San Lucas 1 - Ti Biblia (1973)

Pangrugian.

¹ Yantangay adu dagiti nanggayagay a nangornos ti maysa a pacaipalawagan dagiti naararamid a napanecnecan cadatayo.

² Cas iti panangsaritada cadacami dagiti nanipud idi damo sacsida a nacakita ken ministrosda iti sao;

³ Iti calpasan ti panangammoc a naimbag cadagiti amin a naararamid nanipud idi damona, a napanunotco met a nasayaat nga isurat a naurnos, kenca maicari unay a Teofilo;

⁴ Tapno maammoam ti kinapudno a maipapan cadagiti naararamid, isuda a nacasursuroam.

Ti pannacaipasngay ni Juan naipadamag.

⁵ Cadagiti aldaw ni Herodes, Ari sadi Judea, adda ti maysa a padi a managan Zacarias, iti batang ni Abias; ket ti asawana idi maysa cadagiti annac ni Aaron, ket ti naganna Elisabet.

⁶ Ket agpadpadada a nasingpet iti sangoanan ti Dios, a nagnagnada nga awan nacababalawanda, cadagiti amin a bilbilin ken linlinteg ti Apo.

⁷ Ket awan anacda; ta ni Elisabet lupes, ket agpadpadada nga aduan unayen iti tawen.

⁸ Ket naaramid nga idi madama nga agannong iti kinapadina iti pannacabatangna iti sangoanan ti Dios,

⁹ Cas ugali ti kinapadi napagasatan a sumrec iti Templo ti Apo a mangidaton iti incienso.

¹⁰ Ket amin dagiti umariwecwec addada iti ruar nga agcarcararag iti horas ti incienso.

¹¹ Ket nagparang kencuana ti maysa nga angel ti Apo a nagtacder iti macanawan ti altar ti incienso.

¹² Ket idi makita ni Zacarias nariribuc ket naabac iti buteng.

¹³ Ngem ti angel kinunana kencuana: Zacarias, dica agbuteng, ta naipangag ti cararagmo; ket ni asawam nga Elisabet ipasngayannacanto ti maysa nga anac a lalaki ket panaganamto ti Juan.

¹⁴ Ket sica addanto rag-o ken ragsacmo, ket adunto ti agragsac iti pannacayanacna.

¹⁵ Ta dackelto iti sangoanan ti Apo: ket saanto nga uminum ti arac ken inumen a naingel: ket mapnonto ti Espiritu Santo manipud pay iti tian ni inana.

¹⁶ Ket adu cadagiti annac ti Israel ti mapagsublinanto iti Dios nga Apoda.

¹⁷ Ket isu mapanto iti masangoananna iti espiritu ken pannacabalin ni Elisas, tapno pasublienna dagiti puspuso dagiti amma cadagiti annac ket dagiti nasungit iti kinasirib dagiti nasingpet, tapno isaganaanna ti maysa nga Ili nga awan pagcuranganna a maipaay iti Apo.

¹⁸ Ket kinuna ni Zacarias idi angel: Anianto ti pacailasinac itoy? ta siac lacayacon ket ni asawac baketen.

¹⁹ Ket simmungbat di angel a kinunana kencuana: Siac ni Gabriel nga agserservi iti sangoanan ti Dios; ket nabaonac a makisao ken mangyeg kenca itoy naimbag a damag.

²⁰ Ket adtoy, agumelcanto ket dicanto macapagsao agingga iti aldaw a pannacaaramid daytoy, agsipud ta dica pinati dagiti saoc isuda a matungpalto inton tiempona.

²¹ Ket dagiti umili ururayenda idi ni Zacarias ket masmasdaawda iti panagmayengna idiay Templo.

²² Ket idi rimmuar saana a nabalin ti nakisao cadacuada; ket naammoanda nga isu nacakita ti datdatlag idiay Templo ket isu sininsiniasanna ida ket nagumel.

²³ Ket idi napalabas dagiti aldaw a panagannongna nagawid iti balayna.

²⁴ Ket idi calpasan dagitoy nga aldaw, nagsicog ni asawana nga Elisabet, ket naglemmeng iti bayat ti lima a bulan, a cuncunana:

²⁵ Casta ti inaramid ti Apo, cadagiti aldaw a panangkitana caniac tapno maiccat ti pacapilawac cadagiti tao.

