Levitico 8 - Ti Biblia (1973)

Ti pannacaconsagrar ni Aaron ken dagiti annacna a lallaki.

¹ Ket ni Jehova nakisao ken Moises, a kinunana,

² Alaem ni Aaron ken agraman dagiti annacna a lallaki, ken dagiti cawcawes, ken ti lana a pagsapsapo, ken ti vaca a lalaki a daton gapu iti basol, ken dagiti dua a lallaki a carnero, ken ti labba ti di-nalevaduraan a tinapay;

³ Ket tiptiponem amin ti gimong iti ruangan ti tolda ti gimong.

⁴ Ket ni Moises inaramidna ti cas imbilin kencuana ni Jehova; ket ti gimong natiptiponda iti ruangan ti tolda ti gimong.

⁵ Ket ni Moises kinunana iti gimong, Daytoy ti aramid nga aramiden nga imbilin ni Jehova.

⁶ Ket ni Moises innalana ni Aaron ken dagiti annacna a lallaki, ket binuggoanna ida iti danum.

⁷ Ket incabilna kencuana ti bado ket binaricsanna iti barikes, ket incapetna ti cagay kencuana, ket inlusong ti efod kencuana, sana incapet ti barikes ti efod a nasayaat ti pannacaabelna, isu ti pinanggalutna ti efod kencuana.

⁸ Ket insaadna kencuana ti pectoral, ket iti uneg ti pectoral incabilna ti Urim ken ti Tummim.

⁹ Ket insaadna ti mitra iti olona; ket iti sangoananna, iti mitra, incabilna ti pinitpit a balitoc, ti nasantoan a balangat; cas imbilin ni Jehova ken Moises.

¹⁰ Ket ni Moises innalana ti pagsapsapo a lana, ken sinapsapoanna ti tabernaculo ken amin nga adda iti unegna, ket sinantificarna ida.

¹¹ Ket winarsianna iti daydiay ti rabaw ti altar iti naminpito a daras ket linanaanna ti altar, ken amin nga alicamenna, ken ti pagbuggoan ken ti batayna, tapno pasantoenna ida.

¹² Ket binuyatanna ti olo ni Aaron iti lana a pagsapsapo, ket pinulotanna tapno pasantoenna.

¹³ Ket ni Moises innala dagiti annac a lallaki ni Aaron, ket kinawesanna ida cadagiti badbado, ket incapetna cadacuada dagiti barbarikes, ket imbedbedna cadagiti ol-oloda ti pannacacallogong; cas imbilin ni Jehova ken Moises.

¹⁴ Ket inyegna ti vaca a lalaki ti daton gapu iti basol: ket da Aaron ken dagiti annacna a lallaki impatayda dagiti im-imada iti rabaw ti olo ti vaca a daton gapu iti basol.

¹⁵ Ket pinatayna; ket ni Moises innalana ti dara, ket iti ramayna, incabilna cadagiti sarsara ti altar, ket ginugoranna ti altar, ket imbuyatna ti dara iti puon ti altar, ket pinasantona, tapno aramidenna ti pannacaabbongna.

¹⁶ Ket innalana amin a taba nga adda cadagiti lalaem, ken ti culapot ti dalem, ken dagiti dua a beckel, ken ti tabada; ket ni Moises pinuuranna ida iti rabaw ti altar.

¹⁷ Ngem ti vaca, ken ti lalatna, ken ti lasagna, ken ti tackina pinuuranna iti ruar ti pacarso; cas imbilin ni Jehova ken Moises.

¹⁸ Ket indatagna ti carnero a lalaki ti daton a mapuuran ket ni Aaron ken dagiti annacna a lallaki impatayda dagiti im-imada iti rabaw ti olo ti carnero.

¹⁹ Ket pinatayna; ket ni Moises inwarsina ti dara iti lawlaw ti rabaw ti altar.

²⁰ Ket rinangcayna ti carnero a lalaki; ket ni Moises pinuuranna ti olo, dagiti narangrangcay, ken ti taba.

²¹ Ket binuggoanna iti danum dagiti lalaem ken dagiti sacsacana; ket ni Moises pinuuranna amin a bagi ti carnero iti rabaw ti altar; isu idi ti maysa a daton a mapuuran nga agservi a nabanglo a sayamusom: daytoy ti maysa a daton a naaramid iti apuy ken Jehova; cas imbilin ni Jehova ken Moises.

