magna cadagiti disso a namaga, nga agsapsapul ti inana; ket inton dina masaracan, cunana. Agsubliacto iti balayco, isu a rinuarac.

²⁵ Ket inton umay, masaracanna a nasagadan ken naarcosan.

²⁶ Ket iti casta mapan ket mangala ti sabali a pito nga espiritu a dacdakes ngem isu; ket sumrecda ken agbalayda idiay, ket ti tungpal daytoy a tao rumsua a dacdakes ngem iti immununa.

²⁷ Ket naaramid nga idi sasaoenna dagitoy a banag, maysa a babai iti gimong, nagpuccaw ket kinunana ken cuana; Nagasat ti tian a nagawit kenca, ken dagiti suso a sinusoam.

²⁸ Ngem isu kinunana: Adadda a nagasgasat pay dagiti agdengngeg iti sao ti Dios ken tungpalenda ida.

Ti pagilasinan ni Jonas.

²⁹ Ket idi dagiti adu a tao nagaaribongbongda kencuana rinugianna a kinuna: Daytoy a caputotan isu ti maysa a dakes a caputotan: agsapul ti pagilasinan, ngem awanto ti maited kencuana a pagilasinan, no di ti pagilasinan ni Jonas.

³⁰ Ta cas ni Jonas nagbalin a pagilasinan dagiti taga Ninive, casta met ti Anac ti tao isunto ti pagilasinan daytoy a caputotan.

³¹ Ti Reyna ti Abagatan tumacderto iti panangocom a maigiddan cadagiti tao ti daytoy a caputotan, ket panecnecannanto ti maibusor cadacuada: ta immay a naggapu iti ungto ti daga a nagdengngeg ti kinasirib ni Salomon; ket adda ditoy ti dacdackel ngem ni Salomon.

³² Dagiti tao sadi Ninive tumacderdanto iti panangocom a maigiddan itoy a caputotan, ket panecnecandanto ti maibusor cadacuada; ta nagbabawida iti panangascasaba ni Jonas; ket adda ditoy ti dacdackel ngem ni Jonas.

Ti silaw ti bagi.

³³ Awan ti tao nga idinto a nanggangat ti maysa a silaw, icabilna iti nalemmeng wenno iti siroc ti salop; no di ket iti pagsilawan tapno dagiti sumrec makitada ti lawag.

³⁴ Ti pagsilawan ta bagim isu ti mata; no ti matam sisasalun-at, isu-amin a bagim nalawag met; ngem no dakes, ti bagim nasipnget met.

³⁵ Kitaem ngarud, ta ti silaw nga adda kenca, saan coma a sipnget.

³⁶ No ngarud ti amin a bagim nalawag ket awan ti pasetna a nasipnget, isu-amin nalawagto, a cas iti silaw no silnagannaca iti lawagna.

Ni Jesus babalawenna dagiti escriba ken dagiti Fariseo.

³⁷ Ket idi nga agsasao, inawis ti maysa a Fariseo a makipangan coma kencuana: ket simrec ni Jesus ket simmango a mangan.

³⁸ Ket ti Fariseo idi makitana daytoy, nagsiddaaw agsipud ta saan a nagdigos idi apan mangan.

³⁹ Ket ti Apo kinunana kencuana: Ita dacayo a Fariseo ugasanyo ti ruar ti vaso ken pinggan; ngem ti unegyo napno ti panagsamsam ken kinadakes.

⁴⁰ Agcacacuneng, ti nagaramid iti akinruar saan aya nga isu met ti nagaramid iti akin-uneg?

⁴¹ Nangrona pay, ti adda cadacayo ilimosyo; ket adtoy, dagiti amin a banag nadalusda cadacayo.

⁴² Ngem, asicay pay Fariseo! ta agbayadcayo ti pagcapul-lo ti yerbabuena, ti ruda ken ti amin a nateng; ket liclicanyo ti kinalinteg ken ti ayat ti Dios. Ngem dagitoy a banag rebbengyo coma nga inaramid a dicay met binaybay-an dagidiay.

⁴³ Asicay pay Fariseo! ta ayatenyo, dagiti nagundawayan a tugaw cadagiti sinagoga ken maluglugayan cadagiti plaza.

⁴⁴ Asicay pay! ta umaspingcayo cadagiti tanem a di makita, ket dagiti tao a magna iti rabawda dida ammo.

⁴⁵ Ket simmungbat ti maysa cadagiti mamasirib iti linteg ket kinunana kencuana: Mannursuro, iti panagsaom itoy, babalawennacami met.

⁴⁶ Ket isu kinunana: Asicay met, mamasirib iti linteg! ta paawitanyo dagiti tao cadagiti awit a nadagsen unay nga awiten; ket dacayo dicay met sagiden dagiti awit uray iti maysa cadagiti ramayyo laeng.

⁴⁷ Asicay pay! ta bangonenyo dagiti monumento dagiti mammadto, ket pinatay ida dagiti ammayo.

⁴⁸ Kinapudnona, dacayo dagiti sacsi ket anamunganyo dagiti aramid dagidi ammayo; ta pudno nga pinatayda ida, ngem dacayo bangonenyo dagiti tanemda.

⁴⁹ Gapuna, ti kinasirib ti Dios kinunana met: Ibaonconto cadacuada dagiti mammadto ken apostol; ket adunto cadagitoy ti patayenda ken idadanesda;

⁵⁰ Tapno maisingirto itoy a caputotan ti naiparucpoc a dara dagiti amin a mammadto nanipud idi pannacabangon ti lubong;

⁵¹ Nanipud idi dara ni Abel agingga iti dara ni Zacarias, a natay iti nagbaetan ti altar ken ti santuario: wen, cunac cadacayo, a maisingirto itoy a caputotan.

⁵² Asicay pay, mamasirib iti linteg! ta iniccatyo ti tulbec ti sirib; dacayo dicay simrec, ket pinawilanyo pay dagiti sumrec coma.

⁵³ Ket idi rimmuar idiayen, dagiti escriba ken Fariseo rinugianda ti nagpungtot unay kencuana ket ginargarida tapno agsao cadagiti adu a banag.

⁵⁴ Nga addada nga agdadaan a mangtiliw iti aniaman a maisaona a pangidarumanda kencuana.