Levitico 7 - Ti Biblia (1973)

Ti akem ti padi cadagiti datdaton iti salungasing; cadagiti datdaton iti cappia. Ti taba ken ti dara dinto macan. Ti bagi dagiti papadi.

¹ Ket daytoy ti alagaden ti panagdaton gapu iti salungasing: isu ti nasantoan unay.

² Iti disso a pamatpatayanda iti daton a mapuuran ti pamapatayanda iti daton gapu iti salungasing; ket ti dara daytoy iwarisnanto iti lawlaw ti rabaw ti altar.

³ Ket idatonnanto itoy ti dagup ti tabana: ti nalucmeg nga ipus, ken ti taba a mangcumot cadagiti lalaem,

⁴ Ken ti dua a beckel, ken ti taba nga adda cadacuada iti apiring dagiti lomo, ken ti culapot ti dalem agraman cadagiti beckel iccatennanto;

⁵ Ket ti padi puurannanto ida iti rabaw ti altar a maysa a daton a maaramid iti apuy ken Jehova: isu ti maysa a daton gapu iti salungasing.

⁶ Tunggal lalaki cadagiti papadi manganto iti daydiay; iti nasantoan a disso ti pangananto: isu nasantoan unay.

⁷ Cas iti daton gapu iti basol, casta met ti daton gapu iti salungasing, maymaysa nga alagaden ti pacawadanda: ti padi a mangaramid iti daydiay a pacaabbongan, cucuananto.

⁸ Ket ti padi a mangirucbab iti daton a mapuuran ti maysa a tao, ti padi met laeng tagicuaennanto ti lalat ti maidaton a mapuuran nga impaayna.

⁹ Ket tunggal daton a canen a maluto iti horno, ken amin a maluto iti parioc ken iti bandeja ti horno, cucuanto ti padi a mangidaton.

¹⁰ Ket tunggal daton a macan a nalaocan iti lana, wenno namaga, cucuanto amin dagiti annac a lallaki ni Aaron, nga cas iti bingay ti maysa, casta met ti bagi ti sabali.

¹¹ Ket daytoy ti alagaden ti sacrificio cadagiti datdaton a maipaay ti cappia nga idatagto ti maysa a tao ken Jehova.

¹² No isu yawatnanto a pagyaman, idatonnanto ngarud ti namayecmec a bel-laay a buyugen ti sacrificio a pagyaman dagiti saan a nalevaduraan a bibingca a nalaocan iti lana, ken di-nalevaduraan a cancanen a nasapsapoan iti lana, ken tortorta a nalaocan iti lana.

¹³ Agraman dagiti bibingca ti tinapay a nalevaduraan, idatagnanto ti datonna a buyugen ti sacrificio dagiti datdatonna a maipaay iti capia a pagyaman.

¹⁴ Ket iti daydiay ipaaynanto ti maysa iti tunggal daton, nga agservi a daton a maitayag ken Jehova; daytoy cucuanto ti padi a mangiwarsi iti dara dagiti datdaton iti cappia.

¹⁵ Ket ti lasag ti sacrificio dagiti idatonna iti cappia a pagyaman macanto iti aldaw panagidatonna; awanto ti matda agingga iti bigat.

¹⁶ Ngem no ti sacrificio ti datonna maysa a cari, wenno ti maysa a daton ti sibubulos a nakem, macanto iti aldaw a panangipaayna iti datonna; ket ti cabigatanna canennanto ti tiddana: isu ti pannacacaanto ti matda:

¹⁷ Ngem ti mabati iti lasag ti sacrificio agingga iti maicatlo nga aldaw, mapuuranto iti apuy.

¹⁸ Ket no adda uray ania a lasag iti sacrificio dagiti datdatonna a maipaay iti cappia a canenna iti maicatlo nga aldaw, saanto a maawat, dinto met maibilang kencuana a nangidatag iti daton: maysanto a rimon, ket ti cararua ti mangan awitennanto ti kinadakesna.