²² Ket indatagna ti sabali a carnero a lalaki, ti carnero iti pannacaconsagrar: ket ni Aaron ken dagiti annacna a lallaki impatayda dagiti imada iti rabaw ti olo ti carnero.

²³ Ket pinatayna; ket ni Moises nangala iti dara daydiay ket incabilna iti rabaw ti tuctuc ti bolong ti lapayag a macanawan ni Aaron, ken iti tangan ti macanawan nga imana, ken rabaw ti tangan ti macanawan a sacana.

²⁴ Ket inyegna dagiti annac a lallaki ni Aaron; ket ni Moises incabilna ti nayon ti dara iti pantoc ti macanawan a laplapayagda, ken iti tangan dagiti im-imada a macanawan, ken iti tangan dagiti sacsacada a macanawan: ket ni Moises in-warsina ti dara iti lawlaw ti rabaw ti altar.

²⁵ Ket innalana ti taba, ken ti nalucmeg nga ipus, ken amin a taba nga adda cadagiti lalaem, ken ti culapot ti dalem, ken dagiti dua a beckel, ken ti tabada, ken ti macanawan a luppo:

²⁶ Ket iti labba ti tinapay a di-nalevaduraan nga adda iti sango ni Jehova, innalana ti maysa a bibingca a di-nalevaduraan, ken maysa a torta ti tinapay a nalanaan, ken maysa a cancanen, ket indissona ida iti taba ken iti macanawan a luppo:

²⁷ Ket incabilna amin iti ima ni Aaron ken cadagiti im-ima dagiti annacna sada inlili ida nga agservi a daton a maitayag iti sango ni Jehova.

²⁸ Ket ni Moises iniccatna dagidiay iti im-imada, ket pinuuranna ida iti rabaw ti altar iti ngatoen ti daton a mapuuran: daydiay ti maysa a pannacaconsagrar a nabanglo a sayamusom: isu idi ti maysa a daton a napuuran iti apuy ken Jehova.

²⁹ Ket ni Moises innalana ti barucong, ket inlilina a daton a maitayag iti sango ni Jehova: isu ti pannacabagi ni Moises iti carnero a lalaki ti pannacaconsagrar; cas imbilin ni Jehova ken Moises.

³⁰ Ket ni Moises nangala iti lana a pagsapsapo, ken iti dara nga adda iti altar, ket inwarsina ken Aaron, cadagiti cawcawesna, ken cadagiti annacna a lallaki, ken cadagiti cawcawes dagiti annacna a lallaki agraman kencuana, ket pinasantona ni Aaron dagiti cawcawesna, ken dagiti annacna a lallaki, ken dagiti cawcawes dagiti annacna a lallaki agraman kencuana.

³¹ Ket ni Moises kinunana ken Aaron ken cadagiti annacna a lallaki, Lingtaenyo ti lasag iti ruangan ti tolda ti gimong: ket canenyo idiay ken ti tinapay nga adda iti labba ti pannacaconsagrar, cas imbilinco a kinunac, Ni Aaron ken dagiti annacna a lallaki canendanto daydiay.

³² Ket ti matda iti lasag ken iti tinapay puuranyonto iti apuy.

³³ Ket iti pito nga aldaw dicayto pumanaw iti ruangan ti tolda ti gimong, inggana ti di-masungpot dagiti aldaw ti pannacaconsagraryo: ta isu consagrarennacayto iti pito nga aldaw.

³⁴ Cas ti pannacaaramidna daytoy nga aldaw, casta met ni Jehova imbilinna a maaramid, tapno aramiden ti pannacaabbong a maipaay cadacayo.

³⁵ Ket iti ruangan ti tolda ti gimong ti pagnaedanyonto nga agmalmalem ken agpatnag bayat dagiti pito nga al-aldaw, ket salimetmetanyonto ti imbilin ni Jehova, tapno dicayto matay: ta casta ti naibilin caniac.

³⁶ Ket ni Aaron ken dagiti annacna a lallaki inaramidda amin a pinaibilin ni Jehova ken Moises.