Levitico 4 - Ti Biblia (1973)

Ti linteg cadagiti datdaton iti basol.

¹ Ket ni Jehova nakisao ken Moises, a kinunana,

² Ibagam cadagiti annac ti Israel, a cunam, No addanto macabasol a dina gagaraen iti maysa cadagiti saan nga aramiden nga imbilin ni Jehova, ket aramidennanto ti maysa cadagidiay:

³ No ti napulotan a padi macabasolto isu a pacairamananto ti ili, mangidaton ngarud gapu iti basolna nga inaramidna, iti maysa a bumaro a vaca nga awan pacapilawanna ken Jehova, a maipaay a daton gapu iti basol.

⁴ Ket mangyegto iti vaca a bumaro iti ruangan ti tolda ti gimong iti sango ni Jehova; ket ipataynanto ti imana iti rabaw ti olo ti vaca, ket patayennanto ti vaca iti sango ni Jehova.

⁵ Ket ti napulotan a padi alaennanto ti dara ti vaca, ket yegnanto iti tolda ti gimong:

⁶ Ket ti padi ibabasananto ti ramayna iti dara, ket iwarisnanto ti dara iti maminpito iti saclang ni Jehova iti sangoanan ti abbong ti santuario.

⁷ Ket ti padi icabilnanto ti dadduma a dara cadagiti sarsara ti altar ti incienso a nasayamusom iti sango ni Jehova, nga adda iti tolda ti gimong; ket ti dagup ti dara ti bumaro a vaca ibuyatnanto iti puon ti altar ti daton a mapuuran, nga adda iti ruangan ti tolda ti gimong.

⁸ Ket amin a taba ti vaca a daton gapu ti basol iccatennanto; ti taba a mangbungon cadagiti lalaem, ken amin a taba cadagiti lalaem,

⁹ Ket dagiti dua a beckel, ken ti taba nga adda iti rabawda, a nayapiring cadagiti lomo, ken ti culapot ti dalem, agraman dagiti beckel, iccatennanto.

¹⁰ A cas panangiccat ti taba iti vaca a lalaki ti sacrificio dagiti daton iti cappia: ket ti padi puurannanto ida iti rabaw ti altar ti daton a mapuuran.

¹¹ Ket ti lalat ti vaca ken amin a lasagna, agraman ti olona ken agraman sacsacana, ken lalaemna, ken tackina,

¹² Uray ti dagup ti bagi ti vaca ipannanto iti ruar ti pacarso agingga iti nadalus a yan, a pacaiccan dagiti dapo, ket puurannanto iti rabaw ti sungrod iti apuy: iti pacaibellengan dagiti dapo isu ti pacapuurannanto.

¹³ Ket no ti amin a gimong ti Israel macabasol, ket ti aramid nalmeng cadagiti matmata ti gimong, ket isuda nagaramidda cadagiti imbilin ni Jehova a saan nga aramiden, ket nacabasolda;

¹⁴ No ti basol a nacabiddutanda maammoan, ti gimong ngarud idatonnanto ti maysa a vaca a bumaro nga agservi a daton gapu iti basol, ket yegna iti sango ti tolda ti gimong.

¹⁵ Ket dagiti panglacayen ti gimong ipataydanto dagiti im-imada iti rabaw ti olo ti vaca iti saclang ni Jehova; ket ti vaca mapatayto iti sango ni Jehova.

¹⁶ Ket ti napulotan a padi yegnanto ti dadduma a dara ti vaca iti tolda ti gimong:

¹⁷ Ket ti padi isawsawnanto ti ramayna iti dara, ket iwarisnanto iti maminpito iti saclang ni Jehova iti sangoanan ti abbong.

¹⁸ Ket icabilnanto ti dadduma a dara iti rabaw dagiti sarsara ti altar nga adda iti sango ni Jehova, nga adda iti uneg ti tolda ti gimong; ket amin ti dara ibucbucnanto iti puon ti altar ti daton a mapuuran, nga adda iti ruangan ti tolda ti gimong.