¹⁹ Ket ti lasag a maisagid iti uray aniaman a saan a nadalus, saan a canen; mapuuranto iti apuy. Ket no maipapan iti lasag tumunggal maysa a nadalus manganto iti daytoy:

²⁰ Ngem ti tao a mangan iti lasag ti sacrificio dagiti datdaton iti cappia, a maipaay ken Jehova, idinto a sirurugit, dayta a tao maipusayto iti ilina.

²¹ Ket no addanto maysa a macasagid iti uray ania a narugit, ti kinarugit ti tao wenno kinarugit ti animal, wenno maysa a nacarimrimon a rugit, ket mangan iti lasag ti sacrificio dagiti datdaton iti cappia, a maipaay ken Jehova, dayta a tao maipusayto iti ilina.

²² Ket ni Jehova nakisao ken Moises, a kinunana,

²³ Ibagam cadagiti annac ti Israel, a cunam, Dicayto mangan iti taba ti vaca, wenno carnero, wenno calding.

²⁴ Ket ti taba ti matay latta, ken ti taba ti pinisangpisang dagiti narungsot nga animal, mabalin nga aramaten iti uray ania a pacaipayanna; ngem uray caano dicayto mangan iti dayta.

²⁵ Ta ti uray siasinoman a mangan iti taba ti animal a mapuuran a dagiti tattao idatagda a daton iti apuy ken Jehova, uray daydiay a tao a mangan iti dayta maipusayto iti ilina.

²⁶ Ket dacayo dicayto mangan a pulos iti dara, uray dara ti tumatayab wenno animal iti uray sadino a pagnaedanyo.

²⁷ Siasinoman a mangan iti uray ania a dara, dayta a tao maipusayto iti ilina.

²⁸ Ket ni Jehova nakisao ken Moises, a kinunana,

²⁹ Ibagam cadagiti annac ti Israel, a cunam, Ti mangidatag iti sacrificio dagiti datdatonna gapu iti cappia ken Jehova, yegnanto ti datonna iti sacrificio dagiti datdatonna gapu iti cappia ken Jehova:

³⁰ Dagiti imana met laeng ti mangyegto cadagiti datdaton a mapuuran iti apuy ken Jehova; ti taba agraman ti barucong yegnanto, tapno ti barucong mailili cas daton a maitayag iti sango ni Jehova.

³¹ Ket ti padi puurannanto ti taba iti rabaw ti altar; ngem ti barucong cucuanto ni Aaron ken dagiti annacna a lallaki.

³² Ket ti luppo a macanawan itedyonto iti padi a maipaay a daton a maitayag cadagiti sacrificio dagiti datdatonyo iti cappia.

³³ Ti anac a lalaki ni Aaron a mangirucbab ti dara dagiti datdaton iti cappia, ken ti taba, cucuananto ti macanawan a luppo a pannacabagina.

³⁴ Ta ti barucong a mailili ken ti luppo a maitayag, innalac cadagiti annac ti Israel cadagiti sacrificio dagiti datdatonda a maipaay iti cappia, ket intedco ken Aaron a padi ken cadagiti annacna a lallaki cas pannacabagida nga agnanayon nga aggapu cadagiti annac ti Israel.

³⁵ Daytoy ti pannacabagi ni Aaron a napolutan ken ti pannacabagi dagiti annacna a lallaki ta napolutanda, cadagiti datdaton a naaramid iti apuy ken Jehova iti aldaw a panangidatagna cadacuada tapno agannongda ken Jehova iti akem ti padi,

³⁶ Isu a imbilin ni Jehova a maited a pannacabagida cadagiti annac ti Israel, iti aldaw a panangpulotna cadacuada. Isu ti pannacabagida nga agnanayon cadagiti capcaputotanda.

³⁷ Daytoy ti alagaden iti daton a mapuuran, iti daton a macan, ken iti daton gapu iti basol, ken iti daton gapu iti salungasing, ken ti pannacaconsagrar, ken iti panangidatag cadagiti datdaton iti cappia;

³⁸ Nga ni Jehova imbilinna ken Moises idiay bantay Sinai, iti aldaw a panangbilinna cadagiti annac ti Israel nga ipaayda dagiti datdatonda ken Jehova, idiay tay-ac ti Sinai.