Ti pannacaipasngay ni Jesus naipadamag.

²⁶ Ket iti maicanem a bulan, ni angel Gabriel imbaon ti Dios iti maysa nga Ili ti Galilea a managan Nazaret,

²⁷ Iti maysa a virgen a nakisacsi iti maysa a lalaki a managan Jose, a capututan ni David; ket ti nagan ti virgen, Maria.

²⁸ Ket simrec ti angel idi yanna ket kinunana; Dios ti aluadmo ta naparaburanca a naiduma! Ti Apo adda kenca; (naingasatanca cadagiti babbai)

²⁹ Ngem isu naglagaw unay, gapu itoy a sao, ket pinanpanunutna no ania ngata a kita ti cablaaw daytoy.

³⁰ Ket daydi angel kinunana kencuana: Maria, dica agbuteng, ta nacasaracca ti gracia ken Apo Dios.

³¹ Ket adtoy, agsicugcanto ken ipasngaymonto ti maysa nga anac a lalaki ket panaganamto ti JESUS.

³² Isu natan-octo, ket managanto Anac ti Cangatoan; ket ni Apo Dios itednanto kencuana ti trono ni David nga amana;

³³ Ket agarinto iti balay ni Jacob iti agnanayon; ket ti pagarianna awanto ti tungpalna.

³⁴ Ket kinuna ni Maria iti angel: Casanonto daytoy? ta siac awan am-ammoc a lalaki.

³⁵ Ket simmungbat di angel a nagcuna kencuana: Ti Espiritu Santo umayto kenca, ket ti pannacabalin ti Cangatoan salinungannacanto; gapuna met a ti Santo a mayanacto kenca managanto Anac ti Dios.

³⁶ Ket adtoy, ni Elisabet a cabagiam, nagsicog met iti kinabaketna iti maysa nga anac a lalaki, ket daytoy ti maicanem a bulanna idinto a naganenda ti lupes.

³⁷ Ta awan ti sao nga agtaud iti Dios, nga di adda pannacabalinna.

³⁸ Ket kinuna ni Maria: Adtoy ti adipen ti Apo: maaramid coma caniac cas iti saom. Ket ti angel pimmanaw kencuana.

Ni Maria sucnalanna ni Elisabet.

³⁹ Cadagitoy nga aldaw timmacder ni Maria, ket napan a sipapardas iti cabanbantayan, iti maysa nga Ili ti Juda;

⁴⁰ Ket simrec iti balay ni Zacarias, ket kinablaawanna ni Elisabet.

⁴¹ Ket ni Elisabet idi nangngegna ti cablaaw ni Maria, limmagto ti ubing iti tianna; ket ni Elisabet napno ti Espiritu Santo;

⁴² Ket impuccawna ti timecna ket kinunana: Naingasatanca cadagiti babbai, ket nagasat ti bunga ti tianmo.

⁴³ Ket adino ti naggapuan daytoy caniac a ti ina ti Apoc umay caniac?

⁴⁴ Ta adtoy, nga apaman a ti timec ti cablaawmo dimteng cadagiti lapayagco, ti ubing limmagto iti ragsac itoy tianco.

⁴⁵ Ket nagasat ti namati, ta matungpalto dagiti pinaibaga ti Apo kencuana.

Panagdayaw ni Maria.

⁴⁶ Ket kinuna ni Maria: Daydayawen toy cararuac ti Apo;

⁴⁷ Ket ti nakemco nagragsac ken Apo Dios a Manangisalacan caniac;

⁴⁸ Ta kinitana ti kinanomo ti adipenna; Ta adtoy, a manipud ita naganendacto ti naingasatan dagiti amin a caputotan.

⁴⁹ Ta inaramid caniac ti Mannacabalin dagiti dadackel a banag; Ket santo ti naganna.

⁵⁰ Ket ti caasina adda a maipaay cadagiti agsasaruno a caputotan Cadagiti agbuteng kencuana,

⁵¹ Dackel ti gapuanan ti tackiagna: Winarawarana dagiti nacuspag iti panagpanpanunot dagiti pusoda.

⁵² Iniccatna dagiti agtuturay cadagiti tronoda, Ket intan-ocna dagiti nababa a casasaad.

