Levitico 27 - Ti Biblia (1973)

Linlinteg maipapan cadagiti carcari; maipapan cadagiti apagcapulo.

¹ Ket ni Jehova nakisao ken Moises, a kinunana,

² Ibagam cadagiti annac ti Israel, ket cunam cadacuada, No ti maysa a tao agcarinto ken Jehova, dagiti tattao maipategdanto ken Jehova a mayannurot iti pananggatadmo.

³ Ket ti panggatadamto iti lalaki nga manipud agtawen ti duapulo agingga iti innem a pulo, gatadamto ngarud iti limapulo a siclo ti pirac, cas iti siclo ti santuario.

⁴ Ket no babai gatadamto iti tallopulo a siclo.

⁵ Ket no manipud agtawen ti lima inggana iti duapulo, ti panggatadamto ngarud iti lalaki duapulo a siclo, ket no babai sangapulo a siclo.

⁶ Ket no manipud agtawen ti macabulan agingga iti lima a tawen, ti panggatadamto ngarud iti lalaki lima a siclo a pirac, ket no babai gatadamto iti tallo a siclo a pirac.

⁷ Ket no manipud agtawen ti innem a pulo ken nasuroc; no lalaki gatadamto ngarud iti sangapulo ket lima a siclo, ket iti babai sangapulo a siclo.

⁸ Ngem no napangpanglao ngem ti panggatadam, maipanto iti saclang ti padi ket ti padi gatadannanto; ti mayannatop iti cabaelan ti nagcari isu ti panggatadanto ti padi.

⁹ Ket no maysa nga animal, nga idaton dagiti tattao a pagdayaw ken Jehova, dagup amin cadagidiay nga ited ti siasinoman a tao ken Jehova nasantoandanto.

¹⁰ Dinanto baliwan wenno sucatan ti nasayaat iti dakes, wenno ti dakes iti nasayaat: ket no masucatanto laeng iti animal ken animal, isudanto ngarud a dua napagsinnucat agpadpadada a nasantoan.

¹¹ Ket no maysa nga animal a saan a nadalus, nga dagitoy saan nga mabalin nga idaton ken Jehova, ipannanto ngarud ti animal iti padi.

¹² Ket ti padi gatadannanto, no naimbag wenno dakes: cas iti pananggatad ti padi, castanto.

¹³ Ket no cayatnanto a subboten, inayonnanto ngarud ti apagcalima daydiay nanggatadam.

¹⁴ Ket no maysa a tao santificarennanto ti balayna tapno nasantoan ken Jehova, ti padi ngarud gatadannanto, no naimbag wenno dakes: cas iti ikeddengto ti padi, dayta ti matungpalto:

¹⁵ Ket no daydiay nangsantificar iti balayna, subbotennanto, no casta nayonannanto iti apagcalima ti pirac a pinanggatadmo, ket cucuananto.

¹⁶ Ket no ti maysa a tao santificarennanto ken Jehova ti dadduma iti talon a cucuana, iti pananggatadmonto maitutop iti maimulmula; ti mamulaan iti maysa nga omer a cebada, magatadanto iti limapulo a siclo a pirac.

¹⁷ Ket no santificarenna ti talonna manipud iti tawen a jubileo, cas iti panggatadam isu ti matungpalto.

¹⁸ Ngem no santificarennanto ti talonna calpasan ti jubileo, ti padi ngarud ipasangnanto kencuana ti pirac a maitutop cadagiti tawtawen agpapan iti tawen a jubileo; ket maaramidto ti maysa panangkessay iti pananggatadmo.

¹⁹ Ket no ti nangsantificar iti talonna cayatnanto a subboten, inayonnanto ngarud ti apagcalima ti pirac a nanggatadam iti daydiay, ket mapatalgedanto kencuana.

²⁰ Ket no dinanto subboten ti talon, wenno nalacona ti talon iti sabali a tao, saanto a masubbotten:

²¹ Ngem ti talon no mayawat iti tawen a jubileo, nasantoanto ken Jehova, cas maysa a talon a naisagut; maipatagicuanto iti padi.

²² Ket no santificarenna ken Jehova ti maysa a talon a ginatangna a saan a nayon ti cucuana a sigud:

²³ Ti padi ipasangnanto kencuana ti ngina a nanggatadam agpapan iti tawen a jubileo: ket itednanto ti nanggatadam iti daydiay nga aldaw, cas nasantoan a banag ken Jehova.

²⁴ Iti tawen a jubileo, ti talon maisublinto ken nacagatanganna, daydiay met laeng nakincucua iti daga.

²⁵ Ket amin ti pinanggatadmo mayannurotto iti siclo ti santuario: duapulo a gera isunto ti siclo.

²⁶ Iti laeng umuna nga anac cadagiti an-animal nga agpaay nga umuna a bunga ken Jehova, awanto ti mangsantificar cadacuada, uray no vaca, wenno carnero, cucuan ni Jehova.

²⁷ Ket no saan a nadalus nga animal, subbotennanto ngarud, cas pananggatadmo, ket inayonnanto iti daydiay ti apagcalimana; ket no dina nasubbot malaconto ngarud cas iti panggatadam.

²⁸ Ngem saanto a malaco wenno masubbot ti banag a naicari nga icarinto ti maysa a tao ken Jehova iti dagup ti adda kencuana, tao man wenno animal, wenno talon a cucuana: tunggal naicari isu ti nasantoan unay ken Jehova.

²⁹ Saanto a masubbot ti uray ania a naicari, nga aggapu cadagiti tattao; maipatayto a di agcurang kencuana ni patay.

³⁰ Ket amin nga apagcapullo ti daga, uray dagiti bucbukel iti daga uray iti bunga ti cayo, cucua ni Jehova: nasantoan ken Jehova.

³¹ Ket no ti maysa a tao subbotennanto ti uray aniaman nga apagcapulona, nayonannanto iti apagcalimana.

³² Ket amin nga apagcapullo ti arban dagiti vacvaca ken ti pangen dagiti carcarnero, uray ania a magna babaen ti sarucod, ti apagcapullo nasantoandanto ken Jehova.

³³ Dinanto amisiren uray naimbag, uray dakes, dinanto met sandian; ket no sandianna laeng, daydiay ken ti maisucat agpadpadadanto a nasantoan: saanto a masubbot.

³⁴ Dagitoy dagiti al-alagaden nga ni Jehova imbilinna ken Moises a maipaay cadagiti annac ti Israel idiay bantay Sinai.