¹⁹ Ket iccatennanto ti dagup ti tabana, ket puurannanto iti rabaw ti altar.

²⁰ Castoy ti aramidennanto iti vaca; cas inaramidna iti vaca ti daton gapu iti basol, castanto ti panangaramidna iti daytoy, ket ti padi aramidennanto ti pacaabbongan ti ili, ket mapacawandanto.

²¹ Ket alaennanto ti vaca iti ruar ti pacarso, ket puurannanto a cas pinangpuurna idi immuna a vaca: isu ti daton gapu iti basol nga maipaay iti gimong.

²² No maysa nga agturay ti macabasol, ket aramidenna a di gagaraen ti uray ania a di aramiden, cadagiti imbilin ni Jehova a Diosna ket nacabasol;

²³ No ti babacna a nacabasolanna maipacaammo kencuana, yegnanto a datonna ti maysa a calding, a lalaki nga awan pilawna;

²⁴ Ket ipataynanto ti imana iti rabaw ti olo ti calding, ket patayennanto iti disso a pamatpatayanda iti daton a mapuuran iti saclang ni Jehova: isu ti maysa a daton gapu iti basol.

²⁵ Ket ti padi isawsawnanto ti ramayna iti dara ti daton gapu iti basol, ket icabilnanto iti rabaw dagiti sarsara ti altar ti daton a mapuuran; ket ti darana ibuyatnanto iti puon ti altar ti daton a mapuuran.

²⁶ Ket dagup ti tabana puurannanto iti rabaw ti altar, cas ti taba ti sacrificio dagiti datdaton a maipaay iti cappia; ket ti padi aramidennanto a pacaabbonganna cas mayannatup iti basolna, ket mapacawanto.

²⁷ Ket no maysa cadagiti tattao a caaduan ti macabiddut a dina gagaraen, no agaramid iti maysa cadagiti saan nga aramiden nga imbilin ni Jehova, ket macabasol;

²⁸ No ti basolna a nacabiddutanna maipacaammo kencuana, yegnanto ngarud a datonna ti maysa a calding, cabayan nga awan pacapilawanna, gapu iti basol a nacabiddutanna.

²⁹ Ket ipataynanto ti imana iti rabaw ti olo ti daton gapu iti basol, ket patayennanto ti daton gapu iti basol iti yan ti daton a mapuuran.

³⁰ Ket ti padi isawsawnanto ti ramayna iti dara daydiay, ket icabilnanto cadagiti sarsara ti altar ti daton a mapuuran; ket dagup ti dara daydiay ibuyatnanto iti puon ti altar.

³¹ Ket amin a tabana iccatennanto, cas pannacaiccat ti taba iti sacrificio dagiti datdaton a maipaay iti cappia; ket ti padi puurannanto iti rabaw ti altar, a nabanglo a sayamusom ken Jehova; ket ti padi aramidennanto a pacaabbonganna, ket mapacawanto.

³² Ket no mangyeg iti maysa a cordero a daton nga ipaayna gapu iti basol, maysa a cabayan nga awan pacapilawanna ti yegnanto.

³³ Ket ipataynanto ti imana iti rabaw ti olo ti daton gapu iti basol, ket patayennanto a daton gapu iti basol iti disso a pamatpatayanda iti daton a mapuuran.

³⁴ Ket ti padi isawsawnanto ti ramayna iti dara ti daton gapu iti basol, ket icabilnanto iti rabaw dagiti sarsara ti altar ti daton a mapuuran; ket amin a dara daydiay ibuyatnanto iti puon ti altar:

³⁵ Ket amin a tabana iccatennanto, cas iti pannacaiccat ti taba ti cordero iti sacrificio dagiti datdaton a maipaay iti cappia; ket ti padi puurannanto ida iti rabaw ti altar, iti ngatoen dagiti datdaton a maaramid iti apuy ken Jehova ket ti padi aramidennanto a pacaabbonganna a maipanggep iti basolna a nacabiddutanna, ket mapacawanto.