⁵³ Dagiti mabisbisinan pinennecna ida cadagiti naimbag a sagsagut, Ket dagiti nabacnang pinapanawna ida nga onga-ong;

⁵⁴ Nangted ti tulong iti Israel nga adipenna, Ta linagipna ti caasi.

⁵⁵ (Cas sinaona cadagiti ammatayo) Ken Abraham ken cadagiti putotna iti agnanayon.

⁵⁶ Ket nakipagnaed ni Maria kencuana iti canicatlo a bulan; ket sa nagawid iti balayna.

Pannacayanak ni Juan a Bautista.

⁵⁷ Ket nadanunan ti aldaw a panagpasngay ni Elisabet, ket naganac ti maysa a lalaki.

⁵⁸ Ket nangngeg dagiti caarubana ken cacabagianna a ti Apo impakitana kencuana ti dackel nga asina, ket nakipagragsacda kencuana.

⁵⁹ Ket naaramid nga iti maicawalo nga aldaw immayda kinugit ti ubing; ket ipanaganda coma kencuana ti nagan ni amana a Zacarias.

⁶⁰ Ket simmungbat ni inana, a nagcuna: Saan; no di ket managanto ti Juan.

⁶¹ Ket kinunada kencuana: Awan ti uray asino cadagiti cacabagiam a managan ti castoy a nagan.

⁶² Ket sininiasanda ni amana, no ania ti cayatna nga ipanagan.

⁶³ Ket dimmawat ti tabla a pagsuratan, ket insuratna a kinuna: Juan ti naganna. Ket nasdaawda amin.

⁶⁴ Ket naigiddato a naluc-atan manen ti ngiwatna ken dilana, ket nagsao a nagdaydayaw iti Dios.

⁶⁵ Ket napabuteng dagiti amin a caarubada; ket nagdinamag cadagiti amin a cabanbantayan ti Judea amin dagitoy a masasao.

⁶⁶ Ket amin dagiti nacangngeg cadacuada indulinda iti pusoda a cuncunada; anianto ngata daytoy nga ubing? Ta ti ima ti Apo adda idi kencuana.

Panagdayaw ni Zacarias.

⁶⁷ Ket ni Zacarias nga amana napno ti Espiritu Santo ket impadtona, a cuncunana:

⁶⁸ Madaydayaw coma ti Apo, ti Dios ti Israel; Ta sinarungcaranna ken inaramidna ti pannacasubbut ti Ilina.

⁶⁹ Ket imbayogna ti maysa a sara ti pannangisalacan a maipaay cadatayo Iti balay ni David nga adipenna.

⁷⁰ (Cas naisaona gapu iti ngiwat dagiti nasantoan a mammadtona nanipud pay idi ginasgasut a tawen),

⁷¹ Pannacaisalacan cadagiti cabusortayo, ken iti ima dagiti amin a gumura cadacayo;

⁷² Tapno aramidenna ti asi cadagiti ammatayo, ken lagipenna iti nasantoan a pannakitulagna:

⁷³ Ti cari nga insapatana ken Abraham nga amatayo,

⁷⁴ Nga isu itedna coma cadatayo, ti pannacaluc-attayo iti ima dagiti cabusortayo, tapno agservitayo kencuana nga awan buteng,

⁷⁵ Iti kinasanto ken kinalinteg iti sangoananna iti amin nga aldawtayo.

⁷⁶ Ket sica, ubing, managancanto ti mammadto ti Cangatoan; ta mapancanto iti sangoanan ti Apo, tapno isaganam dagiti dalanna;

⁷⁷ A mangipaawat cadagiti tattaona ti pannacaisalacan iti pannacaiccat dagiti basbasolda;

⁷⁸ Agtaud iti nasnec a panangngaasi ti Diostayo, isu a ti sinamar manipud iti ngato, sarungcarannatayo.

⁷⁹ A manglawag cadagiti agtutugaw iti sipnget ken aniniwan ni patay; A mangidalan cadagiti sacsacatayo iti dalan ni talna.

⁸⁰ Ket di ubing dimmackel; ket bimmileg iti espiritu; ket nagnaed cadagiti letlet-ang aginga iti aldaw a panagparangna iti Israel.