Levitico 6 - Ti Biblia (1973)

Ti akem ti padi cadagiti datdaton a mapuuran; cadagiti datdaton a macan; cadagiti datdaton iti basol.

¹ Ket ni Jehova nakisao ken Moises, a kinunana,

² No ti maysa a tao macabasol, ket mailaw-an a sumalungasing ken Jehova, ket ulbodenna ti padana a tao iti naitalec, wenno iti nagtulaganda, wenno iti tacaw, wenno pinarigatna ti padana a tao,

³ Wenno nasaracanna ti napucaw, ket yulbodna, ket sapataanna iti tiri; iti uray ania cadagitoy a banbanag nga aramiden ti tao, isu ti pacabasolan;

⁴ Agbanagto ngarud a no nacabasol, ket sibibiddut, isublinanto ti tinacawna, wenno nagun-odna gapu iti pammarparigatna, wenno ti naitalec kencuana, wenno ti napucaw a nasaracanna,

⁵ Wenno aniaman a sinapataanna iti tiri, isublinanto met laeng nga awan macsay, ket nayonannanto pay iti apagcalimana: ket ti agtagicua isu ti pangitedannanto iti aldaw a pannacasaracna iti nacabaddutanna.

⁶ Ket yegnanto iti padi ti daton ken Jehova gapu iti salungasing, maysa a carnero a lalaki nga awan pacapilawanna, a maitutop iti cas pamatpatgam, nga agservi a daton gapu iti salungasing:

⁷ Ket ti padi aramidennanto a pacaabbonganna iti sango ni Jehova; ket mapacawanto iti uray ania nga inaramidna nga nacabasolanna.

⁸ Ket ni Jehova nakisao ken Moises, a kinunana,

⁹ Ibilinmo ken Aaron ken cadagiti annacna a lallaki, a cunam, Daytoy ti alagaden iti daton a mapuuran: ti daton a mapuuran addanto iti pagsungrodan iti rabaw ti altar iti agpatpatnag agingga iti bigat; ket ti apuy ti altar mapaspasgedanto laeng iti rabawna.

¹⁰ Ket ti padi icapetnanto ti badona a lienzo, ket dagiti sapinna a lienzo icapetnanto iti bagina; ket iccatennanto dagiti dapo, apaman a naibus ti apuy ti daton a mapuuran iti rabaw ti altar, ket icabilnanto ida iti sikigan ti altar.

¹¹ Ket iccatennanto dagiti cawcawesna, ket icapetnanto dagiti sabali a cawcawes, ket yallatiwnanto dagiti dapdapo iti ruar ti pacarso iti nadalus a disso.

¹² Ket ti apuy iti rabaw ti altar mabatinto a sidadarang idiay, daytoy dinto maiddep; ket ti padi sungsungrodannanto iti biniganbigat; ket icabilnanto a siuurnos iti rabawna ti daton a mapuuran, ket puurannanto idiay ti taba dagiti daton a maipaay iti cappia.

¹³ Ti apuy mabatinto laeng a sidadarang nga agnanayon iti rabaw ti altar; daytoy dinto maiddep.

¹⁴ Ket daytoy ti alagaden iti daton a macan: dagiti annac a lallaki ni Aaron idatondanto iti saclang ni Jehova, iti sango ti altar.

¹⁵ Ket mangalanto iti sangarakemna iti daydiay, iti namayecmec nga harina ti daton a canen, ken iti dadduma a lanana, ken dagup ti incienso nga adda iti daton a bel-laay, ket puurannanto iti rabaw ti altar nga agservi a nabanglo a sayamusom, cas pacalaglagipanna, ken Jehova.

¹⁶ Ket ti matda iti daydiay canento ni Aaron ken dagiti annacna a lallaki: macanto a di-nalevaduraan iti maysa a nasantoan a disso; iti paraangan ti tolda ti gimong canendanto.

¹⁷ Dinto maluto a silelevadura iti horno. Intedco a cas bagida cadagiti datdaton caniac, iti maaramidto iti apuy; daytoy ti nasantoan unay, a cas ti daton gapu iti basol, ken cas ti daton gapu iti salungasing.

¹⁸ Tumunggal maysa a lalaki cadagiti annac ni Aaron canennanto cas bagina nga agnanayon cadagiti putputotyo, cadagiti datdaton ken Jehova iti maramid iti apuy: ti mangsagid cadagidiay nasantoanto.

¹⁹ Ket ni Jehova nakisao ken Moises, a kinunana,

²⁰ Daytoy ti daton ni Aaron ken dagiti annacna a lallaki, nga ipaaydanto ken Jehova iti aldaw a pannacasapsapona: ti apagcapulo ti maysa nga efa ti namayecmec nga harina a maipaay a mataginayon a daton a bel-laay, ti cagudduana iti bigat ket ti maysa a gudduana iti malem.

²¹ Iti maysa a bandeja ti horno maaramidto a silalana; no maupran yunegmonto: ti mapispisi a naluto idatonmonto ti daton a canen, nga agservi, a nabanglo a sayamusom ken Jehova.

²² Ket ti padi a napulotan a sumononto kencuana cadagiti annacna a lallaki idatonnanto: gapu iti mataginayon a pagbilinan, mapuuranto nga awan ti curangna a maipaay ken Jehova.

²³ Ket tunggal daton a canen ti padi mapuuranto nga awan ti curangna: dinto macan.

²⁴ Ket ni Jehova nakisao ken Moises, a kinunana,

²⁵ Ibagam ken Aaron ken cadagiti annacna a lallaki, a cunam, Daytoy ti alagaden iti panagdaton gapu iti basol: iti disso a pamatpatayan iti daton a mapuuran, isunto met ti pamapatayan iti daton gapu iti basol iti saclang ni Jehova isu ti nasantoan unay.

²⁶ Ti padi a mangidaton itoy gapu iti basol, canennanto: iti maysa a disso a nasantoan isu panganannanto, iti paraangan ti tolda ti gimong.

²⁷ Uray aniaman a macasagid iti lasag iti daytoy, nasantoanto; ket no mawarsian ti darana iti uray ania a cawes, labaamto ti nawarsian iti maysa a disso a nasantoan.

²⁸ Ngem ti damili a nacalutoanna boongento; ket no suer nga alicamen ti nacalutoanna, maugasanto, ket mabuggoanto iti danum.

²⁹ Tunggal lalaki cadagiti papadi canennanto daydiay: isu ti nasantoan unay.

³⁰ Ket saan a macan ti daton gapu iti basol, no ti dadduma a darana naiserrec iti tolda ti gimong, tapno maaramid a pacaabbongan iti nasantoan a disso: mapuuranto iti apuy.